ព័ត៍មានទាន់​ហេតុការណ៏
Search

ស្ត្រី​អាយុ​៤៦​ឆ្នាំ​​ ​មាន​ប្ដី​កូន​បី​ លួច​រួមរ័ក​​ជាមួយ​បុរស​វ័យ​៦៥​ឆ្នាំ​រាប់​សិប​ដង ​ចុងក្រោយ​កូន​ប្រុស​បង្កើត​តាម​ទាន់ ​កាប់​មួយ​ពូថៅ

ពោធិ៍សាត់ ​៖​ បុរស​អាយុ​២៥​ឆ្នាំ​ម្នាក់​ បាន​ជាប់ទោស​ពី​បទ​ហិង្សា​មាន​ស្ថាន​ទម្ងន់ ​ដោយ​ចេតនា ​ហើយ​គេចខ្លួន​ចោល​ប្រពន្ធ​កូន ​ក្រោយ​ពី​​​​​​​​កាប់​បុរស​ម្នាក់​​ ​មួយ​ពូថៅ​​ ខណៈ​កំពុង​តែ​រួមរ័ក​ជាមួយ​ម្ដាយ​របស់​ខ្លួន។

ហេតុការណ៍​នេះ​ បាន​កើត​ឡើង​ កាលពី​វេលា​ម៉ោង​៤​និង​៣០​នាទី​ល្ងាច​ ថ្ងៃ​ទី​២៦ ខែ​មករា ​ឆ្នាំ​២០១៧ ​ស្ថិត​ត្រង់​ចំណុច​ផ្ទះ​ជនរងគ្រោះ​ក្នុង​ភូមិ​ក្រាំង​វែង ឃុំ​ស្នា​អ​ន្សា ស្រុក​ក្រគរ​ ខេត្ត​ពោធិ៍សាត់​។​

លោក​ហុង ដា នាយរង​ប៉ុស្តិ៍​មូលដ្ឋាន​ទីនោះ​បាន​ឲ្យ​ដឹង​នៅ​រសៀល​ថ្ងៃ​ទី​២៨ ខែ​មករា ឆ្នាំ​២០១៧​នេះ​ថា ​៖ ជនរងគ្រោះ​​មាន​ឈ្មោះ ប៊ុន ប៉ាន់ អាយុ​៦៥ ឆ្នាំ​ ភេទ​ប្រុស ជនជាតិ​ខ្មែរ។ ចំណែក​ជនសង្ស័យ​ដែល​ជា​កូនបង្កើត​របស់​ស្ត្រី​ជា​ម្ដាយ​ល្មោភកាម​នោះ​ ឈ្មោះ សយ ជា​ អាយុ​២៥ ឆ្នាំ​ ភេទ​ប្រុស​ជនជាតិ​ខ្មែរ​ អ្នក​ទាំងពីរ​រស់នៅ​ភូមិ​ក្រាំង​វែង ឃុំ​ស្នា​អ​ន្សា ស្រុក​ក្រគរ ខេត្តពោធិ៍សាត់។

លោក​ហុង ដា បាន​ផ្ដល់​ព័ត៌មាន​ពិស្ដារ​ថា ​៖​ បើ​តាម​សាក្សី​រស់នៅ​ផ្ទះ​ក្បែរ​ជនសង្ស័យ ​និង​ជនរងគ្រោះ​ ​ បាន​ឲ្យ​ដឹង​ថា ​បុរស​រងគ្រោះ​ខាងលើ ​ប្រពន្ធ​​បាន​ស្លាប់​ចោល​យូរ​ហើយ ​ហើយ​​មាន​ផ្ទះ​ទល់មុខ​មុខ​គ្នា ​​ស្ត្រី​ជា​ម្ដាយ​ជន​សង្ស័យ​ឈ្មោះ​ឯម ប៉ែន អាយុ​៤៦​ឆ្នាំ ដែល​មាន​ប្ដី​ឈ្មោះ ស៊ិន ថា អាយុ​៤៧​ឆ្នាំ រស់នៅ​ក្នុង​បន្ទុក​គ្រួសារ​ជុំ​គ្នា។ ចំណែក​ជន​សង្ស័យ ​ត្រូវជា​កូន​ស្ត្រី​ឈ្មោះ​ ឯម ប៉ែន រស់នៅ​ផ្ទះ​ផ្សេង​ជាមួយ​ប្រពន្ធ​កូន​ខ្លួន តែ​ក្នុង​ភូមិ​ជាមួយគ្នា។

