ព័ត៍មានទាន់​ហេតុការណ៏
Search

សហព័ន្ធ​កីឡា​ទូកក្ដោង​កម្ពុជា គណៈប្រតិភូ​កីឡាករ ទៅ​ចូលរួម​ប្រកួត​កីឡា​ទូកក្ដោង​លើក​ទី​៣៦ នៅ​ប្រទេស​សិង្ហ​បុរី​

ភ្នំពេញ ៖ ឆ្លើយតប​តាម​ការអញ្ជើញ​របស់​សហព័ន្ធ​កីឡា​ទូក​ក្តោង​របស់​ប្រទេស​សិង្ហ​បុរី សហព័ន្ធ​កីឡា​ទូក​ក្តោង​កម្ពុជា បាន​បញ្ជូន​គណៈប្រតិភូ​កីឡាករ​មួយ ដឹកនាំ​ដោយ​លោក ថោង រដ្ឋ​ស័​ក្កិ អនុ​ប្រធាន​សហព័ន្ធ ទៅ​ចូលរួម​ប្រ​កូត​កីឡា​ទូកក្តោង 36th Singapore Open Windsurfing Championship ដែល​ធ្វើឡើង​នៅ​ប្រទេស​សិង្ហ​បុរី ចាប់ពី​ថ្ងៃទី​១១ ដល់​ថ្ងៃទី​១៥ ខែមករា ឆ្នាំ​២០១៧​ខាងមុខនេះ ជា​លក្ខណៈ​អន្តរជាតិ ដែលមាន​កីឡាករ​ចូលរួម​ចំនួន​១០០​រូប មកពី​បណ្តា​ប្រទេស​ផ្សេងៗ នៅលើ​ពិភព​លោក​។​

កីឡាករ​កម្ពុជា​សហព័ន្ធ​បាន​បញ្ជូន​ទៅ​២​រូបនោះ ទី​១-ឈ្មោះ ហៀ​ង ស៊ុន​ហេង ភេទ​ប្រុស អាយុ​១៤​ឆ្នាំ។ និង​ទី​២-ឈ្មោះ សូត្រ មេសា ភេទ​ប្រុស អាយុ​១៤​ឆ្នាំ ហើយ​នេះ​គឺជា​លើកដំបូង​របស់​សហព័ន្ធ​កីឡា​ទូកក្តោង​កម្ពុជា ដែល​បាន​បញ្ជូន​កីឡាករ ទៅ​ចូលរួម​ប្រកួត​ជា​លក្ខណៈ​អន្តរជាតិ​។​

ជាមួយគ្នា​នោះ សហព័ន្ធ​កីឡា​ទូកក្តោង​កម្ពុជា ក៏បាន​បញ្ជូន​កីឡាករ​មួយរូប​ទៀត​ដែលមាន​ឈ្មោះ ឌុ​ច ប៊ុនធឿន ទៅ​ចូលរួម​ប្រកួត​ទូកក្តោង​ប្រភេទ Laser 470 នៅ​ប្រទេស​សិង្ហ​បុរី​នោះ​ផង​ដែរ​។​

សូមបញ្ជាក់ថា សហព័ន្ធ​កីឡា​ទូកក្តោង​កម្ពុជា ចាប់តាំងពី​ពេល​កកើត​នៅ​ថ្ងៃទី​១៥ ខែសីហា ឆ្នាំ​២០១៥ រហូត​ពេលនេះ​មាន​អាយុ​ត្រឹមតែ​១​ឆ្នាំ ៤​ខែ​តែប៉ុណ្ណោះ ប៉ុន្តែ​សហព័ន្ធ​ទទួលបាន​លទ្ធផល​ល្អ​គួរ​ឲ្យ​កត់សម្គាល់​។

កន្លងមក​ សហព័ន្ធ​កីឡា​ទូកក្តោង​កម្ពុជា ធ្លាប់បាន​បញ្ជូន​កីឡាករ​ទៅ​ហ្វឹកហាត់ ផ្លាស់ប្ដូរ​បទ​ពិសោធន៍​ជាមួយ​កីឡាករ​ជម្រើសជាតិ​របស់​ប្រទេស​ថៃ​នៅ​ទីក្រុង​ប៉ា​តា​យា ប្រទេស​ថៃ​រយៈពេល​២​សប្ដាហ៍​ផងដែរ​៕



ប្រសិនបើ លោក លោកស្រីចង់ចែករំលែកនូវព័ត៌មានទាន់ហេតុការណ៍ផ្សេងៗ សូមផ្ញើ អ៊ីម៉ែលមកកាន់អាសយដ្ឋានដូចដែលបានបង្ហាញខាងក្រោម។ សម្រាប់ការផ្សាយពាណិជ្ជកម្មលើគេហទំព័រនេះ សូមទំនាក់ទំនងតាមលេខទូរស័ព្ទៈ 012 454 575 និង 012 499 114