ព័ត៍មានទាន់​ហេតុការណ៏
Search

ក្រសួង​អប់រំ​ ជ្រើសរើស​និស្សិត​ស្ម័គ្រចិត្ត​៣០០​នាក់​ ជួយ​បង្រៀន​គណិត រូបវិទ្យា និង​គីមីវិទ្យា ដល់​សិស្ស​អនុវិទ្យាល័យ និង​វិទ្យាល័យ​

ភ្នំពេញ ​៖ ក្រសួង​អប់រំ យុវជន និង​កីឡា​ នឹង​ជ្រើសរើស​និស្សិត​កំពុង​សិក្សា​ឯកទេស​គណិតវិទ្យា រូប​វិទ្យា និង​គីមីវិទ្យា ចំនួន​៣០០​នាក់ ចូលរួម​បង្កើត​ក្លិប​សិក្សា​មុខវិជ្ជា​គណិតវិទ្យា រូបវិទ្យា និង​គីមីវិទ្យា ដើម្បី​បណ្ដុះបណ្ដាល​បន្ថែម​ដល់​សិស្ស​នៅ​តាម​អនុវិទ្យាល័យ និង​វិទ្យាល័យ​នៅ​ទូទាំង​ប្រទេស​។​

យោង​តាម​សេចក្ដីជូនដំណឹង​របស់​ក្រសួង​អប់រំ​បានចេញ​ផ្សាយ​កាលពី​ថ្ងៃទី​១៩ ខែ​មករា ឆ្នាំ​២០១៧​បាន​ឲ្យ​ដឹង​ថា ដើម្បី​ជួយ​ឲ្យ​កំណែ​ទម្រង់​វិស័យ​អប់រំ​ ការ​ពង្រឹង​គុណភាព​ និង​ប្រសិទ្ធភាព ​នៃ​ការអប់រំ ការ​បណ្តុះបណ្តាល​ការ​កសាង​សមត្ថភាព​ និង​ការអភិវឌ្ឍ​ធនធានមនុស្ស​នៅ​កម្ពុជា​ឲ្យ​កាន់​ទទួល​បាន​ជោគជ័យ​រាល់​ការរួមចំណែក​ និង​វិភាគទាន​ពី​គ្រប់ភាគី ​និង​ជន​ដែល​ពាក់ព័ន្ធ​ទាំងអស់ ​ពិតជា​មាន​សារៈសំខាន់ ​និង​ចាំបាច់​មិនអាច​ខ្វះ​បាន​។​

ដោយ​មើល​ឃើញ​ពី​សារៈសំខាន់​នេះ​ ទើប​ក្រសួង​អប់រំ​សិស្ស​និស្សិត​ស្ម័គ្រចិត្ត​ដែល​កំពុង​សិក្សា​ឯកទេស​គណិតវិទ្យា រូបវិទ្យា និង​គីមីវិទ្យា​ចំនួន​៣០០​នាក់​ ឲ្យ​ចូលរួម​ចុះ​បង្កើត​ និង​គាំទ្រ​ក្លិប​សិក្សា​និង​វស័យ​សិក្សា​មុខវិជ្ជា​គណិតវិទ្យា រូបវិទ្យា និង​គីមីវិទ្យា​របស់​សិស្ស​ដែល​កំពុង​សិក្សា​នៅ​តាម​អនុ​វិទ្យាល័យ ​និង​វិទ្យាល័យ​នៅ​ទូទាំង​ប្រទេស​កម្ពុជា​។​

សេចក្ដីជូនដំណឹង​ដដែល​បាន​បន្តថា ​«ការបង្កើត​ក្លិប​សិក្សា​បន្ថែម​នេះ ដើម្បី​ពង្រឹងសមត្ថភាព​សិស្ស​នៅ​ថ្នាក់​អនុវិទ្យាល័យ និង​វិទ្យាល័យ ឲ្យ​មានការ​យល់ដឹង​លើ​មុខវិជ្ជា​គណិតវិទ្យា និង​វិទ្យាសាស្ត្រ​កាន់​តែ​ខ្លាំងក្លា​បន្ថែមទៀត​»​។​

