ព័ត៍មានទាន់​ហេតុការណ៏
Search

សម្តេច​តេ​ជោ ហ៊ុន សែន សង្ឃឹមថា​និស្សិត​ថ្នាក់បណ្ឌិត​ទាំងអស់​នឹងមិន​ដើរ​តាម​គន្លង​ខុសឆ្គង

ភ្នំពេញ ៖ សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​កម្ពុជា​បាន​បង្ហាញ​ក្តី​សង្ឃឹម​ចំពោះ​និស្សិត​ថ្នាក់បណ្ឌិត និង បរិញ្ញាបត្រ​ជាន់ខ្ពស់​ដែល​ទទួល​សញ្ញាប័ត្រ​នៅ​ថ្ងៃ​នេះ​មិន​ដើរ​តាម​គន្លង​ខុសឆ្គង​ណាមួយ​ទៅលើ​ការវិនិច្ឆ័យ​ខុស និង និយាយ​ខុស​ការពិត​ដោយ​បំពាន​នោះទេ​។​

សម្តេច​តេ​ជោ​នាយករដ្ឋមន្ត្រី​ បាន​មានប្រសាសន៍​បែបនេះ​ នៅ​ក្នុង​ពិធី​ចែក​សញ្ញាប័ត្រ​ជូន​ដល់​និស្សិត​ថ្នាក់​បរិញ្ញាបត្ររង បរិញ្ញាបត្រ ថ្នាក់​បរិញ្ញាបត្រ​ជាន់ខ្ពស់ និង បណ្ឌិត​នៃ​សាកលវិទ្យាល័យ អាស៊ី អឺរ៉ុប ចំនួន ១.៨៨៥​នាក់ នា​ព្រឹក​ថ្ងៃទី ២០ ខែ មេសា នៅ​វិទ្យាស្ថាន​ជាតិ​អប់រំ។

សម្តេច​តេ​ជោ​នាយករដ្ឋមន្ត្រី​បាន​មានប្រសាសន៍ លើក​ឡើង​ថា ​រាល់​សមិទ្ធផល​ដែល​សម្រេច​បាន​នា​ពេល​កន្លង​មក​នេះ​វា​មិនមែនជា​តែ​កើតឡើង​ ដោយ​ការ​ធ្វើ​ការងារ​គ្មាន​ផែនការ​នោះទេ គឺ​រាល់​សមិទ្ធផល​ទាំងអស់​បានកើត​ឡើងជា​ដំណាក់កាល ពី​ដំណាក់កាល​មួយ​ទៅ​ដំណាក់កាល​មួយ ពី​ប្រទេស​ដែល​មិនមាន​អ្វី​សោះ​ពី​ប្រទេស​ដែល​មាន​ប្រាក់ចំណូល​ទាប​ទៅជា​ប្រទេស​ដែល​មាន​ប្រាក់ចំណូល មធ្យម​កម្រិត​ទាប ហើយ​ដែល​កម្ពុ​ជា​មាន​មហិច្ឆតា និង ក៏​ជា​លទ្ធភាព​ដែល​អាច​ធ្វើ​បាន​ដើម្បី​សម្រេច​នូវ​គោលដៅ​ឆ្នាំ ២០៣០ ក្លាយ​ជា​ប្រទេស​ដែល​មាន​ប្រាក់ចំណូល​មធ្យម​កម្រិត​ខ្ពស់ និង ក្លាយទៅជា​ប្រទេស ដែល​មាន​ប្រាក់ចំណូល​កម្រិត​ខ្ពស់​នៅ​ឆ្នាំ ២០៥០​។

សម្តេចនាយក​រដ្ឋមន្ត្រី​ បាន​លើកឡើង​ទៀត​ថា ​ពិតមែន​ថា ស​ម្តេច​មិនដឹង​ថា​ខ្លួនឯង​នឹង​រស់នៅ​ដល់​ឆ្នាំ ២០៥០ ប៉ុន្តែ​យ៉ាងណាក៏ដោយ​សម្តេច​ត្រូវ​រៀបចំ​នូវ​ផែនទី​ចង្អុល​ផ្លូវ​មួយ​សម្រាប់​ឈានទៅ​សម្រេច​គោលដៅ​ក្នុង​ឆ្នាំ ២០៥០​។

