ព័ត៍មានទាន់​ហេតុការណ៏
Search

ន​ន់ ជំនិត ជួប​ឌុន រដ្ឋា ខ​ណៈថន វាសនា សងសឹក ចាន់​ ចំរើន​

​ន​ន់ ជំនិត អ្នក​ប្រដាល់​ក្លិប​មជ្ឈមណ្ឌល​កំចាត់មីន​កម្ពុជា នឹងត្រូវ​ជួប​ប្រកួត​ជាមួយ​ឌុន រដ្ឋា​ អ្នកប្រដាល់​ក្លិប​អេ​ភូ​ថង​កីឡា នៅ​ល្ងាច​ថ្ងៃអាទិត្យ​ទី​២៦ ខែ​កុ​ម្ភៈ ឆ្នាំ២០១៧​នេះ នៅលើ​សង្វៀន​បាយ័ន​បឹង​ស្នោ​។ នេះ​ជាការ​ប្រកួត​ជម្រុះ​លើក​ទី​២ របស់​អ្នក​ប្រដាល់​ទាំង​២​នាក់​នេះ ក្នុង​ព្រឹត្តិការណ៍​ប្រកួត​ប្រដាល់​ដណ្តើម​ខ្សែក្រវាត់​Leo​ទម្ងន់​៦៧​គ​.​ក្រ។



សម្រាប់​ការជួបគ្នា​រវាង​ន​ន់ ជំនិត និង ឌុន រដ្ឋា នេះ ពួកគេ​ធ្លាប់​ជួបគ្នា​ម្តង​ហើយ ​មុន​ចូលរួម​ប្រកួត​ជម្រុះ​ដណ្តើម​ខ្សែក្រវាត់​(២១​សីហា​២០១៦)។ សម្រាប់​ពួកគេ​ទាំងពីរ​ប៉ះគ្នា​លើក​ទី​២​នេះ បើតាម​ការកត់សម្គាល់​ពី​សមត្ថភាព​ឡើង​ប្រកួត​ក្នុង​ជុំ​ទី​១ និង​ការជួបគ្នា​កន្លងមក​នោះ គឺ អ្នក​ប្រដាល់ ន​ន់ ជំនិត ប្រហែលជា​មិនអាច​ឈ្នះ​ឌុន រដ្ឋា នោះឡើយ។

ឌុន រដ្ឋា គេ​ជា​ជើង​ខ្លាំង​ និង​ជា​ជើងចាស់ ដែល​ធ្លាប់​វាយ​ឈ្នះ​ចាញ់​ជាមួយ​អ្នក​ប្រដាល់​ជើង​ខ្លាំង​ក្នុងស្រុក ធ្វើឲ្យ​កេរ្តិ៍ឈ្មោះ​របស់គេ​ល្បី​គួរសម​ដែរ។ មួយរយៈ​ចុងក្រោយ​នេះ រដ្ឋា​មានការ​វិវត្តន៍​ឈានឡើង​ច្រើន ក្រោយពី​គេ​វាយ​ឈ្នះ​បី​ប្រកួត​ចុងក្រោយ​នេះ។
​ន​ន់ ជំនិត គេ​ក៏​ជា​ជើងចាស់​ដែរ។ តែ​យ៉ាងណា ឌុន រដ្ឋា មាន​កម្លាំង​រឹងមាំ ​និង​ខ្លាំង​ជាង។ ថ្វីត្បិតតែ រដ្ឋា មាន​កណ្តាប់ដៃ​ខ្លាំង ប៉ុន្តែ​គេ​វាយ​រាង​ស្ពឹក​បន្តិច តែ​បន្លាស់​ទី​រហ័ស វាយ​ចេញ​លឿន ហើយ​ចំ​គោលដៅ​ថែមទៀត ការប្រកួត​ចុងក្រោយ​របស់​ឌុន រដ្ឋា គឺ​វាយ​ឈ្នះ ឯម វុត្ថា​អ្នក​ប្រដាល់​ក្លិប​ឫទ្ធី​ពោធិ​សែន​ជ័យ​ក្នុង​ទឹក​ទី​២​។



ចំណែក ន​ន់ ជំនិត បើទោះបីជា​អ្នក​ប្រដាល់​រដ្ឋា​ វាយ​ខ្លាំង​ និង​មាន​ផ្លែ​ល្អ​ក៏ដោយ ក៏​គេ​មិន​ញញើត​ដែរ ហើយ​លើក​នេះ​ឌុន រដ្ឋា មិន​ប្រាកដថា​ឈ្នះ​ន​ន់ ជំនិត នោះដែរ ព្រោះ រដ្ឋា ​មិនល្អ ​និង​ខ្លាំង​ជាង​ជំនិត​ប៉ុន្មាន​ដែរ​ទេ។ តែ​យ៉ាងណា ន​ន់ ជំនិត ក៏​មិន​ប្រាកដថា​ឈ្នះ ឌុន រដ្ឋា នោះដែរ។​
​កាលពី​ប្រកួត​លើក​ទី​១ ន​ន់ ជំនិត​ប្រកួត​ចាញ់ អ្នក​ប្រដាល់​ថៃ Laypayak ដោយ​ពិន្ទុ​។ ន​ន់ ជំនិត គេ​ស៊ូ​ចំពោះ​ការប្រកួត។​ ដូច្នេះ​ឌុន រដ្ឋា ជួប​ជំនិត​លើក​នេះ ក៏​មិនអាច​វាយ​មើលស្រាល​ជំនិត​បានដែរ ព្រោះ​បើសិនជា​ហ៊ាន​ធ្វេស​ប្រហែល​នោះ អាច​នឹង​ចាញ់​កណ្តាប់ដៃ​របស់​ ន​ន់ ជំនិត​ មិន​ខាន។​ទោះជា​យ៉ាងណា សម្រាប់​ការប្រកួត​លើក​ទី​២​នេះ មិនដឹងថា​នរណា​ នឹង​រកបាន​៣​ពិន្ទុ​នោះទេ រវាង​ន​ន់ ជំនិត និង ឌុន រដ្ឋា នេះ ?​។​

ចំពោះ​ការប្រកួត​គូ​ក្រៅពី​គូ​ខ្សែក្រវាត់​នេះ ថន វាសនា អ្នក​ប្រដាល់​ក្លិប​នាគរាជ​មានជ័យ ត្រូវគេ​ផ្តល់​ឪ​កាស​ឲ្យ​ឡើង​សងសឹក​ចាន់ ចំរើន អ្នក​ប្រដាល់​ក្លិប​និរោធ​មានជ័យ។​ ពួកគេ​ជួបគ្នា​ក្នុង​ប្រភេទ​ទម្ងន់​៦០​គីឡូក្រាម។ ពួកគេ​ពីរ​នាក់​នេះ ធ្លាប់​ជួបគ្នា​ម្តង​ហើយ ​កាលពី​ថ្ងៃទី​២៩ ខែ​មករា​ ឆ្នាំ២០១៧ កន្លងមក ដោយ ចាន់ ឈ្នះ​ថន​វាសនា​ដោយ​ពិន្ទុ។ សម្រាប់​ការជួប​សងសឹក​នេះ គេ​មិនដឹងថា ថន វាសនា អាច​យកឈ្នះ​ចាន់ ចំរើន បាន​ឬ​អត់​នោះទេ? ហើយ ចំរើន ក៏​មិនដឹងថា​អាច​ឈ្នះ វាសនា បាន​ទៀត​ ឬ​អត់​នោះដែរ​? ​ព្រោះថា ចាន់ ចំរើន ដែលជា​អ្នក​ប្រដាល់​វាយ​ខ្លាំង​នោះ ពេលខ្លះ​ក៏​វាយ​អន់​ដែរ ពិសេស​ការប្រកួត​ចុងក្រោយ​នេះ គេ​បាន​វាយ​ចាញ់​សេង ស្រឿ​ន អ្នក​ប្រដាល់​ក្លិប​ម​ហិ​ទ្ធ​រិ​ទ្ធ​តា​ដំបង​ដែក ដោយ​ពិន្ទុ​កាលពី​ថ្ងៃទី​១១ ខែ​កុ​ម្ភៈ​កន្លងមកនេះ។ ​ចំណែក ការប្រកួត​ចុងក្រោយ​របស់​ថន វាសនា​វិញ គេ​បាន​ផ្តួល​យកឈ្នះ ឡុង ជិន អ្នក​ប្រដាល់​ក្លិប​ខ្លារខិន​មាន​រិ​ទ្ធ ក្នុង​ទឹក​ទី​២ កាលពី​ចុង​សប្តាហ៍​កន្លងមកនេះ។​ ​ដូច្នេះ ចាំមើល​រវាង​ថន វាសនា និង ចាន់ ចំរើន ជួបគ្នា​លើក​នេះ តើនរណា​ជា​អ្នកឈ្នះ​នោះ​? ។​



ឡេង លី អ្នក​ប្រដាល់​ក្លិប​ឫទ្ធី​ពោធិ​សែន​ជ័យ នឹង​ជួប​ប្រកួត​ជាមួយ​វុត្ថា ប៊ុន​ធាង អ្នក​ប្រដាល់​ក្លិប​អង្គរ​ធំគុន​ខ្មែរ ដោយ​ប្រកួត​ក្នុង​ទម្ងន់​៦៧​គីឡូក្រាម។ ពីរ​នាក់​នេះ មិន​ធ្លាប់​ជួបគ្នា​ទេ​កន្លងមក។​ ដូច្នេះ សម្រាប់​ការជួបគ្នា​លើក​នេះ មិនដឹងថា​អ្នកណា​ឈ្នះ អ្នកណា​ចាញ់​នោះឡើយ​? ។​
​ចៅ ស្តាយ អ្នក​ប្រដាល់​ក្លិប​សុភា​នូ​មានជ័យ ត្រូវគេ​ផ្គូ​ឲ្យ​ជួប​ប្រកួត​ជាមួយ សាំង គីម អ្នក​ប្រដាល់​ក្លិប​អេ​ភូ​ថង​កីឡា។ រវាង​ពួកគេ​ទាំងពីរ​នេះ ក៏​ពុំដែល​ប៉ះគ្នា​ដែរ​កន្លងមក៕​



ប្រសិនបើ លោក លោកស្រីចង់ចែករំលែកនូវព័ត៌មានទាន់ហេតុការណ៍ផ្សេងៗ សូមផ្ញើ អ៊ីម៉ែលមកកាន់អាសយដ្ឋានដូចដែលបានបង្ហាញខាងក្រោម។ សម្រាប់ការផ្សាយពាណិជ្ជកម្មលើគេហទំព័រនេះ សូមទំនាក់ទំនងតាមលេខទូរស័ព្ទៈ 016 877 684