មនុស្ស ៣នាក់ស្លាប់ ក្នុងហេតុការណ៍ធ្លាក់យន្តហោះនៅស្វីស

ប៉ូលិសបានរាយការណ៍ថា យន្តហោះទេសចរណ៍មួយគ្រឿងបានធ្លាក់នៅតំបន់ព្រៃភ្នំ ភាគខាងលិចប្រទេសស្វីស កាលពីថ្ងៃសៅរ៍ ទី២០ ខែឧសភា ឆ្នាំ២០២៣ ដោយបានសម្លាប់មនុស្ស ៣នាក់នៅលើយន្តហោះ។

ប៉ូលិសក្នុងតំបន់បាននិយាយថា យន្តហោះទេសចរណ៍ខ្នាតតូចបានធ្លាក់នៅតំបន់ព្រៃ ក្បែរទីក្រុង Ponts-De-Martel ក្នុងសង្កាត់ Neuchatel នៃប្រទេសស្វីស នៅម៉ោងប្រហែល១០ និង ២០នាទីព្រឹក ម៉ោងក្នុងស្រុក។

ប៉ូលីស Neuchatel បាននិយាយនៅក្នុងសេចក្តីថ្លែងការណ៍មួយថា “អ្នកបើកយន្តហោះ និងអ្នកដំណើរពីរនាក់បានស្លាប់នៅនឹងកន្លែង” ប៉ុន្តែព័ត៌មានលម្អិតបន្ថែមអំពីជនរងគ្រោះមិនទាន់មានការបញ្ជាក់នោះទេ។

បន្ទាប់ពីហេតុការណ៍ភ្លាមៗ ប៉ូលិសបានចុះប្រតិបត្តិការជួយសង្គ្រោះភ្លាមៗដែរ ប៉ុន្តែដោយសារកន្លែងកើតហេតុស្ថិតនៅលើភ្នំ ដែលមានស្ថានភាពចោតខ្លាំង ដូច្នេះការងាររុករកនិងសង្គ្រោះមានភាពលំបាកខ្លាំងផងដែរ ខណៈមូលហេតុនៃការធ្លាក់នៅតែមិនទាន់ច្បាស់នៅឡើយ៕

ប្រែសម្រួល៖ សន្យា

ប្រភព៖ AFP

ចុចអាន៖ ញូវយ៉ក ជួបការរញ្ជួយដី ដ៏កម្រ