ព័ត៌មានជាតិ

មីក្រូហិរញ្ញវត្ថុនៅកម្ពុជាលើកលែងបំណុលនិងការប្រាក់ដល់ជនភៀសសឹកនិងទាហានពលី ពិការ របួស សរុបជិត១២លានដុល្លារអាមេរិក

បានផុស

៦ ខែ មុន

នៅ

ថ្ងៃចន្ទ ១៩ មករា ២០២៦

ដោយ

អ្នកនាំពាក្យរាជរដ្ឋាភិបាលកម្ពុជាលោក ប៉ែន បូណា បានឱ្យដឹងថាស្ថាប័នមីក្រូហិរញ្ញវត្ថុនៅកម្ពុជាបានឆ្លើយតបនឹងការអំពាវនាវរបស់នាយករដ្ឋមន្ត្រីកម្ពុជាដោយសម្រេចលុបបំណុលដល់ទាហានពលី របួស ពិការ ក្នុងសង្គ្រាមការពារជាតិប្រមាណជាង១លានដុល្លារ ព្រមទាំងលើកលែងការប្រាក់ដល់ជនភៀសសឹកជាង១០,៦លានដុល្លារអាមេរិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ប៉ែន បូណា បានលើកឡើងក្នុងការធ្វើបច្ចុប្បន្នភាពស្ថានការព្រំដែនកម្ពុជាថៃនៅម៉ោង១១ព្រឹកថ្ងៃទី១៩ ខែមករានេះថាការរួមចំណែករបស់ស្ថាប័នមីក្រូហិរញ្ញវត្ថុនៅកម្ពុជាជាការបង្ហាញនូវការដឹងគុណដល់ការលះបង់របស់កងទ័ពកម្ពុជា ក៏ដូចជាបានជួយសម្រួលជីវភាពរបស់ពលរដ្ឋភៀសសឹកកម្ពុជាផងដែរ។

លោកថា៖ «ថ្នាក់ដឹកនាំនៃយើង និងប្រជាពលរដ្ឋទាំងអស់ចងចាំជានិច្ចនូវវីរភាពដ៏អង់អាចក្លាហានរបស់វីរកងទ័ព វីរកងនគរបាលជាតិ ដែលបានបូជាជីវិតដើម្បីបូរណភាពទឹកដីនិងនាំមកនូវសន្តិភាពជូនជាតិមាតុភូមិ និងប្រជាពលរដ្ឋខ្មែរគ្រប់រូប»។

របាយការណ៍ក្រសួងមហាផ្ទៃឱ្យដឹងថាគិតត្រឹមថ្ងៃទី១៨ ខែមករា ឆ្នាំ២០២៦ មានជនភៀសសឹកប្រមាណ៥សែន១ម៉ឺននាក់បានវិលត្រឡប់ទៅកាន់លំនៅឋានវិញ ខណៈពលរដ្ឋប្រមាណ១៣ម៉ឺននាក់បន្តស្នាក់នៅជំរំភៀសសឹកនៅឡើយ។

ដោយឡែកសម្រាប់គ្រួសារយោធិន ពលី របួស ពិការ ត្រូវបានរដ្ឋាភិបាលយកចិត្តទុកដាក់ជាបន្តបន្ទាប់ដោយក្នុងនោះផ្ដល់ជូននូវអំណោយដើម្បីសម្រួលជីវភាព ផ្ដល់នូវមុខរបរចិញ្ចឹមជីវិត ការផ្ដល់អាហារូបករណ៍ដល់កូនៗឱ្យបានសិក្សាដល់បរិញ្ញាបត្រ រៀបចំឥណទានឡើងវិញ និងដោះស្រាយបំណុល ព្រមទាំងបង្កើតនូវមូលនិធិសម្រាប់ជួយដល់គ្រួសារយុទ្ធជនពលីផងដែរ៕