អាជ្ញាធរខណ្ឌច្បារអំពៅដាក់ម៉ាស៊ីនបូមទឹកចេញពីតំបន់លិចលង់

យោងតាមប្រភពពីលោក គុយ គឹមហ៊ាង នាយករងរដ្ឋបាលសាលាខណ្ឌច្បារអំពៅបានប្រាប់កម្ពុជាថ្មីនារសៀលថ្ងៃទី៤ខែកញ្ញានេះថា នៅក្នុងសប្តាហ៍កន្លងទៅនេះលោក ចេង មុនីរ៉ា អភិបាលខណ្ឌច្បារអំពៅបានដាក់ម៉ាសុីនបូមទឹកខ្នាតធំដើម្បីបូមទឹកចេញពីតំបន់លិចលង់ដោយជំនន់ទឹកភ្លៀង។

លោកនាយករងរដ្ឋបាលបានឲ្យដឹងទៀតថា បន្ទាប់ពីភ្លៀងបានធ្លាក់ជាបន្តបន្ទាប់នាដើមខែកញ្ញាទៅនេះបង្កឲ្យមានការលិចលង់នៅបណ្តាភូមិមួយចំនួនដែលស្ថិតនៅក្នុងសង្កាត់ចំនួន៤ក្នុងនោះមានសង្កាត់ព្រែកថ្មី សង្កាត់ព្រែកប្រា សង្កាត់ព្រែកឯង និងសង្កាត់វាលស្បូវក្នុងភូមិសាស្ត្រខណ្ឌច្បារអំពៅរាជធានីភ្នំពេញ។

លោក គិត គឹមហ៊ាង បានបន្តថាទីតាំងដែលតម្រូវឲ្យដាក់ម៉ាសុីនបូមទឹកចេញពីតំបន់ដែលលិចលង់ខ្លាំងជាងគេនោះគឺស្ថិតនៅសង្កាត់ព្រែកថ្មី និងបន្តយកម៉ាសុីនបូមទឹកនៅសង្កាត់ព្រែកប្រានៅតំបន់បឹងព្រលឹត។

ទន្ទឹមនឹងការដាក់ម៉ាសុីនបូមទឹកដើម្បីបញ្ចៀសការលិចលង់ភូមិឋានបងប្អូនប្រជាពលរដ្ឋគឺកម្លាំងប្រជាការពារសាលាខណ្ឌបានសហការជាមួយអាជ្ញាធរសង្កាត់ទាំង ៨ ចុះស្តាប្រពន្ធ័លូបង្ហូទឹកកុំឲ្យកកស្ទះសំរាមដែលប្រឈម និងការលិចលង់ពេលភ្លៀងធ្លាក់៕

អត្ថបទ៖ នរា