តាម​សេចក្ដី​ជូន​ដំណឹង​និស្សិត​ដែល​ចូលរួម​បង្កើត​ក្លិប​សិក្សា​នេះ​បាន​ត្រូវតែ​ជា​និស្សិត​ដែល​កំពុង​សិក្សា​ជំនាញ​ឯកទេស​គណិតវិទ្យា រូបវិទ្យា និង​គីមីវិទ្យា នៅ​តាម​គ្រឹះស្ថាន​ឧត្ដមសិក្សា​, មាន​មធ្យោ​បាយ​ធ្វើដំណើរ​ផ្ទាល់ខ្លួន​, មាន​ពេលវេលា​ទំនេរ​នៅ​ថ្ងៃ​សៅរ៍ ឬ ថ្ងៃអាទិត្យ ឬ មាន​ពេលា​វេលា​ទំនេរ​នៅ​ពេល​ល្ងាច ចាប់ពី​ថ្ងៃទី​ចន្ទ ដល់​ថ្ងៃ​សុក្រ​, មាន​ឆន្ទៈ និង​ការ​ប្ដេជ្ញា​ចិត្ត​ខ្ពស់​ក្នុង​ការ​រួមចំណែក និង​វិភាគទាន ចំពោះ​ទម្រង់​វិស័យ​អប់រំ និង​ការ​ពង្រឹង​គុណភាព ប្រសិទ្ធភាព​ នៃ​ការអប់រំ ការ​បណ្ដុះ​បណ្ដាល ការ​កសាង​សមត្ថភាព និង​ការ​អភិវឌ្ឍ​ធនធានមនុស្ស​នៅ​កម្ពុជា​។​

ប្រសិនបើ​សិស្ស​និស្សិត​មាន​ចំណាប់អារម្មណ៍​ សូម​មក​ចុះឈ្មោះ​ដោយ​ភ្ជាប់​ជាមួយ​សំណុំ​ឯកសារ​ផ្សេងៗ​សម្រាប់​ធ្វើ​ការ​សម្រិត​សម្រាំង​ជ្រើសរើស​នៅ​នាយកដ្ឋាន​ស្រាវជ្រាវ​វិទ្យាសាស្ត្រ​ នៃ​ក្រសួង​អប់រំ ​យុវជន​ និង​កីឡា​ ដែលមាន​អាស័យដ្ឋាន​អគារ​លេខ​២៣ ​ផ្លូវ​៣៦០ ​សង្កាត់​បឹង​កេងកង​១​ ខណ្ឌ​ចំការមន ​រាជធានី​ភ្នំពេញ​(​ខាងកើត​ស្ថានីយ​ទូរទស្សន៍​អប្សរា​ប្រហែល​៥០​ម៉ែត្រ​)​ ចាប់ពី​ផ្សាយដំណឹង​នេះ​តទៅ​រហូតដល់​ថ្ងៃ​ទី​៣១ ​ខែ​មករា ​ឆ្នាំ​២០១៧​។​

សម្រាប់​ព័ត៌មាន​បន្ថែម ​សូម​សាកសួរ​មន្ត្រី​នាយកដ្ឋាន​វិទ្យាសាស្ត្រ​ដែល​មាន​លេខ​ទូរស័ព្ទ​០១៥ ៧៦៣ ៣៩៦/០៨៥ ៩៥៧ ៧៧៧/០៣១ ៦៦៦ ៦៨៤៧៕



ប្រសិនបើ លោក លោកស្រីចង់ចែករំលែកនូវព័ត៌មានទាន់ហេតុការណ៍ផ្សេងៗ សូមផ្ញើ អ៊ីម៉ែលមកកាន់អាសយដ្ឋានដូចដែលបានបង្ហាញខាងក្រោម។ សម្រាប់ការផ្សាយពាណិជ្ជកម្មលើគេហទំព័រនេះ សូមទំនាក់ទំនងតាមលេខទូរស័ព្ទៈ 012 454 575 និង 012 499 114