ព័ត៌មានជាតិ
ឌីជេ ណាណា លើកទឹកចិត្តកុំឱ្យក្មេងស្រីរៀបការលឿនពេក យកឱកាសរៀនសូត្រឱ្យបានច្រើន
“រៀនឱ្យបានខ្ពស់ ដូចពោងសុវត្ថិភាពរបស់យើងកាន់តែធំ ជម្រើសកាន់តែច្រើន”។ នេះគឺជាការលើកឡើងរបស់លោកស្រី នាង សុវ៉ាតនា (ហៅថា ឌីជេ ណាណា) ណែនាំដល់កុមារី ក្មេងស្រី និងយុវជន កុំឱ្យឆាប់រៀបការទាំងវ័យក្មេងពេក គួរយកពេលវេលារៀនសូត្រ និងត្រៀមសម្រាប់ជីវិតជាមុនសិន។
លោកស្រី នាង សុវ៉ាតនា (ហៅថា ឌីជេ ណាណា) លើកឡើងបែបនេះក្នុងនាមជាទូតកិត្តិយសរបស់អង្គការភ្លែនអន្តរជាតិកម្ពុជា នៅក្នុងកម្មវិធីកិច្ចសន្ទនាក្មេងស្រីដឹកនាំថ្នាក់ជាតិ ក្រោមប្រធានបទ “ការលើកកម្ពស់ភាពជាអ្នកដឹកនាំរបស់ក្មេងស្រី និងសមភាពយេនឌ័រ ដើម្បីលុបបំបាត់ការបោះបង់ការសិក្សា និងការរៀបអាពាហ៍ពិពាហ៍វ័យកុមារ”។ កម្មវិធីនេះ រៀបចំដោយអង្គការភ្លែនអន្តរជាតិកម្ពុជា នៅថ្ងៃទី៣១ ខែឧសភា ឆ្នាំ២០២៣នេះ។
តាមការសង្កេត កុមារ ក្មេងស្រី និងយុវជនបោះបង់ការសិក្សាក្រោមហេតុផលផ្សេងៗជាច្រើន ឬរៀបការទាំងនៅក្មេងខ្ចី ដែលនាំឱ្យពួកគេបាត់បង់ឱកាសរៀនសូត្រ និងមិនមានពេលវេលាគ្រប់គ្រាន់សម្រាប់រៀបចំផែនការជីវិត។ អ្វីដែលកាន់តែពិបាកនោះ គឺប្រសិនបើពួកគេមានកូនទាំងវ័យក្មេងទៀត នោះនឹងធ្វើឱ្យមានផលប៉ះពាល់ជាច្រើន ទាំងសុខភាព សេដ្ឋកិច្ច ធនធានមនុស្ស និងបញ្ហាជាច្រើនទៀត។
លោកស្រី នាង សុវ៉ាតនា បានរំលឹកថា លោកស្រីស្រឡាញ់គ្នារយៈពេល១០ឆ្នាំទើបសម្រេចចិត្តរៀបការក្នុងវ័យ៣០ឆ្នាំ។ វ័យនេះ ជាវ័យមួយដែលមនុស្សគ្រប់គ្នាយល់ថាចាស់ ហួសអាយុរៀបការ។ ប៉ុន្តែ សម្រាប់លោកស្រីវិញ នេះ គឺជាវ័យមួយដែលលោកស្រីបានរៀនសូត្រ ធ្វើការ និងត្រៀមខ្លួនរួចរាល់សម្រាប់មានគ្រួសារ និងចិញ្ចឹមកូនប្រកបដោយព្រហ្មវិហារធម៌។ លោកស្រីបានបញ្ជាក់ថា ៦ឆ្នាំនៃចំណងអាពាហ៍ពិពាហ៍មានកូនប្រុសចំនួន២នាក់ ដោយកូនប្រុសពៅទើបតែសម្រាលបាន៣ខែប៉ុណ្ណោះ។ លោកស្រីបានយកចិត្តទុកដាក់ចិញ្ចឹម និងមើលថែកូនជាខ្លាំង បង្រៀនកូនឱ្យស្រឡាញ់សៀវភៅ និងចូលចិត្តអានសៀវភៅ ដោយមិនបង្រៀនកូនឱ្យកាន់ទូរស័ព្ទដូចកូនគេដទៃឡើយ។ លោកស្រីជឿជាក់ថា នៅពេលអនាគត កូនប្រុសរបស់លោកស្រី នឹងក្លាយជាទំពាំងមួយដ៏ល្អរបស់ជាតិ។
លោកស្រីទទួលស្គាល់ថា ក្នុងវ័យនេះ មានកូនតូចជារឿងមួយមិនងាយស្រួល ប៉ុន្តែ លោកស្រីក៏មិនស្តាយក្រោយក្នុងការជ្រើសរើសរៀបការនៅវ័យ៣០ឆ្នាំនោះទេ ព្រោះលោកស្រីបានត្រៀមរួចជាស្រេចចំពោះបញ្ហាដែលនឹងកើតមាននៅពេលមានគ្រួសារ។ ដូច្នេះ ឌីជេ ណាណា ក៏បានលើកទឹកចិត្តដល់កុមារ ក្មេងស្រី និងយុវជន គួរសង្វាតខិតខំសិក្សាឱ្យបានច្រើន ដើម្បីអាចសម្រេចក្តីស្រមៃរបស់ខ្លួនបាន និងចេះរៀបចំគម្រោងសម្រាប់ជីវិតបានល្អប្រសើរតាមរយៈបទពិសោធន៍ផ្សេងៗ ទាំងការគិត និងការសម្រេចចិត្តក្នុងកិច្ចការអ្វីមួយ។
សូមជម្រាបថា លោកស្រី នាង សុវ៉ាតនា ហៅថា ឌីជេ ណាណា គឺជាបុគ្គលមានឥទ្ធិពលម្នាក់នៅក្នុងបណ្តាញសង្គមហ្វេសប៊ុក ក៏ជាបុគ្គលមួយរូបដែលតែងតែចែករំលែកពីបទពិសោធន៍ល្អៗក្នុងជីវិត ការអប់រំ បញ្ហាសុខភាព បញ្ហាជីវិតប្រចាំថ្ងៃ គន្លឹះបីបាច់កូនជាដើម។ លើសពីនេះ លោកស្រីក៏បានធ្វើការយ៉ាងជិតស្និទ្ធជាមួយរដ្ឋាភិបាល អង្គការក្រៅរដ្ឋាភិបាលជាច្រើនក្នុងការលើកស្ទួយសមភាពយេនឌ័រនៅក្នុងសង្គម ជាពិសេស គឺជួយអប់រំ ការពារស្រ្តី និងក្មេងស្រីដែលងាយរងគ្រោះ៕
-
កីឡា៧ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៥ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
ព័ត៌មានអន្ដរជាតិ២០ ម៉ោង ago
Breaking News! បណ្ដាញសង្គម Facebook មានបញ្ហានៅទូទាំងពិភពលោកជាថ្មី
-
សន្តិសុខសង្គម១ សប្តាហ៍ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ព័ត៌មានជាតិ៦ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ព័ត៌មានអន្ដរជាតិ៥ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
ជីវិតកម្សាន្ដ៦ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ
-
ព័ត៌មានអន្ដរជាតិ១ សប្តាហ៍ ago
នាវាចម្បាំងថៃ ច្រឡំដៃបាញ់កាំភ្លើងធំ ចំនាវាគ្នាឯង