ព័ត៍មានទាន់​ហេតុការណ៏
Search

១០​ឆ្នាំ​ រាជរដ្ឋាភិបាល​ចំណាយជាង​១២​ពាន់​លាន​ដុល្លារ​វិនិយោគ​លើ​ការ​បណ្ដុះបណ្ដាល​វិជ្ជាជីវៈ និង​ហេដ្ឋារចនាសម្ព័ន្ធ​​

ភ្នំពេញ ​៖ ក្នុង​ពិធី​សម្ពោធ​ពិព័រណ៍​ពាណិជ្ជកម្ម និង​ទេសចរណ៍​ខេត្ត​កែប នៅ​សាលាខេត្ត​កែប កាលពី​ថ្ងៃទី​៣០ ខែធ្នូ ឆ្នាំ​២០១៦​នេះ លោក ប៉ាន សូរ​ស័ក្តិ រដ្ឋមន្ត្រី​ក្រសួង​ពាណិជ្ជកម្ម បាន​ថ្លែង​ថា រយះ​១០​ឆ្នាំ ​រាជរដ្ឋាភិបាល​ចំណាយ ជាង​១២​ពាន់​លាន​ដុល្លារ​វិនិយោគ​លើ​ការ​បណ្ដុះបណ្ដាល​វិជ្ជាជីវៈ និង​ហេដ្ឋារចនាសម្ព័ន្ធ​សំដៅ​ធ្វើ​ឲ្យ​ប្រសើរឡើង​នូវ​សមត្ថភាព​ប្រកួតប្រជែង​របស់​កម្ពុជា ដើម្បី​ធ្វើ​សមា​ហរ​ណកម្ម​ចង្វាក់​ផលិតកម្ម និង​ឧស្សាហកម្ម​ទៅក្នុង​តំបន់ និង​លើ​ពិភពលោក​។​

លោក​រដ្ឋមន្ត្រី បាន​ថ្លែងបន្ត ដោយបាន​ហៅ​ពិព័រណ៍​នេះ​ថា​ ជា​វេទិកា​ដ៏​ល្អ សម្រាប់​ពាណិជ្ជករ​ក្នុង​ខេត្ត ធ្វើការ​សិក្សា​ស្វែងយល់ និង​ផ្លាស់ប្ដូរ​គំនិត​គ្នា​ទៅវិញទៅមក ដើម្បី​ចាប់​ដៃគូ​ពាណិជ្ជកម្ម សំដៅ​ផ្គត់ផ្គង់​ទីផ្សារ​ក្នុងស្រុក និង​នាំចេញ​នា​ពេល​អនាគត​។

«​ខ្ញុំ​ជឿថា ពិព័រណ៍​នេះ នឹង​ជំរុញ​ការ​នាំ​កសិផល និង​ផលិតផល​ពី​ខេត្ត​កែប ទៅ​បណ្ដា​ខេត្ត​-​ក្រុង​ដទៃ​ទៀត​ក្នុង​ព្រះរាជាណាចក្រ​កម្ពុជា​» «​លទ្ធផល​សំខាន់​មួយ​ដែល​ខ្ញុំ​ចង់បាន​ពី​ពិព័រណ៍​ពាណិជ្ជកម្ម និង​ទេសចរណ៍​ខេត្ត​កែប​ឆ្នាំនេះ គឺ​ការ​ចុះកិច្ចសន្យា​ទិញ​-​លក់ និង​ការនាំចេញ​-​ចូល​រវាង​ក្រុមហ៊ុន​កម្ពុជា និង​ក្រុមហ៊ុន​បរទេស​» ឯកឧត្ដម​រដ្ឋមន្ត្រី​បាន​គូស​បញ្ជាក់​។​

លោក ប៉ាន សូរ​ស័ក្តិ ក៏បាន​ជម្រាបជូន​អង្គ​ពិធី​អំពី​គោលនយោបាយ​អភិវឌ្ឍន៍​ឧស្សាហកម្ម​របស់​រាជ​រដ្ឋាភិបាល ដែល​តម្រូវ​ឲ្យ​មានការ​វិនិយោគ​លើ​ការ​បណ្ដុះបណ្ដាល​វិជ្ជាជីវៈ និង​ហេដ្ឋារចនាសម្ព័ន្ធ​ក្នុង​ទំហំ​ទឹកប្រាក់​ជាង​១២​ពាន់​លាន​ដុល្លារ សម្រាប់​រយៈពេល​១០​ឆ្នាំ សំដៅ​ធ្វើ​ឲ្យ​ប្រសើរ​ឡើង​នូវ​សមត្ថភាព​ប្រកួតប្រជែង​របស់​កម្ពុជា ដើម្បី​ធ្វើ​សមាហរណកម្ម​ចង្វាក់​ផលិតកម្ម និង​ឧស្សាហកម្ម​ទៅ​ក្នុង​តំបន់ និង​លើ​ពិភពលោក​។​

សូមបញ្ជាក់ថា ពិព័រណ៍​ពាណិជ្ជកម្ម និង​ទេសចរណ៍​ខេត្ត​កែប នឹង​ប្រារព្ធ​ឡើង​ក្នុង​រយៈពេល​បី​ថ្ងៃ គឺ​ចាប់​ពីថ្ងៃ​២៩ ដល់​ថ្ងៃទី​៣១ ខែធ្នូ ឆ្នាំ​២០១៦ នៅក្នុង​បរិវេណ​សាលាខេត្ត​កែប​។

ពិព័រណ៍​នេះ មាន​ដាក់តាំង​បង្ហាញ​ផលិតផល​ក្នុងស្រុក និង​ទំនិញ​នាំចូល​ពី​ប្រទេស​ថៃ​សរុប​ចំនួន​៨០​ស្តង់ និង​មានការ​ប្រគំ​តន្ត្រី​ក្នុង​ពេល​រាត្រី​៕