ព័ត៍មានទាន់​ហេតុការណ៏
Search

ពិធី​មង្គលការ ​កម្មវិធី​ផឹក​ស៊ី​រាំ​ធុងបាស​ ប៉ះ​បទ​ញាក់​រាំ​ទង្គិច​គ្នា​វៃ​ប្រាវ​ ចាក់​ច្រឡំ​ចំ​បងប្អូន​កូន​កំលោះ​ស្លាប់

ពោ​ធិ៍សាត់ ​៖ ​ប៉ះទង្គិច​គ្នា​មួយ​ប្រាវ​ក្នុង​កម្មវិធី​ ការ​អ្នកភូមិ​រាំ​ធុងបាសក្លាយ​ជា​ហិង្សា​វៃ​ច្រឡំ​មនុស្ស ​ខឹង​ខ្លាំង​ពេក​ រត់ឡើង​លើ​ផ្ទះ​ដេញ​ចាក់​គ្រប់គ្នា​ចុងក្រោយ​ចាក់​ត្រូវ​សាច់ញាតិ​ខាង​កូន​កំលោះ​មិន​ដឹង​រឿង​ស្លាប់​ នៅនឹង​កន្លែង​ផ្អើល​ពេញ​រោងការ ចាប់​បាន​ម្នាក់​ បី​នាក់​ទៀត​រត់​គេច​ខ្លួន។

​ហេតុ​ការណ៍​នេះ​ បានកើតឡើង​កាល​វេលា​ម៉ោង​២​និង​១៥​នាទី​រសៀល​ ថ្ងៃ​ទី​៦ ខែមករា ឆ្នាំ២០១៧ ត្រង់​ចំណុចផ្ទះ​ពិធី​មង្គលការ​អំ​ពួច ភូមិ​ជ្រៃក្រឹម ឃុំ​ផ្ទះ​រុង ស្រុក​ភ្នំក្រវាញ ខេត្ត​ពោ​ធិ៍​សាត់។

លោក​អធិការ​នគរបាល​ស្រុក​ភ្នំក្រវាញ វង សា​វ៉េ​ត បាន​ឲ្យ​ដឹង​ថា​ ជនរងគ្រោះ​ដែល​ជនសង្ស័យ​ចាក់​ស្លាប់​ឈ្មោះ ដៀប ឌឿ​ន ភេទ​ប្រុស ​អាយុ​៣៣​ឆ្នាំ ត្រូវជា​បងប្អូន​ជា​ដូន​មួយ​កូន​កំលោះ រស់នៅ​ភូមិ​ចំបក់​ព្រះ ឃុំ​ត្រពាំង​ជង ស្រុក​បាកាន ខេត្តពោធិ៍សាត់។

ដោយឡែក​ជនសង្ស័យ ទី​១.​ឈ្មោះ ក្រេង កុសល់ ភេទ​ប្រុស រស់នៅ​ភូមិ​ជ្រៃក្រឹម ឃុំ​ផ្ទះ​រុង ស្រុក​ភ្នំក្រវាញ ខេត្តពោធិ៍សាត់ ត្រូវបាន​ឃាត់ខ្លួន។ ទី២.​ឈ្មោះ ឡាយ នី ភេទ​ប្រុស រស់នៅ​ភូមិ​ជ្រៃក្រឹម ឃុំ​ផ្ទះ​រុង ស្រុក​ភ្នំក្រវាញ ខេត្តពោធិ៍សាត់​ត្រូវជា​ឪពុក ក្រេង កុសល់ (​រត់គេចខ្លួន​)។ ទី​៣.​ឈ្មោះ ណេង រស្មី ហៅ​ឃ្នក ភេទ​ប្រុស​ អាយុ​២០​ឆ្នាំ រស់នៅ​ភូមិ​ជ្រៃក្រឹម ឃុំ​ផ្ទះ​រុង ស្រុក​ភ្នំក្រវាញ ខេត្តពោធិ៍សាត់​(​រត់គេចខ្លួន​)។ និង​ទី​៤.​ឈ្មោះ ណាត អៀ ភេទ​ប្រុស អាយុ​២៩​ឆ្នាំ រស់នៅ​ភូមិ​ជ្រៃក្រឹម ឃុំ​ផ្ទះ​រុង ស្រុក​ភ្នំក្រវាញ ខេត្តពោធិ៍សាត់ (រត់គេចខ្លួន)។

