ព័ត៍មានទាន់​ហេតុការណ៏
Search

ក្រសួង​ធនធាន​ទឹក គ្រោង​សាងសង់​ប្រព័ន្ធ​ធារាសាស្ត្រ​បាសាក់​-​ព្រែកជីក ជំហាន​ទី​២ នា​ខែមេសា ខាងមុខនេះ

ភ្នំពេញ ​៖ ​ក្រោយពី​បញ្ចប់​ការ​សាងសង់ ជំហាន​ទី​១ កាលពី​ឆ្នាំ ២០១៦ កន្លងទៅ ក្រុមការងារ បច្ចេកទេស ក្រសួង​ធនធាន​ទឹក ដឹកនាំ​ដោយ លោក ចាន់ ស៊ី​ណាត អគ្គនាយករង​កិច្ចការ​បច្ចេកទេស កាលពី​ថ្ងៃ​ទី​១៨​មីនា បាន​ចុះ​ពិនិត្យ​ទីតាំង ដើម្បី​ឈាន​ទៅ​អនុវត្ត​ការងារ​នៅ​ជំហាន​ទី ២ នា​ខែមេសា ខាងមុខនេះ។

ក្រសួង​បាន​ឲ្យ​ដឹង​ថា ​ប្រព័ន្ធ​ធារាសាស្ត្រ​បាសាក់​-​ព្រែកជីក គឺជា​ប្រព័ន្ធ​ដ៏​ធំ​មួយ មាន​សក្តានុពល​គ្រប​ដណ្តប់​លើ​ផ្ទៃដី​បង្កបង្កើនផល​ប្រមាណ ២៥.០០០ ហិកតា នៅ​ក្នុង​ស្រុក​រុក្ខ​គិរី និង​ស្រុក​មោង​ឫស្សី ខេត្ត​បាត់ដំបង។

ដោយសារ​គម្រោង​នេះ​បាន​សាងសង់ និង​ប្រើប្រាស់​យូរ​មក​ហើយ ពិសេស​ការបំផ្លាញ​ដោយ​ទឹកជំនន់​ឆ្នាំ ២០១៣ បាន​ធ្វើ​ឲ្យ​ហេដ្ឋារចនាសម្ព័ន្ធ​នៃ​ប្រព័ន្ធ​នេះ​ទ្រុឌទ្រោម​យ៉ាង​ខ្លាំង។ ចំពោះ​មុខ​បញ្ហា​នេះ លោក​លឹម គានហោ រដ្ឋមន្ត្រី​ក្រសួង​ធនធាន​ទឹក និង​ឧតុនិយម បាន​ដឹកនាំ​អ្នកបច្ចេកទេស​ចុះ​សិក្សា​ជាបន្ទាន់។

ក្រោយពេល​សិក្សា និង​គ្រោង​ប្លង់ ត្រូវ​បាន​បញ្ចប់​រួចរាល់​ជា​ស្ថាពរ ក្រសួង​បាន​ប្រគល់​ភារកិច្ច​ជូន​លោក ចាន់ ស៊ី​ណាត អគ្គនាយករង​កិច្ចការ​បច្ចេកទេស ដឹកនាំ​ការងារ​សាងសង់ ។ ដោយសារ​ការងារ​នៃ​គម្រោង​នេះ​មាន​ទំហំ​ធំ ដូចនេះ ការសាងសង់​ត្រូវធ្វើ​ឡើងជា​ជំហានៗ។

