ព័ត៍មានទាន់​ហេតុការណ៏
Search

ភ្លើង​ប្រច័ណ្ឌ បាន​ធ្វើ​ឲ្យ​បុរស​ម្នាក់​ និង​នារី​ម្នា​ក់ រង​ការវាយប្រហារ​ដោយ​អាស៊ីត​

ភ្នំពេញ ៖ បុរស​ម្នាក់ ​និង​នារី​ម្នាក់​ បាន​រង​របួស​ធ្ងន់ធ្ងរ ដោយសារ​នារី​ផ្សេងទៀត​បាន​ប្រើ​ទឹក​អាស៊ីត​វាយ​ប្រហារ​ជះ​លើ​ផ្ទៃមុខ​ និង​ដងខ្លួន​ ដែល​ត្រូវគេ​សង្ស័យថា អាចជា​រឿង​ស្នេហា​ត្រីកោណ ហើយ​ក៏​ត្រូវ​បាន​សមត្ថកិច្ច​ឃាត់ខ្លួន​ជន​ដៃដល់​បាន​ភ្លាមៗផងដែរ​។​

​ការវាយប្រហារ​​នេះ​ បាន​កើតឡើងកាលពី​វេលា​ម៉ោង​៤​និង​៤៥​នាទី​ល្ងាច នា​ថ្ងៃទី​០២ ខែ​មករា ឆ្នាំ​២០១៧ នៅតាម​ផ្លូវ​បេតុង ក្នុង​ភូមិ​ត្រពាំង​ស្វាយ សង្កាត់​ភ្នំពេញ​ថ្មី ខណ្ឌ​សែន​សុខ​។​

​ជនរងគ្រោះ​ទាំង​២​នាក់​ខាងលើ ទី​១/​ឈ្មោះ គា សំណាង ភេទ​ប្រុស អាយុ​២២​ឆ្នាំ មុខរបរ​ជាងដែក​ស្នាក់នៅ​ផ្ទះជួល​ភូមិ​ទួល​សង្កែ សង្កាត់​ទួល​សង្កែ ​ខណ្ឌ​ឫស្សីកែវ​។​

ទី​២/​ឈ្មោះ សាន សុខា ភេទ​ស្រី អាយុ​១៨​ឆ្នាំ ជា​សិស្សសាលា​វិចិត្រសិល្បៈ មាន​ទីលំនៅ​ក្នុង​សង្កាត់​ទួល​សង្កែ ខណ្ឌ​ឫស្សីកែវ។ ចំណែកឯ​ជនសង្ស័យ​ដៃដល់​ត្រូវបាន​ឃាត់ខ្លួន ឈ្មោះ ប៉ាច ចាន់​សេរីរដ្ឋ ភេទ​ស្រី អាយុ​២៥​ឆ្នាំ មុខ​របរ​នៅផ្ទះ អាសយដ្ឋាន​ស្នាក់នៅ​ផ្ទះជួល ភូមិ​/​សង្កាត់​ទួល​សង្កែ ខណ្ឌ​ឫស្សី​កែវ។​

​តាម​សមត្ថកិច្ច​បាន​ឲ្យ​ដឹងថា នៅ​មុនពេល​កើតហេតុ ជនសង្ស័យ ឈ្មោះ ប៉ាច ចាន់​សេរីរដ្ឋ ធ្លាប់​មាន​ទំនាក់ទំនង​ស្នេហា​ជាមួយ​ជនរងគ្រោះ ឈ្មោះ គា សំណាង ភេទ​ប្រុស អាយុ​២២​ឆ្នាំ តែ​ក្រោយមក ជន​រងគ្រោះ គា សំណាង បាន​ទៅ​ភ្ជាប់​ពាក្យ​ជាមួយ​នារី​ម្នាក់ទៀត ដែលជា​ជនរងគ្រោះ​ដែរនោះ​មាន​ឈ្មោះ សាន សុខា ភេទ​ស្រី អាយុ​១៨​ឆ្នាំ ជា​សិស្សសាលា​វិចិត្រសិល្បៈខាងលើ។

