Connect with us

ព័ត៌មានជាតិ

មន្ត្រីជាន់ខ្ពស់សុខាភិបាល៖ ការប្រកបវិជ្ជាជីវៈជាគ្រូពេទ្យ មិនមែនជាការធ្វើជំនួញរកស៊ីទេ

បានផុស

នៅ

លោកសាស្ត្រាចារ្យ ធា គ្រុយ រដ្ឋលេខាធិការក្រសួងសុខាភិបាល មានប្រសាសន៍ថា ការប្រកបវិជ្ជាជីវៈជាគ្រូពេទ្យគឺជាករណីកិច្ចមិនមែនចង់ធ្វើ ហើយធ្វើបាននោះទេ ហើយក៏មិនមែនជាការធ្វើជំនួញរកស៊ីនោះដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងឱកាសបើកបវេសនកាលឆ្នាំសិក្សា២០២២-២០២៣ របស់សាកលវិទ្យាល័យវិទ្យាសាស្ត្រសុខាភិបាល នៅថ្ងៃទី៤ ខែមេសានេះ លោកសាស្ត្រាចារ្យមានប្រសាសន៍បន្តថា គ្រូពេទ្យមិនអាចប្រើពាក្យថារកស៊ីនោះទេ ព្រោះថាជាការប្រកបវិជ្ជាជីវៈបែបករណីកិច្ច មិនមែនចង់ធ្វើធ្វើបាននោះដែរ គឺតម្រូវឱ្យមានលក្ខខណ្ឌត្រឹមត្រូវនិងច្បាស់លាស់។ ទោះបីជាមិនចង់ធ្វើ ក៏ត្រូវតែធ្វើ ទោះជាមានការហត់នឿយ ឬមានភារកិច្ចចាំបាច់ណាក៏ដោយ ក៏ត្រូវតែធ្វើឱ្យបានត្រឹមត្រូវដែរ ប្រៀបដូចជាម្តាយមើលថែទាំកូន។

លោកសាស្ត្រាចារ្យបានបន្តទៀតថា៖ “អីចឹងអស់លោកជាគ្រូពេទ្យគឺជាអ្នកប្រកបវិជ្ជាជីវៈបែបករណីកិច្ច សំដៅមុនគេគឺកង្វល់របស់ខ្លួនជាពេទ្យដើម្បីសុខភាពអ្នកជំងឺដែលមកទទួលសេវាពីយើង។ អីចឹងប្រយោជន៍ដែលយើងផ្តល់គឺមិនមែនផ្តល់ខ្លួនឯងមុនទេ គឺផ្តល់អ្នកមកទទួលសេវាពីយើងមុន។ បើកាលណាយើងផ្តល់សេវាដល់យើងមុន គេហៅថា រកស៊ី ហើយប្រែទៅជាឈ្មួញ។ ដូចនេះពេទ្យយើងមិនមែនដូចពួកឈ្មួញទេ គឺជាអ្នកប្រកបវិជ្ជាជូវៈបែបករណីកិច្ចដែលមានទំនួលខុសត្រូវខ្ពស់”។

លោកសាស្ត្រាចារ្យបានពន្យល់បន្ថែមថា ពេទ្យឆ្មប គិលានុបដ្ឋាក ពេទ្យធ្មេញ និងវេជ្ជបណ្ឌិត សុទ្ធតែជាអ្នកទទួលខុសត្រូវខ្ពស់ណាស់ ព្រោះថាអ្វីៗដែលបានផ្តល់ដល់អ្នកជំងឺ ពាក់ព័ន្ធនឹងសុខភាពរហូតដល់គ្រោះថ្នាក់ដល់អាយុជីវិត ប្រសិនបើមានការធ្វេសប្រហែស។

លោកសាស្ត្រាចារ្យបានឱ្យដឹងទៀតថា៖ “នៅពេលដែលកង្វល់របស់អ្នកជំងឺក្លាយជាកង្វល់របស់គ្រូពេទ្យគ្រូពេទ្យ នោះជាគ្រូពេទ្យដ៏ល្អធ្វើឱ្យអ្នកជំងឺមានភាពកក់ក្តៅបើទោះបីជាអ្នកជំងឺបាត់បង់សមាជិកគ្រួសារ ឬសាច់ញាតិរបស់ខ្លួនក៏ដោយ ក៏អ្នកជំងឺអរគុណដល់គ្រូពេទ្យដែរ ដោយសារគ្រូពេទ្យបានខិតខំព្យាយាមជួយសង្គ្រោះអស់ពីសមត្ថភាពហើយ តែមិនអាចសង្គ្រោះបាន មកពីស្ថានភាពជំងឺធ្ងន់ធ្ងរពេក”។

លោកសាស្ត្រាចារ្យបានណែនាំដល់និស្សិតពេទ្យត្រូវខិតខំប្រឹងប្រែងសិក្សារៀនសូត្រ ពិសេសពេលសាលាបញ្ជួនទៅធ្វើកម្មសិក្សានៅតាមមន្ទីរពេទ្យនានា។ ការសិក្សាផ្ទាល់នៅតាមមន្ទីរពេទ្យមានសារៈសំខាន់ណាស់ និងជាឱកាសមាសសម្រាប់ពេលបញ្ចប់ពីការសិក្សាចេញទៅបម្រើការងារ ព្រោះថាបើយើងមិនអាចអនុវត្តបានល្អនៅពេលចុះកម្មសិក្សាទេ យើងមិនអាចអនុវត្តការងារបានល្អដែរ ហើយពេលចង់ត្រឡប់ទៅសិក្សាម្តងទៀត គេក៏មិនអនុញ្ញាតដែរ។

លោកសាស្ត្រាចារ្យ សាផុន វឌ្ឍនៈ ទីប្រឹក្សាក្រសួងសុខាភិបាល និងជាសាកលវិទ្យាធិការ នៃសាកលវិទ្យាល័យវិទ្យាសាស្ត្រសុខាភិបាល បានគាំទ្រ និងបានលើកទឹកចិត្តដល់និស្សិតពេទ្យបន្តគោរពវិន័យបទបញ្ជាផ្ទៃក្នុងរបស់សាកលវិទ្យាល័យឱ្យកាន់តែប្រសើរឡើងថែមទៀត ដើម្បីចូលរួមលើកម្ពស់គុណភាព នៃការរៀន និងបង្រៀនផងក៏ដូចជាដើម្បីឱ្យប្អូនៗអាចក្លាយជាអ្នកប្រកបវិជ្ជាជីវៈសុខាភិបាលដ៏ល្អ ប្រកបដោយសីលធម៌ និងគុណធម៌ប្រពៃនាពេលអនាគត៕

អត្ថបទ៖ សំអឿន

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម