ព័ត៍មានទាន់​ហេតុការណ៏
Search

ចិន​ចាប់ផ្តើម​ការងារ​ថ្មី​ នៅ​កោះ​នៃ​សមុទ្រ​ចិន​ខាងត្បូង ​ដែលមាន​ជម្លោះ​

រូបភាព​ផ្កាយរណប​ថ្មី​បាន​បង្ហាញថា ប្រទេស​ចិន​បានចាប់ផ្តើម​ការងារ​សាងសង់​ថ្មី​នៅ​សមុទ្រ​ចិន​ខាងត្បូង​ដែលមាន​ជម្លោះ​ដែល​នេះ​ជាស​ញ្ញា​មួយ​ថា រដ្ឋាភិបាល​ក្រុង​ប៉េកាំង​កំពុង​បន្ត​ពង្រឹង យោធា​របស់ខ្លួន​ឲ្យ​ឈានទៅដល់​ទូទាំង​ផ្លូវទឹក​ពាណិជ្ជកម្ម​ដ៏​សំខាន់​មួយ​នេះ​។​

អនុព័ន្ធយោធា​ក្នុង​តំបន់​និង​ក្រុម​អ្នកជំនាញ​ជឿថា ការងារ​នេះ​បានបង្ហាញ​ពី​ការប្តេជ្ញាចិត្ត​របស់​ប្រទេស​ចិន ​ក្នុង​ការកសាង​បណ្តាញ​នៃ​ថ្ម​ប៉ប្រះ​ទឹក ​និង​កូន​កោះ​របស់ខ្លួន​បើទោះបីជា​ចិន​កំពុង​ព្យាយាម​បញ្ជៀ​សការ​ប្រឈមមុខ​ដាក់គ្នា​ថ្មី​ជាមួយ​រដ្ឋបាល​ថ្មី​របស់លោក​ប្រធានាធិបតី​សហរដ្ឋអាមេរិក Donald Trump ក៏ដោយ​។​

រូបភាព​មួយ​នៃ​កោះ North ក្នុង​ប្រជុំ​កោះ Paracel ដែល​ថត​នៅ​ថ្ងៃទី​៦ ​ខែមីនា​ បានបង្ហាញ​ពី​ការងារ​ថ្មី​ដោយ​រួមទាំង​ការឈូសឆាយដី​ និង​ការរៀបចំ​សម្រាប់​កំពង់ផែ​ផងដែរ​ ដើម្បី​គាំទ្រ​ដល់​អ្វីដែល​ក្រុម​អ្នកជំនាញ​ជឿថា​អាច​នឹងមាន​ការសាងសង់​ផ្នែក​យោធា​ជាយថាហេតុ។ ការងារ​ដំបូង​ត្រូវបាន​បំផ្លាញ​ដោយ​ព្យុះ​ទី​ហ្វុ​ង​មួយ​កាលពី​ឆ្នាំមុន​។​

រូបភាព​ដែល​ផ្តល់​ដោយ​ក្រុមហ៊ុន​ផ្កាយរណប​ឯកជន Planet Labs ក្រោយ​របាយការណ៍​នៅក្នុង​ខែមករា​ បានបង្ហាញ​ពី​ការងារ​ដែល​អនុវត្ត​លើ​កោះ Tree នៅក្បែរនោះ​ និង​កោះ​ផ្សេងទៀត​ក្នុង​ប្រជុំ​កោះ Paracel ដែល​ក៏ត្រូវ​បានទាមទារ​ ដោយ​ប្រទេស​វៀតណាម​ និង​តៃវ៉ាន់​ផងដែរ​។​

ក្រុម​អ្នកការទូត​ដែល​វាយតម្លៃ​ការ​ឈ្លបយកការណ៍​ចុងក្រោយ​បំផុត​របស់លោក​ខាងលិច​បាន​និយាយថា ទីក្រុង​ប៉េកាំង​កំពុង​បន្ត​កិច្ចខិតខំ​ប្រឹងប្រែង​ដើម្បី​គ្របដណ្តប់​សមុទ្រ​របស់​ខ្លួន​បើទោះបីជា​ខ្លួន​បាន​ខិតខំ​ព្យាយាម​ជៀសវាង​ការបង្ក​ហេតុ​ដោយ​បើកចំហ​ក៏ដោយ​។​

Carl Thayer អ្នកជំនាញ​ខាង​សមុទ្រ​ចិន​ខាងត្បូង​នៅ​បណ្ឌិតសភា​កងកម្លាំង​ការពារជាតិ​របស់​ប្រទេស​អូស្ត្រាលី​បាន​និយាយថា “​ប្រជុំ​កោះ Paracel នេះ​នឹង​ក្លាយជា​ការសំខាន់​បំផុត​ក្នុងការ​ប៉ុនប៉ង​របស់​ប្រទេស​ចិន​នាពេល​អនាគត​ដើម្បី​គ្របដណ្តប់​សមុទ្រ​ចិន​ខាងត្បូង​”​។​

គួរបញ្ជាក់​ឡើងវិញ​ថា ប្រទេស​ចិន​បាន​អះអាង​ស្ទើរតែ​ទាំង​អស់នៃ​ដែនទឹក​មាន​ជម្លោះ​នៅ​សមុទ្រ​ចិន​ខាងត្បូង​ខណៈ​កោះ​តៃវ៉ាន់ ប្រទេស​ម៉ាឡេស៊ី វៀតណាម ហ្វីលីពីន​និង​ប្រ៊ុយណេ​ក៏បាន​ទាមទារ​ផ្នែក​ខ្លះ​នៃ​សមុទ្រ​នេះ​ផងដែរ​៕ Reuters



ប្រសិនបើ លោក លោកស្រីចង់ចែករំលែកនូវព័ត៌មានទាន់ហេតុការណ៍ផ្សេងៗ សូមផ្ញើ អ៊ីម៉ែលមកកាន់អាសយដ្ឋានដូចដែលបានបង្ហាញខាងក្រោម។ សម្រាប់ការផ្សាយពាណិជ្ជកម្មលើគេហទំព័រនេះ សូមទំនាក់ទំនងតាមលេខទូរស័ព្ទៈ 016 877 684