ព័ត៍មានទាន់​ហេតុការណ៏
Search

ឡុង សុ​ភី អាច​ឈ្នះ Atha Phon ឬ​អត់ ក្នុងជំនួប​លើកដំបូង​នេះ​

•​​សូត្រ ប៊ុន​ធី ជួប Youk Phit
​ឡុង សុ​ភី អ្នក​ប្រដាល់​ក្លិប​សាល​វ័​ន្ត​កីឡា ត្រូវគេ​ផ្គូ​ឲ្យ​ជួប​ ប្រកួត​ជាមួយ​អ្នក​ប្រដាល់​ថៃ​Atha Phon នៅលើ​សង្វៀន​SEA-TV នា​ព្រឹក​ថ្ងៃអាទិត្យ​ទី​២៦​ ខែកុ​ម្ភៈ ឆ្នាំ២០១៧​នេះ​។​

នេះ​ជា​ជំនួប​លើកដំបូង របស់​អ្នក​ប្រដាល់​ទាំងពីរ​នាក់​នេះ។​ ពួកគេ​ជួបគ្នា​ក្នុង​​ ទម្ងន់​៦៧​គីឡូក្រាម។ សម្រាប់​ជំនួប​លើកដំបូង​នេះ ឡុង សុ​ភី មិនដឹងថា​អាច​យកឈ្នះ​Atha Phon​នេះ បាន​ឬ​អត់​នោះទេ​?។

Atha Phon គេ​ជា​ម្ចាស់​ខ្សែក្រវាត់ ដែលមាន​ប្រវត្តិ​ប្រកួត​៧៦​លើក ឈ្នះ​៦២​លើក ចាញ់​១៣​លើក និង​ស្មើ​០១​លើក។ អ្នក​ប្រដាល់​ថៃ​រូបនេះ មាន​កម្ពស់​ប្រហាក់ប្រហែល​ឡុង ​សុ​ភី​ដែរ ដោយមាន​កម្ពស់​១,៧០​ម៉ែត្រ ខ​ណៈ​ដែល​សុ​ភី​គេ​មាន​កម្ពស់​១,៧២​ម៉ែត្រ ហើយ​ថែមទាំង​វាយ​មាន​ផ្លែ​ល្អ​ថែមទៀត ។​នេះ​បើតាម​អ្នកចាត់ចែង​កម្មវិធី​ប្រដាល់​ប្រចាំ​SEATV ឲ្យ​ដឹង​នោះ​។​

ទោះជា​យ៉ាងណា ឡុង សុ​ភី បាន​អះអាងថា គេ​មិន​ខ្លាចញញើត​ឡើយ។​ សុ​ភី ក៏​ជា​ម្ចាស់​ខ្សែក្រវាត់​បី​បួន​ស្ថាប័ន​ឯណោះ។​ ឡុង សុ​ភី ជា​អ្នក​ប្រដាល់​ដែលមាន​ចិត្ត​ប្រដាល់​ធំ ហ៊ាន​វាយ​ប្តូរ ​ជាមួយ​គូប្រកួត​ ដោយ​មិន​ញញើត​នោះឡើយ ដើម្បី​ប្តូរ​យកជ័យ​ជំនះ​ នៅពេលដែល​ស្ថានភាព​ប្រកួត​របស់គេ​មាន​សភាព​ចាញ់​ប្រៀប​គូប្រកួត គឺ​គេ​ប្តូ​រហើយ។
​យ៉ាងណា សម្រាប់​ការជួបគ្នា​នេះ ក្រុមអ្នកវិភាគ​ប្រដាល់​ក្នុងស្រុក​ នៅតែ​រំពឹងថា ឡុង សុ​ភី អាចនឹងទទួល​បាន​ជ័យជំនះ​ទៀត ព្រោះ​ឡុង សុ​ភី ពេលនេះ​មាន​កម្លាំង​កាយសម្បទា​រឹងមាំ​ដូច​ពីមុន​ដែរ។​

ឡុង សុ​ភី គេ​មាន​ប្រវត្តិ​ប្រកួត​ចំនួន​១៣១​លើក ឈ្នះ​៩៨​លើក ចាញ់​២៥​លើក និង​ស្មើ​០៨​លើក ។ ដូច្នេះ ចាំមើល ឡុង សុ​ភី និង Atha Phon តើ​អ្នកណា​ជា​អ្នកឈ្នះ​នៅ​ក្នុ ង ការជួបគ្នា​លើកដំបូង​នេះ ? ។ សុ​ភី ប្រកួត​ជាមួយ​ថៃ​ចុង​ក្រោយនេះ គេ​វាយ​ឈ្នះ​គឹកកង រ៉​.​យ៉ាក់​សុ​ធន់ ក្នុង​ទឹក​ទី​៤ ។​ ចំពោះ សូត្រ ប៊ុន​ធី អ្នក​ប្រដាល់​ក្លិប​បក្សី​ស្លាប​ដែក ត្រូវ​ជួប​ជាមួយ​អ្នក​ប្រដាល់​ថៃ​ឈ្មោះ​Youk Phit។ ពួកគេ​ប្រកួត​គ្នា​ក្នុង​ប្រភេទ​ទម្ងន់​៦០ គីឡូក្រាម។​

Youk Phit នេះ ជា​អ្នក​ប្រដាល់​ថៃ​ចំណូល​ថ្មី គេ​មិន​ធ្លាប់​មក​ប្រកួត​នៅ​កម្ពុជា​ទេ​កន្លងមក។ បើតាម​លោក ញាណ សុធី អ្នក​ផ្គូផ្គង​ប្រចាំ​សង្វៀន​SEA-TV បាន​ប្រាប់​អោយដឹងថា Youk Phit នេះ គេ​ជា​អ្នក​ប្រដាល់​ជើង​ខ្លាំង​ស្រករ​ក្រោយ​នៅ​ស្រុកថៃ ក្នុង​ប្រភេទ​ទម្ងន់​៦០​គ​.​ក្រ​នេះ។ អ្នក​ប្រដាល់​ថៃ​រូបនេះ គេ​វាយ​ខ្លាំង​និង​ល្អ។
​អ្នក​ប្រដាល់​ថៃ​រូបនេះ មានកំនត់​ត្រា​ប្រកួត​ចំនួន​៧៣​លើក ឈ្នះ​៦២​លើក ចាញ់​១០​លើក និង ស្មើ​០១​លើក ។ ទោះជា​យ៉ាងណា អ្នក​ប្រដាល់​ថៃ​រូបនេះ មិន​ប្រាកដថា​អាច​ឈ្នះ​សូត្រ ប៊ុន​ធី បាន​នោះឡើយ ព្រោះថា​ប៊ុន​ធី​ពេលនេះ គេ​រឹងមាំ​ទាំង​កាយសម្បទា ខ្លាំង​ទាំង​ស្នៀត​ប្រដាល់ បន្ទាប់ពី​គេ​ជួប​ប្រកួត​ជាមួយ​ថៃ​ច្រើន​នាក់​កន្លងមកនេះ។​

សូត្រ ប៊ុន​ធី ឥឡូវ​គេ​ជា​ជើង​ខ្លាំង​ស្រករ​ក្រោយ​របស់​កម្ពុជា​ក្នុង​ប្រភេទ​ទម្ងន់​៦០​គីឡូក្រាម​នេះ ។​ក្រោយពេល​ឆ្លងកាត់​ការប្រកួត​ជាមួយ​ថៃ​២០​លើក ដោយ​ឈ្នះ ១១ លើក ចាញ់ ៣ លើក និង​ស្មើ​៦​លើក​នោះ បានធ្វើ​ឲ្យ​គេ​មានបទពិសោធន៍​ច្រើន​ក្នុង​ការប្រកួត ដោយ​គេ​វាយ​ជាមួយ​ថៃ​ដូច​វាយ​ជាមួយ​ខ្មែរ​គ្នាឯង​អីចឹង គឺ​គ្មាន​ញញើត​ខ្លាច​អ្វី​បន្តិច​ទេ។ ប៊ុន​ធី មាន​កណ្តាប់ដៃ​ល្អ វាយ​ចេញចូល​រហ័ស ហើយ​ស្នៀត​ទាត់​និង​ជង្គង់ កែង ក៏​ល្អ​ថែមទៀត។

