កីឡា

អធិជ័យ ច័ន្ទរាជ្យ ក្រុមគ្រួសារបងប្អូនរបស់ខ្លួននៅឯឧត្តរមានជ័យមានផលប៉ះពាល់ខ្លាំងអំឡុងសង្គ្រាមឈ្លានពានរបស់សៀម

បានផុស

៦ ខែ មុន

នៅ

ថ្ងៃអង្គារ ២០ មករា ២០២៦

ដោយ

កីឡាករគុនខ្មែរ អធិជ័យ ច័ន្ទរាជ្យ ថាតាំងពីសង្គ្រាមឈ្លានពានរបស់សៀមមកលើកម្ពុជាគឺក្រុមគ្រួសារ និងបងប្អូនសាច់ញាត្តិរបស់ខ្លួននៅឯខេត្តឧត្តរមានជ័យជួបការលំបាកច្រើនណាស់ បាត់ដី ចោរលួចឥវាន់ និងបាត់បង់ចំណូលជាដើម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាករ អធិជ័យ ច័ន្ទរាជ្យ

សិស្សគុនក្លឹប Cambodian Top Team កីឡាករ អធិជ័យ ច័ន្ទរាជ្យ បានឲ្យដឹងថា បច្ចុប្បន្នស្ថានភាពនៅឯភូមិរបស់ខ្លួនឯខេត្តឧត្ដរមានជ័យ នោះគឺមានភ្លើងប្រើប្រាស់ ប៉ុន្តែអត់ទាន់មានទឹកនៅឡើយទេ។ បងប្អូនរបស់ខ្លួន និងប្រជាជនមួយចំនួនបានចាកចេញ ឬរើរួសមកនៅប៉ែកខាងក្រោមៗឆា្ងយពីព្រំដែនហើយដើម្បីប្រកបរបររកស៊ីចិញ្ចឹមជីវិតឡើងវិញ។

កីឡាករ អធិជ័យ ច័ន្ទរាជ្យ

អំឡុងសង្គ្រាមឈ្លានពាននេះក្រុមគ្រួសារ និងសាច់ញាត្តិរបស់ខ្លួនជួបការលំបាកជាច្រើនដូចជា បាត់សម្ភារប្រើប្រាស់ផ្សេងៗ ម៉ូតូ កង់ គ្រឿងប្រើប្រាស់ក្នុងផ្ទះ គ្រឿងជួសជុលឡាន និងឥវាន់សម្រាប់លក់ដូរជាច្រើនផងដែរ។ ផលប៉ះពាល់ទៀតនោះគឺអ្នកមួយចំនួនបាត់បង់ដីចម្ការដោយសៀមព័ន្ធយក និងដីមួយចំនួនទៀតមិនអាចចូលធ្វើចម្ការបានដូចមុនព្រោះបន្លាលួសជាប់ព្រំដីតែម្ដង។ លើសពីនេះផ្ទះសម្បែងត្រូវខូចខាត និងមិនអាចវិលត្រឡប់ទៅរស់នៅវិញបានដោយបន្តនៅភៀសសឹក។

ទិដ្ឋភាពគ្រួសារ អធិជ័យ ច័ន្ទរាជ្យ ប្រមូលផលស្វាយ

កូនសិស្សលោក ហ៊ុន ច័ន្ទរាជ្យ រូបនេះបន្ថែមទៀតថា ផលប៉ះពាល់ធំមួយទៀតនោះគឺខាតបង់ផលដំណាំដែលកំពុងធ្វើដោយប្រមូលផលបានខ្លះ និងខ្លះទៀតមិនអាចប្រមូលផលតែម្ដង។ ការបាត់បង់ប្រាក់ចំណូលដោយសារតែការភៀសខ្លួនរកកន្លែងសុវត្ថិភាពផង និងការបាត់បង់របររកស៊ីមិនអាចបន្តបាន ស្របពេលការចំណាយមានច្រើនដោយពុំមានចំណូលមកវិញ។

បន្លាលួសជាប់ដីចម្ការរបស់ អធិជ័យ ច័ន្ទរាជ្យ

បញ្ជាក់ដែរថា កីឡាករ អធិជ័យ ច័ន្ទរាជ្យ មានក្រុមគ្រួសាររស់នៅឯភូមិរួតចំប៉ី សង្កាត់អូរស្មាច់ ក្រុងសំរោង ខេត្តឧត្តរមានជ័យ។ ផ្ទះរបស់កីឡាកររូបនេះនៅចម្ងាយប្រហែល ៤-៥គីឡូម៉ែត្រពីព្រំដែនប៉ុណ្ណោះ។ អំឡុងសង្គ្រាមឈ្លានពានរបស់សៀមមកលើកម្ពុជាកន្លងទៅនេះធ្វើឲ្យគេមានការបារម្ភពីគ្រួសារជាខ្លាំង និងពុំមានអារម្មណ៍ហ្វឹកហាត់នោះឡើយ៕