ពីការតវ៉ាសេដ្ឋកិច្ចទៅជាការបះបោរនយោបាយ បាតុករទាមទារឲ្យ Khamenei ចុះចេញពីតំណែង

អ្វីដែលបានចាប់ផ្តើមត្រឹមតែជាកូដកម្មក្នុងស្រុកប្រឆាំងនឹងការធ្លាក់ចុះនៃតម្លៃរូបិយប័ណ្ណ បានវិវត្តយ៉ាងឆាប់រហ័សទៅជាការងើបបះបោរនយោបាយនៅទូទាំងប្រទេសអ៊ីរ៉ង់ ដោយក្រុមបាតុករ​នាពេលនេះ បានទាមទារយ៉ាងច្បាស់ឲ្យមានការដកហូតតំណែងមេដឹកនាំកំពូល Ayatollah Ali Khamenei។

យោង​តាម BBC ខណៈដែលភាពចលាចលបានឈានចូលដល់ថ្ងៃទី​១១ គិត​ត្រឹម​ថ្ងៃ​ពុធ​ទី​៧​ខែ​មករា​ គោលដៅនៃការធ្វើបាតុកម្មបានផ្លាស់ប្តូរពីបញ្ហាអតិផរណាដ៏ខ្ពស់ ទៅជាការចោទសួរអំពីភាពស្របច្បាប់នៃរបបសាធារណរដ្ឋឥស្លាមផ្ទាល់តែម្តង។ នៅតាមបណ្តាទីក្រុងនានា រាប់​ចាប់ពីរដ្ឋធានី​តេហេរ៉ង់ រហូតដល់ទីក្រុង Mashhad និង Qazvin ក្រុម​មនុស្ស​បាន​នាំ​គ្នា​ស្រែកថា «ស្លាប់ទៅជនផ្តាច់ការ» និង «Seyyed Ali ត្រូវតែដួលរលំ» ដែលនេះជាការប្រឈមមុខដោយផ្ទាល់ទៅនឹងមេដឹកនាំវ័យ៨៦​ឆ្នាំ ដែលមានអំណាចកំពូលក្នុងប្រទេស។

ក្រុមអ្នករិះគន់ និងអ្នកចូលរួមបានអះអាងថា ការដួលរលំសេដ្ឋកិច្ចរបស់ប្រទេស ដែលបង្ហាញតាមរយៈតម្លៃប្រាក់ Rial ធ្លាក់ចុះទាប​បំផុត និងអតិផរណាលើសពី៥០% គឺជាផលវិបាកដែលមិនអាចជៀសបាននៃការគ្រប់គ្រងអំណាចកណ្តាល អំពើពុករលួយ និងគោលនយោបាយការបរទេស​របស់លោក Khamenei ដែលផ្តល់អាទិភាពដល់ក្រុមប្រដាប់អាវុធក្នុងតំបន់ ជាជាងស្ថិរភាពក្នុងស្រុក។

ថ្នាក់ដឹកនាំអ៊ីរ៉ង់បានឆ្លើយតបដោយប្រើប្រាស់យុទ្ធសាស្ត្រ​ចំនួន​ពីរគឺ ការទទួលស្គាល់ជាសាធារណៈ និងការបង្ក្រាបដោយហិង្សា។ ​លោក​ប្រធានាធិបតី Masoud Pezeshkian បានបង្ហាញជំហរទន់ភ្លន់ ដោយ​​ទទួលស្គាល់ថា បញ្ហាសេដ្ឋកិច្ចរបស់ប្រទេសគឺបណ្តាលមកពី «ការគ្រប់គ្រងមិនបានល្អ» របស់រដ្ឋាភិបាលផ្ទាល់ មិនមែនមកពីតែទណ្ឌកម្មអន្តរជាតិ​ពីប្រទេសដទៃនោះឡើយ។ លោកថែមទាំងបានលើកឡើងថា ប្រជាពលរដ្ឋមានសិទ្ធិក្នុងការតវ៉ាដោយសន្តិវិធី។ យ៉ាង​ណា​មិញ មេដឹកនាំដែលមានអំណាចបំផុតរបស់ប្រទេសគឺ លោក Khamenei បាន​បង្ហាញ​ជំហរ​​តឹងរ៉ឹងជាង។ លោកបានបែងចែកយ៉ាងច្បាស់រវាងអ្នកតវ៉ា «ស្របច្បាប់» និង «អ្នកបង្កកុបកម្ម»។ លោកបានព្រមានថា អ្នកបង្កកុបកម្មទាំងនោះត្រូវតែ «ដាក់ឲ្យនៅតាមកន្លែងរបស់ពួកគេ» ដែលមនុស្សជាច្រើនយល់ថា ជាការបើកដៃឲ្យប៉ូលិស និងយោធាប្រើប្រាស់អំពើហិង្សាកាន់តែខ្លាំង។

ក្រុមសិទ្ធិមនុស្សនិយាយថា នាពេលនេះរដ្ឋាភិបាលកំពុងប្រើប្រាស់ឧស្ម័នបង្ហូរទឹកភ្នែក និងគ្រាប់កាំភ្លើងពិតនៅតាមតំបន់ភាគច្រើនក្នុងប្រទេស។ ពួកគេថែមទាំងបានរាយការណ៍ថា កងកម្លាំងសន្តិសុខបានចូលទៅក្នុងមន្ទីរពេទ្យ ដើម្បីចាប់ខ្លួនបាតុករដែលរងរបួស ខណៈដែលពួកគេកំពុងស្វែងរកការព្យាបាល។ គិតមកទល់ពេលនេះ មនុស្សជាង​៣០​នាក់​ហើយ​បានបាត់បង់ជីវិត និងរាប់ពាន់នាក់ទៀតត្រូវបានចាប់ខ្លួន៕

ប្រែសម្រួល៖ ឈាង