ឆ្នេរសមុទ្រស៊ីដនីត្រូវបិទ បន្ទាប់ពីមានករណីត្រី​ឆ្លាមខាំផ្ទួនៗគ្នា

អាជ្ញាធរបានបញ្ជា​ឲ្យ​បិទឆ្នេរសមុទ្រភាគខាងជើងទាំងអស់ ក្នុងទីក្រុងស៊ីដនី នៃ​ប្រទេស​អូស្ត្រាលី ដោយគ្មានកាលកំណត់ បន្ទាប់ពីមានករណីត្រី​ឆ្លាមខាំជាលើកទី៣ ក្នុងរយៈពេលត្រឹមតែជាង ២៤ម៉ោង ដែលបានបណ្តាល​ឲ្យ​អ្នកជិះក្តារស្គី​លើ​ទឹក​ម្នាក់ស្ថិតក្នុងស្ថានភាពគ្រោះថ្នាក់ដល់ជីវិត។

យោង​តាម​រ៉យទ័រ ហេតុការណ៍ចុងក្រោយនេះបានកើតឡើងកាលពីល្ងាចថ្ងៃចន្ទ​ទី​១៩​ខែ​មករា​ឆ្នាំ​២០២៦ នៅឆ្នេរ North Steyne ក្នុងតំបន់ Manly ជាកន្លែងដែលបុរសម្នាក់វ័យខ្ទង់២០ឆ្នាំ បានរងរបួសជើងយ៉ាងធ្ងន់ធ្ងរ ខណៈកំពុងជិះក្តារស្គី។ ជនរងគ្រោះត្រូវបានគេរាយការណ៍ថាបានគាំងបេះដូងនៅលើឆ្នេរ ប៉ុន្តែត្រូវបានសង្គ្រោះ​ឲ្យ​ដឹងខ្លួនឡើងវិញដោយក្រុមសង្គ្រោះបឋម មុនពេលបញ្ជូនទៅកាន់មន្ទីរពេទ្យ Royal North Shore។

ការកើនឡើងនៃសកម្មភាពត្រី​ឆ្លាម ត្រូវបានគេសន្និដ្ឋានថាបណ្តាលមកពីលក្ខខណ្ឌបរិស្ថានមិនអំណោយផល។ ភ្លៀងធ្លាក់ខ្លាំងនាពេលថ្មីៗនេះ បាននាំយកដីល្បាប់ និងកម្ទេចកម្ទីយ៉ាងច្រើនចូលទៅក្នុងទឹកសមុទ្រ និងតំបន់កំពង់ផែ ដែលបង្កើត​ឲ្យ​មានទឹកល្អក់ និងទឹកសាប​លាយ​ឡំ​ជាមួយ​ទឹក​ប្រៃ ដែលជាលក្ខខណ្ឌអំណោយផលបំផុតសម្រាប់​ប្រភេទ​ឆ្លាម bull shark ដែលជាប្រភេទឆ្លាមសង្ស័យក្នុងករណីទាំងនេះ។ អ្នកជំនាញបានកត់សម្គាល់ថា ត្រី​ឆ្លាម​ទាំងនេះងាយនឹងរកចំណីនៅក្បែរឆ្នេរ នៅពេលដែលភាពថ្លានៃទឹកមានកម្រិតទាប។ អង្គការសង្គ្រោះជីវិតលើទឹក (Surf Life Saving NSW) បានព្រមានសាធារណជន​ឲ្យ​នៅ​ឲ្យ​ឆ្ងាយពីទឹកសមុទ្រ ដោយបញ្ជាក់ថា គុណភាពទឹកនាពេលបច្ចុប្បន្នធ្វើ​ឲ្យ​ឆ្នេរសមុទ្រ «មិនមានសុវត្ថិភាព​នោះ​ទេ»។

ករណីនៅតំបន់ Manly នេះ បានកើតឡើងបន្ទាប់ពីហេតុការណ៍គួរ​ឲ្យរន្ធត់ចំនួន២​ទៀតនៅលើឆ្នេរដដែល។ កាលពីព្រឹកថ្ងៃចន្ទ ក្មេងប្រុសអាយុ១១ឆ្នាំម្នាក់បានរួចផុតពីរបួសនៅឆ្នេរ Dee Why បន្ទាប់ពីឆ្លាមបានខាំដាច់ក្តារស្គី​របស់គេអស់មួយដុំធំ។ ចំណែកកាលពីថ្ងៃអាទិត្យ ក្មេងប្រុសអាយុ១២​ឆ្នាំម្នាក់ផ្សេងទៀត បាន​ប្រយុទ្ធជាមួយសេចក្តីស្លាប់ បន្ទាប់ពីរងការខាំយ៉ាងសាហាវ ខណៈពេលកំពុងលោតទឹកលេងក្នុងកំពង់ផែស៊ីដនី។ ដោយមានជនរងគ្រោះ២​នាក់កំពុងស្ថិតក្នុងស្ថានភាពធ្ងន់ធ្ងរ ប៉ូលិសរដ្ឋ និងក្រុមប្រឹក្សាមូលដ្ឋានកំពុងបន្តបិទឆ្នេរយ៉ាងតឹងរ៉ឹង និងប្រើប្រាស់ដ្រូន ដើម្បីតាមដានចលនារបស់​ត្រី​ឆ្លាម ខណៈរង់ចាំទឹកសមុទ្រមានសភាពថ្លាឡើងវិញ៕

ប្រែសម្រួល៖ ឈាង