ព័ត៌មានជាតិ
ឯកឧត្ដម ហ៊ុន ម៉ានី ៖ អ្នកដឹកនាំជាច្រើន សុទ្ធតែឆ្លងកាត់ការប្រឡងប្រជែង និងទទួលបានការបណ្ដុះបណ្ដាលនៅសាលាភូមិន្ទរដ្ឋបាល
ឯកឧត្ដម ហ៊ុន ម៉ានី រដ្ឋមន្ត្រីក្រសួងមុខងារសាធារណៈ និងជាប្រធានក្រុមប្រឹក្សាសាលាភូមិន្ទរដ្ឋបាល បានលើកឡើងថា អ្នកដឹកនាំជាច្រើន សុទ្ធតែត្រូវបានឆ្លងកាត់ការប្រឡងប្រជែង និងទទួលបានការបណ្ដុះបណ្ដាលនៅសាលាភូមិន្ទរដ្ឋបាល។
ការលើកឡើងនេះ ក្នុងឱកាសដែល ឯកឧត្ដម ហ៊ុន ម៉ានី រដ្ឋមន្ត្រីក្រសួងមុខងារសាធារណៈ អញ្ជើញជាអធិបតីចូលរួមក្នុងពិធីបើកសិក្ខសាលាបណ្ដុះបណ្ដាលស្ដីពី «ភាពជាអ្នកដឹកនាំ និងនវានុវត្តន៍ ជំនាន់ទី ៥» នៅសហសាលសាលាភូមិន្ទរដ្ឋបាល នាថ្ងៃទី ០៤ ខែតុលា ឆ្នាំ ២០២៣ នេះ។
ឯកឧត្ដម ហ៊ុន ម៉ានី បានលើកឡើងថា «ជាច្រើនឆ្នាំមកហើយ ដែលសាលាភូមិន្ទរដ្ឋបាល បានវិវឌ្ឍខ្លួនជាបន្តបន្ទាប់ក្នុងបេសកកម្មបណ្ដុះបណ្ដាលអនាគតអ្នកដឹកនាំ ទាំងថ្នាក់ជាតិ និងថ្នាក់ក្រោមជាតិ ឲ្យទទួលបាននូវចំណេះដឹង និងបទពិសោធន៍ថ្មីៗ បន្ថែមទៀត ស្របទៅតាមការវិវត្តឥតឈប់ឈរនៅក្នុងតំបន់ និងអន្តរជាតិ ដើម្បីឆ្លើយតបនឹងតម្រូវការចាំបាច់របស់ប្រជាពលរដ្ឋ និងសង្គម។ អ្នកដឹកនាំជាច្រើន សុទ្ធតែត្រូវបានឆ្លងកាត់ការប្រឡងប្រជែង និងទទួលបានការបណ្ដុះបណ្ដាលនៅទីនេះ»។
ឯកឧត្ដម ហ៊ុន ម៉ានី បន្តថា ថ្ងៃនេះ សាលាភូមិន្ទរដ្ឋបាល បានរៀបចំវគ្គបណ្ដុះបណ្ដាលមួយក្នុងចំណោមវគ្គជាច្រើនផ្សេងទៀត ដើម្បីបណ្ដុះបណ្ដាលមន្ត្រីរាជការជាន់ខ្ពស់ និងអនាគតអ្នកដឹកនាំស្របតាមគោលនយោបាយកំណែទម្រង់រដ្ឋបាលសាធារណៈ ជាពិសេសអាទិភាពគន្លឹះទី ១ នៃយុទ្ធសាស្ត្របញ្ចកោណដំណាក់កាលទី ១ គឺ មនុស្ស។ ជាក់ស្ដែង អាទិភាពទី ២ ដែលមានចែងក្នុងមុំទី ១ របស់យុទ្ធសាស្ត្របញ្ចកោណ គឺការពង្រឹងសមត្ថភាព នៃភាពជាអ្នកដឹកនាំ ការបណ្ដុះបណ្ដាលភាពជាអ្នកដឹកនាំ ការវាយតម្លៃ និងការទទួលស្គាល់អ្នកដឹកនាំគំរូ និងការរៀបចំបណ្ដាញអ្នកដឹកនាំក្នុងរដ្ឋបាលសាធារណៈ។ បន្ថែមពីលើនេះ នៅក្នុងមុំទី ២ នៃយុទ្ធសាស្ត្របញ្ចកោណដដែល បានចែងពាក់ព័ន្ធជាមួយការលើកកម្ពស់សមត្ថភាពធនធានមនុស្ស ប្រកបដោយសមត្ថភាពជំនាញ ឆន្ទៈ ម្ចាស់ការ និងក្រមសីលធម៌ ស្របតាមតួនាទី និងការទទួលខុសត្រូវ។