លោក​បន្ត​ថា ​៖ ជា​​រឿយ​ៗ​បុរស​រងគ្រោះ​អាយុ​៦៥​ឆ្នាំ តែងតែ​បង្កាត់ភ្លើង​​ស្នេហ៍​ជាមួយ​ម្ដាយ​ជនសង្ស័យ​ជាច្រើន​ដង ព្រោះតែ​បុរស​ជា​ប្ដី​ត្រូវជា​ឪពុក​ជនសង្ស័យ​នោះ​ គាត់​មាន​​​ជំងឺ​ប្រចាំ​កាយ​មិនសូវ​គ្រប់ទឹក​ទេ​ តាំងពី​​រៀបការ​ជាមួយ​ស្ត្រី​នេះ​បាន​កូន​ចំនួន​បី​នាក់​​រួច​មក។ ដោយសារ​តែ​រឿង​នេះ​ចេះ​តែ​ល្បី​ពី​មាត់​មួយ​ទៅ​មាត់​មួយ​ ដឹង​ដល់​កូនប្រុស​ជា​ជនសង្ស័យ ​មិន​ថា​ពេលយប់​ថ្ងៃ​ក៏ដោយ គឺ​ស្ត្រី​នេះ​តែងតែ​ត្រូវ​បុរស​រងគ្រោះ​នោះ​ល្បួង​​ទៅផ្ទះ​គាត់ ​រួមរ័ក​គ្នា​ដូច​ប្ដី​ប្រពន្ធ ទើប​​ជន​សង្ស័យ​នោះ​ទប់​កំហឹង​មិនបាន​ក៏​កើត​គំនុំ​ តាមដាន​ម្ដាយ​ខ្លួន ​និង​ជនរងគ្រោះ។ ចុង​ក្រោយ​នៅ​ម៉ោង​ខាងលើ​បុរស​នោះ​ដើរ​ទៅ​ផ្ទះ​ម្ដាយ​របស់​ខ្លួន​មើល​ក្នុង​ផ្ទះ​ឃើញ​តែ​ឪពុក​មិន​ឃើញ​ម្ដាយ​នៅផ្ទះ​របស់​ខ្លួន ក៏បាន​ដើរ​ទៅ​ផ្ទះ​ជនរងគ្រោះ​នៅ​ទល់​មុខ​គ្នា ស្រាប់តែ​ឃើញ​ម្ដាយ​ខ្លួន​កំពុងតែ​ដេក​បង្កាត់ភ្លើង​ស្នេហ៍​ជាមួយ​បុរស​អាយុ​៦៥​ឆ្នាំ​នោះ​យ៉ាង​រោលរាល​ជាមួយគ្នា ធ្វើ​ឲ្យ​ទប់​កំហឹង​មិនបាន​ ​ក៏​ដើរ​មកវិញ​ទាញ​ពូថៅ ទៅផ្ទះ​ជនរងគ្រោះ​ព្រលះ​មួយ​ទំហឹង​កាប់​មួយ​ពូថៅ​ចំ​សៀតផ្កា​ខាងឆ្វេង បណ្ដាល​ឲ្យ​បុរស​នោះ​ប្រកាច់​រង​របួស​ធ្ងន់ធ្ងរ ផ្អើល​ឈុល​បែក​រឿង អ្នក​ភូមិ​នាំគ្នា​បញ្ជូន​ទៅ​សង្គ្រោះ​បន្ទាន់​នៅ​មន្ទីរពេទ្យ​ខេត្ត​ពោធិ៍សាត់។ ដោយឡែក​ជន​សង្ស័យ​ ក្រោយ​ធ្វើ​សកម្មភាព​ហើយ​ ក៏​បាន​រត់​គេច​ខ្លួន​បាត់ស្រមោល ក្លាយ​ជា​អ្នកទោស​ពី​បទ​ហិង្សា​​ដោយ​ចេតនា ​មាន​ស្ថាន​ទម្ងន់​ទោស​ តែម្ដង។

លោក​ហុង ដា បញ្ជាក់​ថា ​៖​ ខាង​នគរបាល​មូលដ្ឋាន​យើង​បាន​កំពុង​តាម​ប្រមាញ់​ជន​ដៃដល់​ស្រាវជ្រាវ​ដើម្បី​តាម​ចាប់ខ្លួន​បញ្ជូន​ទៅ​តុលាការ ដើម្បី​ចាត់ការ​តាម​ផ្លូវ​ច្បាប់៕



ប្រសិនបើ លោក លោកស្រីចង់ចែករំលែកនូវព័ត៌មានទាន់ហេតុការណ៍ផ្សេងៗ សូមផ្ញើ អ៊ីម៉ែលមកកាន់អាសយដ្ឋានដូចដែលបានបង្ហាញខាងក្រោម។ សម្រាប់ការផ្សាយពាណិជ្ជកម្មលើគេហទំព័រនេះ សូមទំនាក់ទំនងតាមលេខទូរស័ព្ទៈ 016 877 684