​ប្រភព​ដដែល​បាន​បញ្ជាក់ថា នៅ​ថ្ងៃកើតហេតុ​ខាងលើ ជនសង្ស័យ​បាន​ជិះ​ម៉ូតូឌុប​ចេញពី​ផ្ទះជួល ក្នុង​គោលបំណង​ទៅ​ជួប​ជនរងគ្រោះ គា សំណាង នៅ​ខណ្ឌ​ព្រែក​ព្នៅ លុះ​ពេលមកដល់​ជនសង្ស័យ​បាន​ជួប​ជាមួយ​ជនរងគ្រោះ គា សំណាង និង​សាន សុខា ដូច​បំណង​។ ពេលនោះ​ជនសង្ស័យ បាន​ឲ្យ​ជនរងគ្រោះ​ទាំងពីរ​នាក់​ជិះ​ម៉ូតូឌុប​ជូន​នាង​ទៅផ្ទះ​ជួល​វិញ លុះដល់​ចំណុចកើតហេតុ ជនសង្ស័យ​ក៏បាន​ដក​ដប​អាស៊ីតពី​កាបូបស្ពាយ ហើយ​ជះ​ទៅលើ​ជនរងគ្រោះ​ទាំង​២​បណ្ដាល​ឲ្យ​របួសធ្ងន់ ដោយ​ជនរងគ្រោះ គា សំណាង របួស​ថ្ងាស ទ្រូង និង​ដៃ​ខាងឆ្វេង រីឯ​ជនរងគ្រោះ សាន សុខា រងរបួស​ពេញ​ផ្ទៃមុខ និង​ទ្រូង។ បន្ទាប់មក​ជនរងគ្រោះ​ទាំងពីរ​ត្រូវបាន​ដឹកបញ្ជូន​ទៅកាន់​មន្ទីរពេទ្យ​ព្រះកុសមៈ ដើម្បី​សង្គ្រោះ​បន្ទាន់​។​

​នៅ​ចំពោះមុខ​សមត្ថកិច្ច​ ជនសង្ស័យ​បាន​ឆ្លើយ​សារភាពថា មូលហេតុ​ដែលនាំឲ្យ​នាង​យក​អាស៊ីតមក​ជះ​ទៅលើ​ជនរងគ្រោះ​ទាំង​២​នាក់​ខាងលើនេះ​ ព្រោះតែ​នាង​ខឹង​នឹង​សង្សារ​របស់ខ្លួន​ ឈ្មោះ គា សំណាង ជា​ជនរងគ្រោះ ទៅ​ភ្ជាប់​ពាក្យ​ជាមួយនឹង​ស្រី​ផ្សេង​។​

​ក្រោយពី​ដឹង​អត្តសញ្ញាណ​ជនដៃដល់ កម្លាំង​នគរបាល​រដ្ឋបាល​ប៉ុស្តិ៍សង្កាត់​ភ្នំ​ពេញ​ថ្មី ក៏បាន​តាម​ឃាត់​ខ្លួន​ជនសង្ស័យ​ឈ្មោះ ប៉ាច ចាន់​សេរីរដ្ឋ មក​សាកសួរ​នៅ​អធិការដ្ឋាន​នគរបាល​ខណ្ឌ​សែន​សុខ ដើម្បី​កសាង​សំណុំរឿង​ចាត់ការ​ទៅតាម​ផ្លូវច្បាប់​៕

 



ប្រសិនបើ លោក លោកស្រីចង់ចែករំលែកនូវព័ត៌មានទាន់ហេតុការណ៍ផ្សេងៗ សូមផ្ញើ អ៊ីម៉ែលមកកាន់អាសយដ្ឋានដូចដែលបានបង្ហាញខាងក្រោម។ សម្រាប់ការផ្សាយពាណិជ្ជកម្មលើគេហទំព័រនេះ សូមទំនាក់ទំនងតាមលេខទូរស័ព្ទៈ 012 454 575 និង 012 499 114