ព័ត៌មានអន្ដរជាតិ

រុស្ស៊ី ចាប់ផ្តើមចល័តអាវុធនុយក្លេអ៊ែរ ទៅក្បែរព្រំដែនអ៊ុយក្រែន ហើយ

បានផុស

១២ ខែ មុន

នៅ

ថ្ងៃសុក្រ ២៦ ឧសភា ២០២៣

ដោយ

មេដឹកនាំបេឡារុស លោក Alexander Lukashenko បាននិយាយកាលពីថ្ងៃព្រហស្បតិ៍ ទី២៥ ខែឧសភាថា ប្រទេសរុស្ស៊ី បានចាប់ផ្តើមចល័តអាវុធនុយក្លេអ៊ែរទៅកាន់ប្រទេសបេឡារុសហើយ ខណៈទីក្រុង Minsk កំពុងកែលម្អយន្តហោះចម្បាំងរបស់ខ្លួន ដើម្បីបំពាក់អាវុធទាំងនោះ។

មេដឹកនាំបេឡារុស លោក Alexander Lukashenko (រូបថត៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការអះអាងនេះ ធ្វើឡើងខណៈរដ្ឋមន្ត្រីការពារជាតិរុស្ស៊ីលោក Sergei Shoigu បានចុះហត្ថលេខាលើកិច្ចព្រមព្រៀងជាមួយសមភាគីរបស់លោកនៅទីក្រុង Minsk ដើម្បីអនុញ្ញាតឲ្យរុស្ស៊ី ដាក់ពង្រាយអាវុធនុយក្លេអ៊ែរនៅលើទឹកដីដែលស្ថិតនៅជាប់ព្រំដែនអ៊ុយក្រែន។

ស្របពេលជាមួយគ្នានោះ លោក Shoigu បានព្រមានចាត់វិធានការបន្ថែមទៀត ដើម្បីការពារសន្តិសុខសមូហភាពរបស់ប្រទេស ហើយយន្តហោះចម្បាំង Su-25 មួយចំនួន គឺត្រូវបានបំប្លែងសម្រាប់ការប្រើប្រាស់អាវុធនុយក្លេអ៊ែររួចទៅហើយ។

រដ្ឋមន្ត្រីរុស្ស៊ីបានសង្កត់ធ្ងន់ថា ចំណាត់ការនេះគឺធ្វើឡើង ដើម្បីឆ្លើយតបទៅនឹងការគំរាមកំហែង និងសកម្មភាពដែលកាន់តែខ្លាំងឡើងៗ ដោយបេសកកម្មនុយក្លេអ៊ែររួមរបស់ណាតូ។ លោកកត់សម្គាល់ថា កិច្ចព្រមព្រៀងនេះ ទាក់ទងនឹងអាវុធនុយក្លេអ៊ែរមិនមែនជាយុទ្ធសាស្ត្រ និងអនុលោមតាមកាតព្វកិច្ចផ្លូវច្បាប់អន្តរជាតិទាំងអស់ដែលកំពុងមានជាធរមាន។

គួរបញ្ជាក់ជាថ្មី, ប្រធានាធិបតីរុស្ស៊ី លោក វ្ល៉ាឌីមៀរ ពូទីន បានប្រកាសជាលើកដំបូងកាលពីចុងខែមីនាថា ទីក្រុងមូស្គូ នឹងដាក់ពង្រាយអាវុធនុយក្លេអ៊ែរទៅកាន់ប្រទេសបេឡារុស ស្របតាមសំណើរបស់ទីក្រុង Minsk។ លោកបានលើកឡើងពីការអនុវត្តរបស់អាមេរិក ក្នុងការដាក់ពង្រាយអាវុធនុយក្លេអ៊ែររបស់ខ្លួន នៅក្នុងបណ្តាប្រទេសជាសម្ព័ន្ធមិត្ត។

ទោះបីជាយ៉ាងណាក៏ដោយ សហរដ្ឋអាមេរិក និងអង្គការណាតូ បានរិះគន់ការសម្រេចចិត្តរបស់រុស្ស៊ី ដោយអះអាងថា វាជារឿងគ្រោះថ្នាក់ និងគ្មានទំនួលខុសត្រូវ៕

ប្រែសម្រួល៖ Vann Vann

ប្រភព៖ Daily Mail, RT

ចុចអាន៖ ណាតូ ថ្កោលទោស ក្រោយលោក ពូទីន សម្រេចចិត្តដាក់ពង្រាយអាវុធនុយក្លេអ៊ែរ នៅ បេឡារុស