ព័ត៍មានទាន់​ហេតុការណ៏
Search

កម្លាំង​សមត្ថកិច្ច​ ចាប់​ឃាត់​សាំ​យ៉ុង​០១​គ្រឿង​ ដឹក​ឈើ​ពេញ​ណែន​គ្មាន​ច្បាប់​អនុញ្ញាត​

ព្រះវិហារ ៖ កាលពី​រសៀល​ថ្ងៃទី​១៦ ​ខែ​កុម្ភៈ ឆ្នាំ​២០១៧ ​អាជ្ញាធរ​ស្រុក​ឆែប​ និង​មន្ត្រី​រដ្ឋបាល​ព្រៃឈើ​កំពង់​ស្រ​ទ្បៅ​ម្លូរ​ព្រៃ​ បាន​ចុះ​បង្ក្រាប​បទល្មើស​ព្រៃឈើ​ដោយ​ចាប់​ឃាត់​រថយន្ត​សាំ​យ៉ុង​០១​គ្រឿង​កំពុង​ធ្វើ​សកម្មភាព​ដឹកជញ្ជូន​ឈើ​អារ​លេខ​២​ខុសច្បាប់​ពេញ​ណែន​ស្ថិតនៅ​ភូមិ​ពោធិ៍​ទាប​ ឃុំម្លូរ​ព្រៃ​១​ ស្រុក​ឆែប​។ ម្ចាស់​បទល្មើស​ព្រៃឈើ​បាន​យល់ព្រម​ចូលខ្លួន​ដោះស្រាយ​បង់​ប្រាក់​ពិន័យ​ជាមួយ​សមត្ថកិច្ច​ផងដែរ។

នាយ​សង្កាត់​រដ្ឋបាល​ព្រៃឈើ​កំពង់​ស្រ​ទ្បៅ​ម្លូរ​ព្រៃ ​លោក​សេង​ លាង​ បាន​មានប្រសាសន៍​ឲ្យ​ដឹង​កាលពី​រសៀល​ថ្ងៃទី​១៧​ ខែ​កុ​ម្ភៈ​ថា​ រថយន្ត​ដឹក​ឈើ​អារ​ប្រភេទ​ផ្តៀក​ គ្មាន​លិខិត​អនុញ្ញាត​ពី​រដ្ឋបាល​ព្រៃឈើ​ខាងលើ​ម៉ាក​សាំ​យ៉ុង​ ពណ៌​ខៀវចាស់​ ពាក់​ស្លាក​លេខ​ ភ្នំពេញ​2P-0367 ត្រូវ​បាន​ចាប់​ឃាត់​កាលពី​វេលា​ម៉ោង​៤​និង​១៥​នាទី​រសៀល​ ថ្ងៃ​ទី​១៦ ​ខែ​កុ​ម្ភៈ ​ឆ្នាំ​២០១៧។

លោកនាយ​សង្កាត់រដ្ឋបាល​ព្រៃឈើ​បន្ត​ថា ​មុន​ចុះប​ង្ក្រាប​បទ​លើ្ម​ស​ព្រៃឈើ​នេះ​ លោក​បាន​រាយការណ៍​សុំ​ការ​អនុញ្ញាត​ពី​លោក​ព្រះរាជា​អាជ្ញា​អម​សាលាដំបូង​ខេត្ត​ព្រះវិហារ​ផងដែរ​ ក្នុង​នោះ​បាន​សហការ​ជាមួយ​ លោក ​សុខ​ មុន្នី​រិ​ទ្ធ ​អភិបាលរង​ស្រុក​ឆែប​ និង​កម្លាំង​នគរបាល​ស្រុក​ឆែប​ជាច្រើន​នាក់​ទៀត​។ វត្ថុ​តាង​ឈើ​នៅ​លើ​រថយន្ត​ល្មើស​មាន​ចំនួន​២៣៥​សន្លឹក​ប្រភេទ​ឈើ​ផ្តៀក​ស្មើនឹង​៤,៣៧៥​ម៉ែត្រ​គូប ​បាន​យក​ទៅ​រក្សាទុក​នៅ​ផ្នែក​រដ្ឋបាល​ព្រៃឈើ​ឆែប​រីឯ​ម្ចាស់​ឈើ​ឈ្មោះ​ឆាយ​ប៊ុន​ទ្បេ​ង ​រស់នៅ​ភូមិ​ស្តៅ​ ឃុំ​ស្តៅ​ ស្រុក​សង្គម​ថ្មី​ ខេត្ត​ព្រះវិហារ​បាន​យល់ព្រម​ចូលខ្លួន​ទៅ​ដោះស្រាយ​បង់​ប្រាក់​ផាក​ពិន័យ​១​គុណ​នឹង​៣​ផង​ដែរ​៕



ប្រសិនបើ លោក លោកស្រីចង់ចែករំលែកនូវព័ត៌មានទាន់ហេតុការណ៍ផ្សេងៗ សូមផ្ញើ អ៊ីម៉ែលមកកាន់អាសយដ្ឋានដូចដែលបានបង្ហាញខាងក្រោម។ សម្រាប់ការផ្សាយពាណិជ្ជកម្មលើគេហទំព័រនេះ សូមទំនាក់ទំនងតាមលេខទូរស័ព្ទៈ 016 877 684