មន្ទីរជំនាញ និងមន្ត្រីអាជ្ញាធរចុះដោះស្រាយករណីទំនាស់ចែកវេនបញ្ជូនទឹកស្រោចស្រពស្រូវប្រាំងនៅឃុំប្រាសាទ

មន្ទីរជំនាញធនធានទឹក និងឧតុនិយម ខេត្តបន្ទាយមានជ័យ និងអាជ្ញាធរស្រុកព្រះនេត្រព្រះ កាលពីថ្ងៃទី១៩ ខែមករាឆ្នាំ២០២៦ បានចុះសម្របសម្រួល អន្តរាគមន៍ ដោះស្រាយជាមួយមន្ត្រី អ្នកពាក់ព័ន្ធ មេឃុំ មេភូមិទាំង១៤ភូមិតំណាងប្រជាកសិករសហគមន៍ និងសេវាករ ដោយប្រជុំ និងចុះពិនិត្យដោះស្រាយជាក់ស្តែងនៅប៉ែកខាងលិច និងខាងត្បូងឃុំប្រាសាទឈានដល់ការបែងចែកវេននាំទឹកស្រោចស្រពដំណាំស្រូវប្រាំងជូនកសិករនៅឃុំប្រាសាទ ស្រុកព្រះនេត្រព្រះ។

លោក ហឿន វីរ: អភិបាលស្រុកព្រះនេត្រព្រះបានមានប្រសាសន៍ថា គោលបំណងនៃការអន្តរាគមន៍នេះ គឺដើម្បីឲ្យសេវាករទាំង២ បើកទឹក និងបូមទឹកផ្តល់ដល់កសិករដើម្បីស្រោចស្រពស្រូវឲ្យទាន់ពេល និងគ្រប់គ្រាន់លើគោលដៅដែលត្រូវការចាំបាច់ក្នុងចំណោមផ្ទៃដីស្រូវប្រាំងជាង ៤.០០០ហិកតា ក្នុងឃុំប្រាសាទនារដូវបង្កបង្កើនផលនេះ។

លោក ឡាយ សុធី ប្រធានស្តីទីមន្ទីរធនធានទឹកមានប្រសាសន៍ថា មន្ត្រីជំនាញក៏កំពុងសិក្សាលើការជីកប្រឡាយនាំទឹកថ្មីមួយខ្សែប្រវែង ៤ ០០០ម៉ែត្រ ទំហំមាត់លើ៨ម៉ែត្រ ជម្រៅ១, ៥ម៉ែត្រ ដើម្បីនាំទឹកពីប្រឡាយមេ បង្ហូរទៅកាន់ដីស្រែដែលនឹងបង្កបង្កើនផលថ្មី នៅចំណុចព្រំប្រទល់តំបន់១ និងតំបន់២ ម្តុំអាង៧៨ និងអាងដង្កៀបក្តាមដើម្បីស្រោចស្រពផ្ទៃស្រូវប្រាំងប្រមាណ៥ ទៅ៧រយហិកតា។

លោក នឿម ណេត ភាគីសេវាករថ្មីបានប្រាប់ថា ភាគីខ្លួនទើបវិនិយោគលើផ្នែកនេះ ហើយទទួលបានការអនុញ្ញាតពីជំនាញធនធានទឹក និងអាជ្ញាធរ ក៏ដូចការសាទរពីកសិករ។ លោក នឿម ណេត បញ្ជាក់ថា លោកនឹងទទួលបន្ទុកជីកប្រឡាយថ្មី១ខ្សែប្រវែង៤ ០០០ម៉ែត្រផងដែរ។

ចំណែកលោក លាន ប៊ុនឈឹក សេវាករចាស់បានប្រាប់ថា ដោយបានការអនុញ្ញាតច្បាប់ពីក្រសួងធនធានទឹក និងអាជ្ញាធរ លោកបានផ្តួចផ្តើមវិនិយោគអស់ទុនយ៉ាងច្រើនលើសេវានាំទឹកនេះ និងជំរុញឲ្យកសិករធ្វើស្រែប្រាំងនេះដំបូងកាលពីឆ្នាំ២០១៩។ កសិករសហគមន៍ធ្វើស្រែវស្សា និងស្រែប្រាំង ទទួលបានទឹកស្រោចស្រពស្រូវ ហើយផលរបស់វាធ្វើអោយជីវភាពពួកគេប្រសើរឡើងជាលំដាប់។

ចំណែកលោក មាស ប៊ុនហ៊ឹក មេឃុំប្រាសាទមានប្រសាសន៍ថា ទំនាស់ខ្លះៗរវាងសេវាករលោក លាន ប៊ុនឈឹក និងសេវាករ លោក នៀម ណេត មកពីការយល់ច្រឡំលើគ្នា ប៉ុន្តែឥឡូវនេះ ភាគីបានឯកភាពគ្នាចែកវេនម្តង១សប្តាហ៍ម្នាក់ក្នុងការនាំទឹក៕

អត្ថបទ៖ អ ពៅ