សម្តេច​តេ​ជោ​បាន​បន្ត​ថា ​ដូចដែល​រាជរដ្ឋាភិបាល​ធ្លាប់​ដើរ​កន្លងទៅ​មិនមែន​ដើរ​ដោយ​គ្មាន​ផែនទី និង គ្មាន​ក្របខ័ណ្ឌ​គោ​លន​យោបាយ​នោះទេ​។

សម្តេច​តេ​ជោ​បាន​បន្ត​ថា សុំ​កុំ​ប្រមាថ​ចំពោះ​អ្វី​ដែល​យើង​សម្រេច​បាន​កន្លងទៅ ដំណាក់​កាលណា​ត្រូវ​ធ្វើ​អី គឺ​មាន​ការ​គិតគូរ​ច្បាស់លាស់​ណាស់ មិនមែន​គ្រាន់តែ​ជា​ការ​បង្កើត​ភាសា​និយាយ​ឲ្យ​តែ​ពីរោះ ស្តាប់​នោះ​ទេ​។ សម្តេច​ក៏បាន​បង្ហាញ​ពី​ការពិត​ជាក់​ស្តែង​ដូចជា​ការអភិវឌ្ឍ​វិស័យ​អប់រំ​ដែល​បាន​ដើរ​មកដល់​ចំណុច​នេះ ដែល​ជា​គោលនយោបាយ​ជាក់លាក់​របស់​រាជរដ្ឋាភិបាល​ក្នុងការ​បើកចំហ​ឲ្យ​វិស័យ​ឯកជន ចូលរួម​អភិវឌ្ឍ​ធនធានមនុស្ស។ បើ​គ្មាន​គោលនយោបាយ​នេះ​ទេតើ​សាកលវិទ្យាល័យ​រាប់​រយ​នេះ​អាច​កើតមាន​ទេ ? ចំណុច​នេះ​គឺ​បានបង្ហាញ​ថា​ យើង​មាន​ផែនទី​ចង្អុល​ផ្លូវ​មួយ​ច្បាស់លាស់ ទាំង​នយោបាយ​គ្រប់​វិស័យ​នៅ​ក្នុង​ប្រទេស និង នៅក្រៅ​ប្រទេស​ផងដែរ​។

សម្តេច​តេ​ជោ​បាន​បន្ត​ថា ​វា​មិនមែន​ធម្មតា​ពេក​ទេ​ ក្នុង​ការ​ដាក់​ចេញ​នូវ​គោលនយោបាយ​នីមួយៗ ឧទាហរណ៍​ដូចជា​សេចក្តី​ថ្លែងការណ៍​សន្ទុក ឆ្នាំ ២០០២ អំពី​ឃុំ​មួយ​អនុវិទ្យាល័យ​មួយ មិនមែន​ជា​ការ​លេង​សើច​ទេ ទាំង​ក្នុង​វិស័យ​អប់រំ និង វិស័យ​សុខាភិបាល ហើយ​យើង​បានសម្រេច​ជោគជ័យ​ជា​បន្តបន្ទាប់ ដូចជា​ការ​លុបបំបាត់​ជំងឺ​ស្វិតដៃជើង​នៅមុន​ឆ្នាំ ២០០០ និង ការ​ដាក់ចេញ​នូវ​ផែនការ​កាត់បន្ថយ​មរណភាព​មាតា​និង​ទារក និង ការដាក់ចេញ​នូវ​ផែនការ​លុបបំបាត់​ជំងឺគ្រុនចាញ់​នៅ​ឆ្នាំ២០២៥​។ ការ​ផ្តល់​ឱកាស​ដល់​កុមារ​និង​យុវជន​ឲ្យ​បាន​ចូល​សាលា​រាជរដ្ឋាភិបាល​បាន​ពង្រាយ​សាលា ពង្រាយ​គ្រូ​ទៅដល់​មូលដ្ឋាន កាល​លើកកម្ពស់​គុណភាព​អប់រំ​ពី​បឋម ដល់​សាកលវិទ្យាល័យ ការ​ខិតខំ​កសាង​ហេដ្ឋារចនាសម្ព័ន្ធ​និង ការ​ខិតខំ​តម្លើង​បៀវត្សរ៍​សម្រាប់​គ្រូបង្រៀន ដែល​គ្រប់ដណ្តាប់​រហូតដល់​ទៅ ១២ ម៉ឺន​នាក់​។

