ព័ត៍មានទាន់​ហេតុការណ៏
Search

ប្រធានាធិបតី​តៃវ៉ាន់​ ឆ្ពោះ​ដំណើរ​ទៅ​អាមេរិក​ ខណៈ​ក្រុង​ប៉េកាំង​តាមដាន​មើល​យ៉ាង​ដិតដល់​

ប្រធានាធិបតី​កោះ​តៃវ៉ាន់​ លោកស្រី Tsai Ing-wen នៅ​ថ្ងៃ​សៅរ៍​ បានចេញ​ដំណើរ​ទៅ​សហរដ្ឋអាមេរិក​ហើយ​បន្តដំណើរ​ទៅ​តំបន់​អាមេរិក​កណ្តាល​ដែលជា​ដំណើរ​មួយ​ នឹង​ត្រូវបាន​តាមដាន​មើល​យ៉ាង​ដិត​ដល់​ដោយ​រដ្ឋាភិបាល​ទីក្រុង​ប៉េកាំង​ដែល​ខឹងសំបារ​ដោយសារតែ​ការនិយាយ​ទូរស័ព្ទ​អបអរ​សាទរ​របស់លោក​ស្រី​ជាមួយ​លោក Donald Trump។​

​ខណៈ​មានការ​ផ្តោតអារម្មណ៍​លើ​ដំណើរ​ទស្សនកិច្ច​រយៈពេល​ប្រាំបួន​ថ្ងៃ​ទៅ​ប្រទេស​សម្ព័ន្ធមិត្ត​របស់​តៃវ៉ាន់​នៅ​អាមេរិក​កណ្តាល​នោះ ការឈប់​សំចត​របស់​លោកស្រី Tsai ក្នុង​ទីក្រុង Houston នៅ​ចុង​សប្ដាហ៍​នេះ ​និង​នៅ San Francisco នៅ​ចុង​សប្ដាហ៍​ក្រោយ ​នឹង​ក្លាយ​ជាការ​ពិនិត្យពិច័យ​ ខណៈ​ភាព​តានតឹង​ឆ្លងកាត់​ច្រក​សមុទ្រ​បាន​កើន​ឡើង​។​

​ការសន្ទនា​របស់​លោក​ស្រី Tsai ជាមួយ​លោក Trump កាលពី​ខែ​ធ្នូ​ បន្ទាប់ពី​លោក​បាន​ឈ្នះ​តំណែង​ប្រធានាធិបតី ​គឺ​បានធ្វើ​ឲ្យ​ប្រទេស​ចិន​មានការ​ខឹងសម្បា​យ៉ាង​ខ្លាំង​។​

​រដ្ឋាភិបាល​ទីក្រុង​ប៉េកាំង ​បានស្នើ​ឲ្យ​ក្រុង​វ៉ាស៊ីនតោន​រារាំង​ លោកស្រី Tsai ពី​ការហោះហើរ​តាមរយៈ​ដែនអាកាស​របស់​សហរដ្ឋអាមេរិក​។​

​ទោះបីជា​យ៉ាងណាក៏ដោយ លោក Trump ហាក់ដូចជា​សម្រេច​ចេញ​ច្រានចោល​កិច្ចប្រជុំ​ជាមួយ​លោក​ស្រី Tsai អំឡុង​ដំណើរ​នេះ​ដោយ​និយាយថា វា​គឺជា​ការ​មិន​សមរម្យ​ដើម្បី​ជួប​នរណា​ម្នាក់​រហូត​ដល់​គាត់​ចូលកាន់​តំណែង​នៅ​ថ្ងៃទី​២០​ ខែមករា​។​

​ស្របពេល​ជាមួយគ្នា​នោះ ការិយាល័យ​ប្រធានាធិបតី​របស់​តៃវ៉ាន់​បាន​បដិសេធ​ផ្តល់​សេចក្តីលម្អិត​អំពី​កម្មវិធី​របស់​លោក​ស្រី Tsai អំឡុង​ពេល​ស្នាក់នៅ​សហរដ្ឋអាមេរិក​។​

​អ្នកវិភាគ​នយោបាយ Liao Da-chi បាន​ប្រាប់ AFP ថា “​អ្វីដែល​ប្រទេស​ចិន​យក​ចិត្ត​ទុកដាក់​បំផុត​នោះ​គឺថា​ តើ​លោកស្រី Tsai និង​លោក Trump នឹង​ជួបគ្នា​ដែរ​ឬក៏​អត់​”​។​

​គួរ​បញ្ជាក់ថា លោកស្រី Tsai នឹងធ្វើ​ទស្សនកិច្ច​ប្រទេស​ហុង​ឌូ​រ៉ា នី​កា​រ៉ា​ហ្គួ ហ្គា​តេ​ម៉ា​ឡា និង អែល​សាល់​វ៉ា​ឌ័​រ​។

លោកស្រី​ នឹងចូលរួម​ពិធី​ចូលកាន់​តំណែង​ប្រធានាធិបតី​ក្នុងប្រទេស​នី​កា​រ៉ា​ហ្គួ​ នៅ​ថ្ងៃ​អង្គារ​ និង​ជួប​ជា​មួយ​ប្រមុខរដ្ឋ​ នៃ​ប្រទេស​ចំនួន​បី​ផ្សេងទៀត​៕

 



ប្រសិនបើ លោក លោកស្រីចង់ចែករំលែកនូវព័ត៌មានទាន់ហេតុការណ៍ផ្សេងៗ សូមផ្ញើ អ៊ីម៉ែលមកកាន់អាសយដ្ឋានដូចដែលបានបង្ហាញខាងក្រោម។ សម្រាប់ការផ្សាយពាណិជ្ជកម្មលើគេហទំព័រនេះ សូមទំនាក់ទំនងតាមលេខទូរស័ព្ទៈ 012 454 575 និង 012 499 114