លោក​វង សា​វ៉េ​ត បន្ត​ថា បើ​តាម​ប៉ុ​ស្តិ៍​មូលដ្ឋាន​ផ្ទះ​រុង​ គឺ​មុន​ពេល​កើតហេតុ​មាន​រៀបចំ​ពិធី​អាពាហ៍ពិពាហ៍​មួយ​កន្លែង​នៅផ្ទះ​ស្ត្រី​មេម៉ាយ​ម្នាក់​ឈ្មោះ នាង វុ​ធ អាយុ​៤៥​ឆ្នាំ ​ក្នុង​ភូមិ ឃុំ​ខាងលើ​។ លុះដល់​វេលា​ម៉ោង​២​និង​១៥​នាទី​រសៀល​ ក៏​មាន​កម្មវិធី ស៊ី​ផឹក​ និង ​រាំ​ធុងបាស​ព្រោះ​ស្រុក​នេះ​គេ​ចូលចិត្ត​រាំ​ណាស់​។

ស្រាប់តែ​ចូល​ទៅ​រាំ​ពេល​ដែល​ផឹក​ស្រវឹង ​ពួក​គេ​ក៏បាន​រាំ​ប៉ះទង្គិច​រាំ​ជាន់ជើង​គ្នា​ឌឺដង​ដាក់គ្នា ក៏ត្រូវ​ក្រុម​ជនសង្ស័យ​មិន​ស្គាល់​មុខ​ វាយ​ចំ​កណ្ដាល​មុខ​មួយ​ដៃ​ដួល​ដាច់​ផ្ងារ ក៏​ក្លាយ​ជា​ហិង្សា​កើតឡើង ដោយ​ជន​នោះ​ ក៏​បាន​រត់​ទៅ​លើ​ផ្ទះ​នៅក្បែរ​នោះ​ កាន់​កូនកាំបិត​ចុង​ស្រួច នៅ​ដៃ​សងខាង​ដេញ​ចាក់​គេ​ជាមួយ​បក្សពួក​៤​នាក់ ​ពេញ​រោងការ។ ពេលនោះ ​ក៏​មាន​​ដៃគូ​ទំនាស់​មិន​ស្គាល់​មុខ​វាយ​មួយ​ដៃ​ទៀត​ ត្រូវ​កញ្ចប់​មុខ ដួល​ផ្ងារ​ទៅ​ដី របួសធ្ងន់ ធ្វើ​ឲ្យ​ក្រុម​ជនសង្ស័យ​កាន់តែ​ខឹង ហើយ​ជន​ដៃដល់​ម្នាក់​ក្នុង​ចំណោម​ជនសង្ស័យ​៤​នាក់​នោះ ក៏​ចាក់​ចំ​ជនរងគ្រោះ​មិន​ដឹង​អី​ដែល​ត្រូវជា​បងប្អូន​ជីដូនមួយ​កូន​កំលោះ ត្រូវ​មួយ​កាំបិត​ចំ​ដើម​ដោះ​ខាងឆ្វេង​បណ្តាល​ឲ្យ​ស្លាប់​នៅ​នឹង​កន្លែង​ផ្អើលពេញ​រោងការ។ ក្រោយពេល​មាន​អ្នក​ស្លាប់​នៅ​ក្នុង​រោងការ​នោះ​ភ្លាម ជនសង្ស័យ​ទាំង​បួន​ជាមួយ​អ្នករបួស​មុខ​នោះ​នាំគ្នា​រត់គេចខ្លួន​អស់។

លោក​អធិការ​បញ្ជាក់​ថា ក្រោយពេល​ជនសង្ស័យ​ធ្វើ​សកម្មភាព​ហិង្សា​ដោយ​ចេតនា​បណ្ដាល​ឲ្យ​មាន​មនុស្ស​ស្លាប់​រួច​រត់គេចខ្លួន លោក​ក៏បញ្ជា​កម្លាំង​ឲ្យ​តាម​ចាប់​ និង ​សហការ​ជាមួយ​ខាង​អធិការ​ស្រុក​បាកាន​ផង ក៏​ចាប់​ខ្លួន​បាន​បក្សពួក​ជ​ន​សង្ស័យ​ម្នា​ក់ នៅ​ខាង​ស្រុក​បាកាន បន្ទាប់​ពី​ជន​នេះ​ព្យាយាម​គេចខ្លួន។ ដោយឡែក​បី​នាក់​ទៀត​ក៏​បន្ត​ប្រមាញ់​ចាប់ខ្លួន​បន្តបន្ទាប់ ​ដើម្បី​យក​មក​ផ្ដន្ទាទោស​តាមច្បាប់​៕



ប្រសិនបើ លោក លោកស្រីចង់ចែករំលែកនូវព័ត៌មានទាន់ហេតុការណ៍ផ្សេងៗ សូមផ្ញើ អ៊ីម៉ែលមកកាន់អាសយដ្ឋានដូចដែលបានបង្ហាញខាងក្រោម។ សម្រាប់ការផ្សាយពាណិជ្ជកម្មលើគេហទំព័រនេះ សូមទំនាក់ទំនងតាមលេខទូរស័ព្ទៈ 012 454 575 និង 012 499 114