Youk Phit អ្នក​ប្រដាល់​ថៃ​រូបនេះ មាន​កម្ពស់​ទាប​ជាង​សូត្រ ប៊ុន​ធី​បន្តិច គឺ​១,៦៦​ម៉ែត្រ ខ​ណះ​ដែល​ប៊ុន​ធី​គេ​មាន​កម្ពស់​១,៧១​ម៉ែត្រ ។ តែ​ប្រវត្តិ​ប្រកួត​របស់​ពួកគេ​ទាំងពីរ​គឺ​ប្រហាក់ប្រហែលគ្នា​ទេ ដែល​សូត្រ ប៊ុន​ធី អ្នក​ប្រដាល់​កម្ពុជា​យើង​ប្រកួត​បាន​ចំនួន​៨៩​លើក ឈ្នះ​៧០​លើក ចាញ់​១៣ លើក និង​ស្មើ​៦​លើក។​

ការប្រកួត​លើកចុងក្រោយ​ជាមួយ​ថៃ ប៊ុន​ធី​វាយ​ឈ្នះ​Vath Chhalaklek ដោយ​ពិន្ទុ ។ ជា​អ្នក​ប្រដាល់​ដែលមាន​កាយសម្បទា​ល្អ ខ្ពស់ ដៃជើង​វែង​នោះ អំណោយផល​ក្នុង​ការប្រើ​ជង្គង់ កែង ហើយ​កណ្តាប់ដៃ​លឿន រហ័ស និង​ខ្លាំង​នោះ ប៊ុន​ធី វាយ​មិន​ញញើត​នោះឡើយ​។​ចាំមើល រវាង​សូត្រ ប៊ុន​ធី និង Vath Chhalaklek ជួបគ្នា​លើក​នេះ តើន​រណា​ឈ្នះ​នោះ ?។​

ចំពោះ ការប្រកួត​រវាង​អ្នក​ប្រដាល់​រួម​ជាតិ​វិញ អាំង សំអាត​អ្នក​ប្រដាល់​ក្លិប​តា​ព្រហ្ម​មានជ័យ គេ​នឹងត្រូវ​ជួប​ជាមួយ​កំពែង ខ្មៅ អ្នក​ប្រដាល់​សមាគម​កីឡា​ក្រសួងការពារជាតិ ។ ពីរ​នាក់​នេះ ប្រកួត​គ្នា​ក្នុង​ទម្ងន់​៥៤​គីឡូក្រាម ។​ពីរ​នាក់​នេះ ពុំដែល​ប៉ះគ្នា​ម្តងណា​នៅឡើយ​ទេ ។​អ្នកណា​ឈ្នះ អ្នកណា​ចាញ់​នោះ មិនអាច​ទាយ​មុន​បានឡើយ។​

ណ​ក់ ស៊ីនួន អ្នក​ប្រដាល់​ក្លិប​ឃ្លាំងមឿង​កីឡា​ខេត្តកណ្តាល នឹង​ឡើង​មកជួប​ប្រកួត​ជាមួយ សេក មេសា​អ្នក​ប្រដាល់​ក្លិប​អង្គរ​មានជ័យ​ខេត្តសៀមរាប។ ​ពីរ​នាក់​នេះ ជួបគ្នា​ក្នុង​ទម្ងន់​៥៤​គីឡូក្រាម ។​ចាំមើល ណ​ក់ ស៊ីនួន ឈ្នះ ឬក៏​សេក មេសា ឈ្នះ សម្រាប់​ជំនួប​លើក​ទី​១​របស់​ពួកគេ​នេះ៕​





ប្រសិនបើ លោក លោកស្រីចង់ចែករំលែកនូវព័ត៌មានទាន់ហេតុការណ៍ផ្សេងៗ សូមផ្ញើ អ៊ីម៉ែលមកកាន់អាសយដ្ឋានដូចដែលបានបង្ហាញខាងក្រោម។ សម្រាប់ការផ្សាយពាណិជ្ជកម្មលើគេហទំព័រនេះ សូមទំនាក់ទំនងតាមលេខទូរស័ព្ទៈ 016 877 684