ព័ត៍មានទាន់​ហេតុការណ៏
Search

អាវុធហត្ថ​ស្រុក​អន្លង់វែង​ ​ចុះ​បង្ក្រាប​គ្រឿងញៀន​២​ករណី​ និង​ឃាត់ខ្លួន​ជនសង្ស័យ​៣នាក់

ឧ​ត្ត​រ​មានជ័យ ៖ ​នាយ​កម្លាំង​កងរាជអាវុធហត្ថ​ស្រុក​អន្លង់វែង ក្រោយ​ទ​ទួល​បញ្ជា​ម៉ឺងម៉ាត់​ពីមេបញ្ជាការ​អាវុធហត្ថ​ខេត្ត ​ក៏បានចុះ​បង្ក្រាប​គ្រឿងញៀន​បាន​២​ករណី មាន​ទីតាំង​ផ្សេងៗ​ពីគ្នា​និង​ឃាត់ខ្លួន​ជនសង្ស័យ​ចែកចាយ​និង​ប្រើប្រាស់​ចំនួន​៣​នាក់​រួម​វត្ថុតាង​មួយ​ចំនួន។

ករណី​ទី​១ នៅវេលា​ម៉ោង​៣​ទៀបភ្លឺ ចូល​ថ្ងៃ​ទី​១១ ខែមករា ឆ្នាំ​២០១៧ ចុះ​បង្ក្រាប​ឃាត់ខ្លួន​ជនសង្ស័យ​ចែកចាយ​និង​ប្រើប្រាស់​ចំនួន​២​នាក់ ស្ថិតនៅ​ភូមិ​អូរ​តា​ម៉េង ឃុំ ស្រុក​អន្លង់វែង និង​ករណី​ទី​២ នៅ​វេលា​ម៉ោង​៥​និង​៣០​នាទី​ល្ងាច​ ថ្ងៃ​ទី​១០ ខែមករា ឆ្នាំ​២០១៧ ចុះ​បង្ក្រាប​ឃាត់ខ្លួន​ជនសង្ស័យ​ចែកចាយ​និង​ប្រើប្រាស់​ចំនួន​ម្នាក់ ស្ថិតនៅ​អូរ​ចិ​ញ្ជៀ​ន ឃុំ ស្រុក​អន្លង​វែង។

លោក​វរសេនីយ៍ ងួន ទ្ឋី​រិ​ទ្ឋ មេបញ្ជាការ​អាវុធហត្ថ​ស្រុក​អន្លង​វែង​បានឲ្យដឹង​ថា ករណី​ទី​១​កម្លាំង​សមត្ថកិច្ច​ឃាត់ខ្លួន​ជនសង្ស័យ​បាន​ចំនួន​២​នាក់។ ១/​ឈ្មោះ យ៉ា មករា ភេទ​ប្រុស អាយុ៣៤ឆ្នាំ។ ២/​ឈ្មោះ ជិន វិចិត្រ ភេទ​ប្រុស អាយុ​២៤​ឆ្នាំ ហើយ​ជនសង្ស័យ​ទាំង​២​នាក់ រស់នៅ​ភូមិ អូរ​តា​ម៉ែង ឃុំ ស្រុក​អន្លង់វែង ខេត្ត​ឧ​ត្ត​រ​មានជ័យ ដកហូត​នូវ​វត្ថុ​តាង រួមមាន​ម្សៅ​ក្រាម​ព​ណ៌​សរ (​ម៉ាទឹកកក​)​ ចំនួន​២​ថង់​តូច ទូ​រស័ព្ទ​ដៃ ចំនួន​៣​គ្រឿង ​និង​ករណី​ទី​២​ឃាត់ខ្លួន ជនសង្ស័យ​ចំនួន​ម្នាក់ មានឈ្មោះ អាត ដា ភេទ​ប្រុស អាយុ២០​ឆ្នាំ មុខរបរ​មិន​ពិតប្រាកដ រស់នៅ​ក្នុង​ភូមិ អូរ​ជញ្ជៀន ឃុំ ស្រុក​អន្លង់វែង ដកហូត​វត្ថុតាង រួមមាន​ថ្នាំញៀន​ម្សៅ​ក្រាម ព​ណ៌ស (​ម៉ា​ទឹកកក​)​ ចំនួន​១​កន្លះ​ក​ញ្ចប់​តូច​។

បច្ចុប្បន្ន​កម្លាំង​អាវុធហត្ថ​ស្រុក​កំពុង​ធ្វើការ​កសាង​សំណុំរឿង​បញ្ជូន​ទៅ​តុលាការ​អនុវត្ត​តាម​នីតិ​វិធី៕

  



ប្រសិនបើ លោក លោកស្រីចង់ចែករំលែកនូវព័ត៌មានទាន់ហេតុការណ៍ផ្សេងៗ សូមផ្ញើ អ៊ីម៉ែលមកកាន់អាសយដ្ឋានដូចដែលបានបង្ហាញខាងក្រោម។ សម្រាប់ការផ្សាយពាណិជ្ជកម្មលើគេហទំព័រនេះ សូមទំនាក់ទំនងតាមលេខទូរស័ព្ទៈ 016 877 684