មន្ត្រីរុស្ស៊ី ចំអកឲ្យអឺរ៉ុប មិនគួរឌឺដងលោកត្រាំ ក្រោយអាមេរិកប្រកាសយកពន្ធគ្មានត្រាប្រណី

លោក Kirill Dmitriev ប្រេសិតពិសេសរបស់ប្រធានាធិបតីរុស្ស៊ី បានសរសេរនៅលើប្រព័ន្ធផ្សព្វផ្សាយសង្គម កាលពីថ្ងៃទី ១៧ ខែមករាថា ប្រធានាធិបតីអាមេរិកលោក ដូណាល់ ត្រាំ បានប្រកាសដាក់ពន្ធគយ ១០ ភាគរយលើចក្រភពអង់គ្លេស ដាណឺម៉ាក បារាំង អាល្លឺម៉ង់ ហ្វាំងឡង់ ហូឡង់ និងន័រវែស បន្ទាប់ពីពួកគេបញ្ឈេះកំហឹងដោយដាក់ពង្រាយកងទ័ពទៅកាន់កោះ Greenland។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការផ្សាយពី kyivindependent មន្ត្រីរុស្ស៊ីបានបន្ថែមថា ពន្ធគយនេះគឺស្មើនឹង ប្រហែល១ ភាគរយសម្រាប់ទាហានម្នាក់ៗ ដែលត្រូវបានបញ្ជូនទៅ Greenland ដោយអឺរ៉ុប។ ប្រទេសអឺរ៉ុបចំនួន៨បានដាក់ពង្រាយកងទ័ពប្រហែល ៣៧នាក់ទៅកាន់ Greenland ក្នុងកាតព្វកិច្ចប្រចាំការនៅចុងសប្តាហ៍មុន ដើម្បីរៀបចំសម្រាប់វត្តមានយោធារយៈពេលវែងនៅលើកោះមួយនេះ។

លោកបញ្ចាក់ថា សម្ព័ន្ធភាពឆ្លងមហាសមុទ្រអាត្លង់ទិកបានចប់ហើយ ដោយចំអកឲ្យប្រធានគណៈកម្មការអឺរ៉ុបលោកស្រី Ursula von der Leyen កុំញុះញង់ឬបន្ថែមកំហឹងទៅកាន់ប្រធានាធិបតីអាមេរិក ដោយលើកឡើងថា ចលនារបស់អាមេរិកក្នុងការដាក់ពន្ធលើប្រទេសនៅអឺរ៉ុបគឺជាភស្តុតាងនៃ «ការបែកបាក់កាន់តែជ្រៅ» នៅក្នុងសម្ព័ន្ធមិត្តណាតូ។

ប្រធានាធិបតីអាមេរិកពីមុនបានប្រកាសថា ពន្ធ ១០% លើប្រទេសអឺរ៉ុបចំនួន៨នឹងចូលជាធរមានចាប់ពីថ្ងៃទី ១ ខែកុម្ភៈ ហើយនៅថ្ងៃទី ១ខែមិថុនា ពន្ធនឹងត្រូវកើនឡើងដល់ ២៥%។ លោកថា វិធានការនេះនឹងនៅតែមានសុពលភាពរហូតដល់អាមេរិកឈានដល់កិច្ចព្រមព្រៀងមួយដើម្បីទទួលបាន Greenland ទាំងស្រុង ឬពេញលេញ។

មិនតែប៉ុណ្ណោះ ត្រាំនៅតែអះអាងម្តងហើយម្តងទៀតថា លោកត្រូវតែគ្រប់គ្រង Greenland ដែលជាកោះស្វយ័តប្រទេសដាណឺម៉ាក ដោយទុកលទ្ធភាពនៃការប្រើប្រាស់កម្លាំងដើម្បីសម្រេចគោលដៅនេះ។ សេតវិមានក៏បាននិយាយផងដែរថា វត្តមានរបស់កងកម្លាំងអឺរ៉ុបនៅលើកោះ មិនបានប៉ះពាល់ដល់ផែនការរបស់អាមេរិកក្នុងការគ្រប់គ្រងកោះនេះទេ៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

ត្រាំ ប្រកាសយកពន្ធបន្ថែមលើប្រទេសសម្ព័ន្ធមិត្តអឺរ៉ុបចំនួន៨ ព្រោះរារាំងមិនឲ្យអាមេរិក ទិញ Greenland