ឯកឧត្ដម ហ៊ុន ម៉ានី សង្កត់ធ្ងន់ថា វគ្គបណ្ដុះបណ្ដាលស្ដីពី«ភាពជាអ្នកដឹកនាំ និងនវានុវត្តន៍» លើកទី៥ ក៏ជាផ្នែកមួយ នៃការឆ្លើយតបតាមចក្ខុវិស័យ និងការចង្អុលបង្ហាញរបស់ សម្ដេចធិបតី នាយករដ្ឋមន្ត្រី នៃព្រះរាជាណាចក្រកម្ពុជា លើវិធានការគន្លឹះ ត្រង់ចំណុចទី ២ គឺ «ការពង្រឹងសមត្ថភាព និងសមិទ្ធកម្មស្ថាប័ន ដើម្បីលើកកម្ពស់គុណភាពការងារ ប្រកបដោយវិន័យ សីលធម៌ វិជ្ជាជីវៈ ប្រសិទ្ធភាព និងស័ក្ដិសិទ្ធិភាព» ដែលក្រសួងមុខងារសាធារណៈដើរតួនាទីជាលេខាធិការដ្ឋានសម្រាប់គណៈកម្មាធិការជាតិជំរុញការអនុវត្តវិធានការគន្លឹះក្នុងការកែទម្រង់រដ្ឋបាលសាធារណៈរបស់រាជរដ្ឋាភិបាលកម្ពុជានីតិកាលទី ៧ នៃរដ្ឋសភា។
ជាមួយនេះ រដ្ឋមន្ត្រីក្រសួងមុខងារសាធារណៈ បានបន្ថែមថា ទាំងអស់នេះ បង្ហាញពីភាពសំខាន់ និងចាំបាច់ នៃវគ្គបណ្ដុះបណ្ដាលនិមួយៗ ដែលបាន និងកំពុងរៀបចំ តម្រូវឲ្យសិក្ខាកាមទាំងអស់ ប្រើប្រាស់ពេលវេលានេះដោយយកចិត្តទុកដាក់ ហើយបំពេញតាមលក្ខខណ្ឌនានារបស់វគ្គ ដើម្បីបានជាពុទ្ធិ និងទទួលនូវបទពិសោធន៍ថ្មីៗ ល្អៗ ដើម្បីយកទៅដឹកនាំអង្គភាព និងស្ថាប័នរៀងៗ ខ្លួន ព្រោះសិក្ខាកាមទាំងអស់គ្នាដែលចូលរួមក្នុងវគ្គនេះ សុទ្ធតែជាធនធានដ៏សំខាន់ក្នុងការបម្រើប្រជាពលរដ្ឋ៕
អត្ថបទ ៖ ពិសី
-
ព័ត៌មានជាតិ៦ ថ្ងៃ ago
អ្នកឧកញ៉ា គួច ម៉េងលី÷ បើមិននាំខ្លួនមេខ្លោងក្រុមហ៊ុន CIC Plc មកផ្ដន្ទាទោសទេ ពលរដ្ឋនឹងលែងជឿប្រព័ន្ធយុត្តិធម៌កម្ពុជា
-
ព័ត៌មានជាតិ៤ ថ្ងៃ ago
ទ្រព្យសកម្មរបស់ក្រុមហ៊ុន CIC Plc ប្រមាណ ៩០% នៃចំនួនទឹកប្រាក់សរុប ត្រូវបានប្រមូលមកវិញ
-
ព័ត៌មានជាតិ៤ ថ្ងៃ ago
បណ្ឌិត គិន ភា៖ «ហេតុអីមិនបន្ទោសអ្នកបោកគេ បែរជាបន្ទោសអ្នកត្រូវគេបោកទៅវិញ?»
-
ព័ត៌មានជាតិ៤ ថ្ងៃ ago
កម្ពុជានឹងមានភ្លៀងធ្លាក់ ១៥% ដល់ថ្ងៃទី ២៧ ដំណាច់ខែមីនា
-
ជីវិតកម្សាន្ដ១ សប្តាហ៍ ago
ខេមរៈ សិរីមន្ត ៖ «ទោះខ្ញុំមិនមែនជាអ្នកធំ តែសុំធ្វើកិច្ចការធំខ្លះជូនជាតិតាមវិជ្ជាជីវៈសិល្បៈ បង្ហាញទៅពិភពលោក»
-
សេដ្ឋកិច្ច៥ ថ្ងៃ ago
មន្ត្រីជាន់ខ្ពស់ធនាគារជាតិ៖ ក្រដាសប្រាក់ ៥ម៉ឺន រៀល មានគូសឆ្នូតកណ្តាលអាចប្តូរយកប្រាក់ថ្មីបានដោយឥតគិតថ្លៃ
-
ព័ត៌មានជាតិ៤ ថ្ងៃ ago
ដីជាង ៤៣ ហិកតា នៅភូមិសាស្ត្រភ្នំ ១៥០០ ត្រៀមដាំស្ដារព្រៃឈើឡើងវិញ
-
ព័ត៌មានអន្ដរជាតិ២ ថ្ងៃ ago
លម្អិតហេតុការណ៍រន្ធត់ កប៉ាល់ដឹកកុងតឺន័រ បុកបាក់ស្ពាននៅទីក្រុង Baltimore