ព្រះបរមរាជវាំង នឹងបើកទទួលភ្ញៀវទេសចរជាតិ-អន្តរជាតិ ឡើងវិញនៅដើមខែក្រោយនេះ

ព្រះបរមរាជវាំង នឹងបើកទទួលភ្ញៀវទេសចរជាតិ និងអន្តរជាតិ ឱ្យចូលទស្សនាឡើងវិញ ចាប់ពីថ្ងៃទី០១ ខែធ្នូ ឆ្នាំ២០២២ ខាងមុខ។ នេះបើយោងតាមលិខិត ឧបនាយករដ្ឋមន្ត្រី និងជារដ្ឋមន្ត្រីក្រសួងព្រះបរមរាជវាំង ជម្រាបជូន ឯកឧត្តម ថោង ខុន រដ្ឋមន្ត្រីក្រសួងទេសចរណ៍។

ក្រសួងព្រះបរមរាជវាំង នឹងបើកឱ្យដំណើរការឡើងវិញ សម្រាប់ទទួលភ្ញៀវទេសចរជាតិ-អន្តរជាតិ បានចូលទស្សនា ព្រះបរមរាជវាំង នៅដើមខែក្រោយនេះ បន្ទាប់ពីផ្អាក​ការចូលទស្សនាជាង ១ឆ្នាំ ដោយសារវិបត្តិជំងឺកូវីដ១៩ ពោល​គឺចាប់តាំង​ពីពាក់កណ្តាល ខែមីនា ឆ្នាំ២០២១ ។

គួរបញ្ជាក់ថា​ សេចក្តីសម្រេចឱ្យបើកដំណើរការឡើងវិញនេះ ដោយយោងតាមព្រះរាជតម្រិះដ៏ខ្ពង់ខ្ពស់បំផុតរបស់ ព្រះកុរណាជាអង្គម្ចាស់ជីវិតលើត្បូង និងសម្តេចព្រះមហាក្សត្រីយានី ព្រះវររាជមាតាជាតិខ្មែរ ជាទីគោរពសក្ការៈដ៏ខ្ពង់ខ្ពស់បំផុត និងតាមលិខិតលេខ ១០៥ លស.អអទ ចុះថ្ងៃទី០២ ខែវិច្ឋិកា ឆ្នាំ២០២២ របស់ក្រសួងទេសចរណ៍៕