ជីវិតកម្សាន្ដ

លី ម៉ារីណា ដាច់ចិត្តទម្លាយមុខគូស្នេហ៍ថ្មី ក្នុងថ្ងៃពិសេស

បានផុស

១០ ខែ មុន

នៅ

ថ្ងៃចន្ទ ២៩ ឧសភា ២០២៣

ដោយ

បន្ទាប់ពីរស់នៅដោយសំពាយឈ្មោះមេម៉ាយមួយរយៈពេលមកនោះ តារាសម្ដែងអ្នកនាង លី ម៉ារីណា មុននេះ បានដាច់ចិត្តទម្លាយមុខគូស្នេហ៍ថ្មី បង្កការចាប់អារម្មណ៍ និងភ្ញាក់ផ្អើលដល់អ្នកគាំទ្រ ពិសេសអ្នកដែលចូលរួមថ្ងៃខួបកំណើតរបស់នាងតែម្ដង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាការពិតអ្នកនាង លី ម៉ារីណា កាលពីថ្ងៃទី ២៦ ខែឧសភា ឆ្នាំ ២០២៣ ថ្មីៗនេះ បានរៀបចំពិធីអបអរថ្ងៃខួបកំណើតរបស់ខ្លួន ក្នុងវ័យ ៤២ ឆ្នាំ យ៉ាងអធិកអធម ដោយមានវត្តមានអ្នកសិល្បៈជាច្រើនដួងចូលរួមផងដែរ។ ក្នុងនោះអ្វីដែលគេចាប់អារម្មណ៍នៅក្នុងថ្ងៃពិសេសនោះ លី ម៉ារីណា បានទម្លាយដោយបើកចំហមុខមាត់គូស្នេហ៍ថ្មីរបស់នាងយ៉ាងផ្អែមល្ហែមទទួលបានការអបអរពេញពិធីតែម្ដង។

តាមរយៈរូបភាពឱបថើបសម្ញែងភាពផ្អែមល្ហែមនៅក្នុងថ្ងៃខួបកំណើតអ្នកមេម៉ាយរូបស្រស់កូនមួយ លី ម៉ារីណា បានបង្ហោះខ្លឹមសារភ្ជាប់ជាមួយនឹងសំណេរយ៉ាងមានន័យបង្ហោះលើបណ្ដាញសង្គមថា «អគុណបងដែលផ្ដល់ក្ដីស្រលាញ់ឲ្យអូនយ៉ាងធំធេង បងបានរៀបចំចាត់ចែងកម្មវិធីថ្ងៃកំណើតជូនអូនយ៉ាងពិសេស អូនពិតជារំភើបចិត្តឥតគណនា កាដូដែលអូនទទួលបានពីបង គឺក្ដីស្រឡាញ់ និងការយកចិត្តទុកដាក់ មើលថែគ្រប់ពេលវេលា កាដូទាំងនេះមានតម្លៃបំផុតសម្រាប់អូន អគុណបងគ្រប់យ៉ាង»។

ជាមួយរូបភាពស្និទ្ធស្នាលឱបថើបយ៉ាងមានសេចក្ដីសុខរវាងអ្នកនាង លី ម៉ារីណា និងគូស្នេហ៍នេះ បានធ្វើឲ្យមហាជន ព្រមទាំងមិត្តភ័ក្ដិនៅក្នុងចង្កោមសិល្បៈដូចគ្នា នាំគ្នាសម្ដែងការអបអរសាទរ និងជូនពរ លី ម៉ារីណា ឲ្យជួបនូវសុភមង្គលជីវិត។ គេចាំបានថា តារាសម្ដែងចាស់វង្សាអ្នកនាង លី ម៉ារីណា កាលពីអំឡុងដើមឆ្នាំ ២០២២ កន្លងទៅ បានធ្វើឲ្យអ្នកគាំទ្រមានការភ្ញាក់ផ្អើលគ្រប់គ្នា ក្រោយនាងប្រកាសជាសាធារណៈជុំវិញការផ្ដាច់ចំណងស្នេហាជាមួយអតីតស្វាមី បន្ទាប់ពីសាងសុភមង្គលអស់រយៈពេលច្រើនឆ្នាំមកនោះ។

មូលហេតុដែលនាងសម្រេចលែងលះជាមួយអតីតស្វាមីអាណិកជនខ្មែររស់នៅអាមេរិក ត្រូវបានតារាសម្ដែងអ្នកនាង លី ម៉ារីណា បញ្ជាក់ថា មកពីរស់នៅមិនចុះសម្រុងនឹងគ្នា បន្ទាប់ពីរួមរស់ជាមួយគ្នាអស់ជាច្រើនឆ្នាំ ដោយទទួលបានកូនប្រុសមួយរូបជាចំណងដៃ៕

អត្ថបទ ៖ ចាន់រ៉ា