ក្រសួង​បញ្ជាក់​ទៀត​ថា បន្ទាប់ពី​ជំហាន​ទី ១ បាន​បញ្ចប់​ទៅ កាលពី​ឆ្នាំ ២០១៦ កន្លងទៅ នៅ ថ្ងៃទី១៨ ខែមីនា ឆ្នាំ ២០១៧ នេះ ក្រុមការងារ​បាន​ចុះ​ពិនិត្យ​ទីតាំង ដើម្បី​ឈាន​ទៅ​អនុវត្ត​ការងារ​នៅ​ជំហាន​ទី២ នា​ខែមេសា ខាងមុខនេះ។ ការងារ​សំខាន់​នៅក្នុង​ជំហាន​ទី ២ នេះ គឺ​ការ​ពង្រឹង​តួ​ទំនប់​អាងទឹក​បាសាក់​ប្រវែង ១១ គម ដើម្បី​ឲ្យ​អាងទឹក​នេះ បង្កើន​លទ្ធភាព​ស្តុក​ទឹក​ដល់ ៤០ លាន​ម៉ែត្រត្រីគុណ ព្រមទាំង​ការ​ស្តារ​ប្រឡាយ​មេ ប្រឡាយ​រង និង​សំណង់​សិល្បការ​តូច​ធំ​មួយ​ចំនួន​ទៀត។

ជា​មួយ​គ្នា​នេះ ក្រុមការងារ​ក៏បាន​ពិនិត្យ​ទីតាំង​សម្រាប់​ការអនុវត្ត​នៅ​ជំហាន​ទី ៣ ផង​ដែរ ដែល​ការងារ​សំខាន់ៗ មាន​ដូច​ជា ការសាងសង់​ឡើងវិញ​នូវ​ទំនប់​អាងទឹក ៨ មករា ដើម្បី​បង្កើត​ជា​អាងទឹក​ត្រជាក់ចិត្ត និង​ការ​ជីក​ប្រឡាយ​មេ ០១ ខ្សែ ប្រវែង ៥៧ គម ដើម្បី​ទាញ​ទឹក​ពី​អាងទឹក​បាសាក់ ទៅ​ស្រោចស្រព​ផ្ទៃដី​កសិកម្ម​នៅក្នុង​ស្រុក​វាលវែង ខេត្តពោធិ៍សាត់។

សូម​បញ្ជាក់​ជូន​ថា ប្រព័ន្ធ​ធារាសាស្ត្រ​បាសាក់​-​ព្រែកជីក ដែល​ក្រសួង បាន និង​កំពុង​ធ្វើ​ការ​អភិវឌ្ឍ​នៅ​ពេល​នេះ នឹង​ត្រូវ​ត​ភ្ជាប់​ទៅ​នឹង​អាងទឹក​ដូន​ទ្រី ដែល​ក្រសួង​ធនធាន​ទឹក និង​ឧតុនិយម សហការ​ជាមួយ​ភាគី​សាធារណរដ្ឋ​កូរ៉េ កំពុង​រៀបចំ​ឯកសារ​ដេញថ្លៃ​ជ្រើសរើស​ក្រុមហ៊ុន​សាងសង់។

អាងទឹក​ដូន​ទ្រី មាន​ទីតាំងនៅ​ក្នុងស្រុក​រុក្ខ​គិរី មាន​សមត្ថភាព​ស្តុក​ទឹកបាន​ប្រមាណ ១៧០ លាន​ម៉ែត្រត្រីគុណ ។ ទឹក​ដែល​ស្តុក​បាន​នេះ នឹង​បញ្ជូន​មក​ប្រព័ន្ធ​ធារាសាស្ត្រ​បាសាក់​-​ព្រែកជីក ដើម្បី​ធ្វើការ​ចែកចាយ​ទៅកាន់​ដីស្រែ​របស់​បងប្អូន​កសិករ៕

 



ប្រសិនបើ លោក លោកស្រីចង់ចែករំលែកនូវព័ត៌មានទាន់ហេតុការណ៍ផ្សេងៗ សូមផ្ញើ អ៊ីម៉ែលមកកាន់អាសយដ្ឋានដូចដែលបានបង្ហាញខាងក្រោម។

សម្រាប់ការផ្សាយពាណិជ្ជកម្មលើគេហទំព័រនេះ សូមទំនាក់ទំនងតាមលេខទូរស័ព្ទៈ 016 877 684