ដើមឈើគ្រញូងនៅតំបន់អង្គរនៅតែរងការកាប់បំផ្លាញ​ពីឧក្រិដ្ឋជន

សេចក្តីរាយការណ៍បានឲ្យដឹងនៅព្រឹកថ្ងៃទី២១ ខែសីហា ឆ្នាំ២០២៣នេះថា ដើមគ្រញូងដ៏ធំមួយដើមទៀតហើយ នៅភូមិមណ្ឌល៣ ជាប់ផ្លូវក្រវ៉ាត់ឧទ្យានអង្គរ ត្រូវបានក្រុមចោរលួចកាប់យកទៅបាត់ដោយសុវត្តិភាព។

សូមបញ្ជាក់ថា ដើមឈើគ្រញូងទាំងនោះគ្រប់គ្រងដោយអាជ្ញាធរជាតិអប្សរា។ ជុំវិញការលួចកាត់ដើមគ្រញូងនេះ គេនៅពុំទាន់ឃើញស្ថាប័នអាជ្ញាធរជាតិអប្សរាចេញសេចក្ដីបំភ្លឺនៅឡើយទេ។

សូមរំលឹកថា ករណីលួចកាប់ដើមឈើគ្រញូងនៅតំបន់រមណីយដ្ឋានអង្គរ មិនមែនជាលើកទី១នោះទេ ពោលគឺបានកើតមានឡើងជាច្រើនលើកមកហើយ។ ប៉ុន្តែកម្រឃើញអាជ្ញាធរជាតិអប្សរា ចាប់បានជនដៃដល់ដែលលួចកាត់ដើមឈើគ្រញូងនេះណាស់។

ពាក់ព័ន្ធករណីនេះដែរមហាជនស្នើឲ្យស្ថាប័នមួយនេះបង្កើនការគ្រប់គ្រងព្រៃឈើនៅក្នុងតំបន់ឧទ្យានអង្គរឲ្យបានគង់វង្សឡើងវិញ ពីព្រោះប្រាង្គប្រាសាទក៏ត្រូវការព្រៃឈើដើម្បីការពារឃុំគ្រងផងដែរ៕

អត្ថបទ៖ កុសល