កីឡា

មនុស្ស១២នាក់បានស្លាប់ក្នុងពិធីបើកកីឡា Indian Ocean Island នៅម៉ាដាហ្គាស្ការ

បានផុស

៧ ខែ មុន

នៅ

ថ្ងៃអង្គារ ២៩ សីហា ២០២៣

ដោយ

អាជ្ញាធរប្រទេសម៉ាដាហ្គាស្ការបាននិយាយកាលពីថ្ងៃសៅរ៍ថា ការប៉ះទង្គិចគ្នានៅកីឡដ្ឋានមួយក្នុងប្រទេស បានបណ្តាលឲ្យមនុស្សយ៉ាងហោចណាស់ ១២នាក់ស្លាប់ និង៨៥នាក់រងរបួស ខណៈពេលអ្នកគាំទ្របានចូលរួមពិធីបើកការប្រកួតកីឡាកោះមហាសមុទ្រឥណ្ឌា (Indian Ocean Island Games)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការរត់ជាន់គ្នានៅកីឡដ្ឋាន Mahamasina ក្នុងទីក្រុង Antananarivo រដ្ឋធានីនៃប្រទេសកោះអាហ្វ្រិកខាងកើតមួយនេះ បានកើតឡើងកាលពីថ្ងៃសុក្រ ខណៈមនុស្សបានប្រមូលផ្តុំគ្នានៅច្រកចូលនៅថ្ងៃបើកជាផ្លូវការនៃព្រឹត្តិការណ៍ពហុកីឡា។

អ្នកនាំពាក្យរដ្ឋាភិបាល លោក Lalatiana Rakotondrazafy បាននិយាយកាលពីថ្ងៃសៅរ៍ថា អ្នករងរបួសចំនួន ៣៣នាក់នៅតែស្ថិតក្នុងមន្ទីរពេទ្យ HRJA ក្នុងទីក្រុង Antananarivo។ នាយករដ្ឋមន្ត្រី Christian Ntsay បាននិយាយកាលពីថ្ងៃសុក្រថា មនុស្ស ១១នាក់ស្ថិតក្នុងស្ថានភាពធ្ងន់ធ្ងរ បន្ទាប់ពីការប៉ះទង្គិចដែលបានកើតឡើងនៅម៉ោងប្រហែល៤:៣០រសៀល។

ការិយាល័យរបស់លោកក៏បានចេញសេចក្តីថ្លែងការណ៍មួយកាលពីថ្ងៃសៅរ៍ ដើម្បីចូលរួមរំលែកទុក្ខ និងសន្យាថា រដ្ឋាភិបាលនឹងប្រគល់សពជនរងគ្រោះឱ្យក្រុមគ្រួសារ និងចំណាយសម្រាប់ការព្យាបាលអ្នករបួស។

កីឡដ្ឋានដែលត្រូវបានគេសាងសង់ឡើងសម្រាប់ផ្ទុកមនុស្សបានប្រហែល ៤១ ០០០នាក់ធ្លាប់ជាកន្លែងនៃការបាក់សង្កត់ស្លាប់ពីមុនមក។ មនុស្សម្នាក់បានស្លាប់ និងយ៉ាងតិច ៣៧នាក់បានរងរបួសក្នុងការរត់ជាន់គ្នាមួយមុនការប្រកួតជម្រុះជើងឯក African Cup of Nations រវាងប្រទេស ម៉ាដាហ្គាស្ការ និងសេណេហ្គាល់ ក្នុងឆ្នាំ២០១១។ យ៉ាងហោចណាស់មនុស្ស ១៥នាក់បានស្លាប់ក្នុងការរត់ជាន់គ្នានៅក្នុងការប្រគំតន្ត្រីមួយនៅកីឡដ្ឋានដដែលនេះ។

ការប្រកួតកីឡាកោះមហាសមុទ្រឥណ្ឌាគឺជាព្រឹត្តិការណ៍ពហុកីឡាដែលមានប្រទេសមកពីតំបន់ចូលរួម។ អត្តពលិកមកពីប្រទេស កូម៉ូរូស ម៉ាល់ឌីវ ម៉ូរីតានី Mayotte, Reunion និង សីស្ហែល ក៏ចូលរួមប្រកួតក្នុងព្រឹត្តិការណ៍ដែលធ្លាប់បានរៀបចំដំបូងតាំងពីឆ្នាំ១៩៧៩។

ម៉ាដាហ្គាស្ការ បានទទួលធ្វើម្ចាស់ជំនួសប្រទេសម៉ាល់ឌីវសម្រាប់ការរៀបចំឆ្នាំនេះ ដែលគ្រោងនឹងដំណើរការចាប់ពីថ្ងៃទី២៥ ខែសីហា ដល់ថ្ងៃទី០៣ ខែកញ្ញា៕