ព័ត៌មានអន្ដរជាតិ

ត្រាំ តម្រូវឲ្យបង់ប្រាក់១ប៊ីលានដុល្លារ សម្រាប់សមាជិកនៃក្រុមប្រឹក្សាសន្តិភាព

បានផុស

៦ ខែ មុន

នៅ

ថ្ងៃអង្គារ ២០ មករា ២០២៦

ដោយ

រដ្ឋបាលប្រធានាធិបតី សហរដ្ឋអាមេរិក លោក ដូណាល់ ត្រាំ បានស្នើសុំប្រទេសនីមួយៗឱ្យបង់ប្រាក់ចំនួន១ប៊ីលានដុល្លារ សម្រាប់ក្រុមប្រឹក្សាសន្តិភាពដែលរៀបចំដោយសហរដ្ឋអាមេរិក ដែលមានគោលបំណងដោះស្រាយជម្លោះជាសកល។ នេះបើយោងតាមធម្មនុញ្ញដែលត្រូវបានដាក់ចេញកាលពីថ្ងៃចន្ទនិងរាយការណ៍ដោយភ្នាក់ងារ AFP ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេតវិមានបានស្នើសុំឱ្យមេដឹកនាំនៅបណ្តាប្រទេសផ្សេងៗ មកអង្គុយលើកៅអីក្រុមប្រឹក្សាសន្តិភាព ដើម្បីស្វែងរកដំណោះស្រាយរួមមួយក្នុងការបញ្ចប់សង្គ្រាម ដែលគំនិតនេះគឺជាគំនិតរបស់ លោក ដូណាល់ ត្រាំ ផ្ទាល់តែម្តង។

មិនតែប៉ុណ្ណោះ ក្រុមប្រឹក្សាសន្តិភាពដែលទើបផុសឡើងនេះ ក៏រួមបញ្ចូលការអញ្ជើញមេដឹកនាំ ដែលមិនស្ថិតនៅលើខ្សែស្របជាមួយលោក ត្រាំដែរ ក្នុងនោះក៏មាន លោក វ្ល៉ាឌីមៀរ ពូទីន ប្រធានាធិបតីរុស្ស៊ី លោក Viktor Orban នាយករដ្ឋមន្ត្រីហុងគ្រី និង នាយករដ្ឋមន្រ្តីកាណាដា លោក Mark Carney ជាដើម។

ជាមួយគ្នានេះ ប្រទេសជាសមាជិក ដែលតំណាងនៅក្នុងក្រុមប្រឹក្សាភិបាលដោយប្រមុខរដ្ឋរបស់ពួកគេ ក្នុងធម្មនុញ្ញបានលើកឡើងថា បណ្តាប្រទេសនឹងត្រូវអនុញ្ញាតឱ្យចូលរួមរយៈពេល៣ឆ្នាំ ឬយូរជាងនេះ ប្រសិនបើពួកគេបង់ប្រាក់ច្រើនជាង១ប៊ីលានដុល្លារក្នុងឆ្នាំដំបូង។

សេចក្តីព្រាងធម្មនុញ្ញរបស់ក្រុមប្រឹក្សាភិបាលបាននិយាយថា៖«រដ្ឋដែលជាសមាជិកនីមួយៗត្រូវបម្រើរយៈពេលមិនលើសពីបីឆ្នាំ ចាប់ពីការចូលជាធរមាននៃធម្មនុញ្ញនេះ ដោយត្រូវបន្តជាថ្មីដោយប្រធានក្រុមប៉ុណ្ណោះ»។

ក្នុងសេចក្តីព្រាងបន្តថា៖«អាណត្តិសមាជិកដែលមានរយៈពេលបីឆ្នាំនឹងមិនអនុវត្ត ចំពោះរដ្ឋសមាជិកដែលផ្តល់មូលនិធិជាសាច់ប្រាក់លើសពី ១ប៊ីលានដុល្លារអាមេរិក ដល់ក្រុមប្រឹក្សាសន្តិភាពក្នុងឆ្នាំដំបូងនៃការចូលជាធរមាននៃធម្មនុញ្ញនោះទេ»។

ជាក់ស្តែង ក្រុមប្រឹក្សាសន្តិភាពត្រូវបានបង្កើតឡើងដំបូងដើម្បីត្រួតពិនិត្យលើការស្តារនានានៅតំបន់ហ្គាហ្សាឡើងវិញ ប៉ុន្តែធម្មនុញ្ញរបស់សហរដ្ឋអាមេរិក ហាក់ដូចជាមិនកំណត់ពីតួនាទីរបស់ខ្លួនចំពោះទឹកដីប៉ាឡេស្ទីននោះទេ។

យ៉ាងណា សេតវិមាននឹងចាត់ឱ្យមានក្រុមប្រឹក្សាភិបាលសំខាន់មួយ គណៈកម្មាធិការបច្ចេកទេសប៉ាឡេស្ទីន ដែលមានបំណងគ្រប់គ្រងតំបន់ហ្គាហ្សា និងក្រុមប្រឹក្សាប្រតិបត្តិទីពីរ ដែលហាក់ដូចជាត្រូវបានបង្កើតឡើង ក្នុងតួនាទីដើម្បីប្រឹក្សាបន្ថែមទៀត។

ដោយឡែកក្នុងធម្មនុញ្ញបានសង្កត់ធ្ងន់ថា៖«ក្រុមប្រឹក្សាសន្តិភាពគឺជាអង្គការអន្តរជាតិ មានបំណងស្វែងរកការលើកកម្ពស់ស្ថិរភាព ស្តារអភិបាលកិច្ចដែលអាចទុកចិត្តបាន និងស្របច្បាប់ ជាពិសេសធានាបាននូវសន្តិភាពយូរអង្វែង នៅក្នុងតំបន់ដែលរងផលប៉ះពាល់ ឬគំរាមកំហែងដោយជម្លោះ»៕

ប្រែសម្រួល៖ ណឺ មិនា