សម្តេច​តេ​ជោ​ បាន​ធ្វើ​ការរិះគន់​ទៅដល់​អ្នកវិភាគ​មួយ​ចំនួន ដែល​បានធ្វើការ​អត្ថាធិប្បាយ​ដោយ​មិនបាន​យល់​អ្វី​ទាំងអស់ មិនបាន​មើល​ឯកសារ ចក្ខុវិស័យ​របស់​រាជ​រដ្ឋាភិបាល និង មិនបាន​មើល​សកម្មភាព ប្រទាក់​ក្រឡា​គ្នា​របស់​រាជរដ្ឋាភិបាល​។

សម្តេច​តេ​ជោ​បាន​បន្ត​ថា​ អ្នកខ្លះ​ធ្វើ​ដូចជា​ខ្លួន​ចេះដឹង​លើ​គ្រប់​វិស័យ​ទាំងអស់ រាប់ទាំង​ពេលខ្លះ​ខ្លួន​មិនទាន់​ទាំង​ស្គាល់​ថា​ តើ​ក្រសួង​គេ​មាន​ច្បាប់​និង អនុក្រឹត្យ​ស្តី​ពី​ការរៀបចំ​និង​ការ​ប្រព្រឹត្ត​ទៅ​នៃ​ស្ថាប័ន​នីមួយៗ មិនទាន់​ស្គាល់​មុខងារ​នៃ​ស្ថាប័ន​មួយ​ផង​គេ​ហាន​ធ្វើ​អត្ថាធិប្បាយ ជា​រឿង​គួរ​ឲ្យ​ខ្មាសអៀន​។

សម្តេច​តេ​ជោ​សង្ឃឹមថា និស្សិត​បណ្ឌិត និង បរិញ្ញាបត្រ បរិញ្ញាបត្រ​ជាន់ខ្ពស់​ដែល​បាន​បណ្តុះ​បណ្តាល​ចេញ​មក​នៅ​ពេល​នេះ​ នឹង ​មិន​ដើរ​តាម​គន្លង​ខុសឆ្គង​ណាមួយ​ទៅលើ​ការវិនិច្ឆ័យ​ខុស និង និយាយ​ខុស​ការពិត​ដោយ​បំពាន​នោះ​ទេ​។

សម្តេច​ក៏បាន​ដាក់​តឿន​ចំពោះ​និស្សិត​ទាំងអស់​ ដែល​បាន​ទទួល​សញ្ញាប័ត្រ​ជា​បណ្ឌិត ជា​អនុបណ្ឌិត​ហើយក៏​ដោយ​ក៏​ត្រូវតែ​បន្ត​អភិវឌ្ឍ​ខ្លួន​តាមរយៈ​ការ​អាន​ការ​មើល​ការសិក្សា​បន្ត ដោយ​សម្តេច​បាន​លើក​ឡើង​ថា​ មិន​ថា​ឡើយ​និស្សិត​ទេ ថ្នាក់ដឹកនាំ​ក្តី អ្នកធ្វើ​អត្ថាធិ​ប្បាយ​ក្តី បើ​មិន​ដូច្នោះ​វា​និង​ក្លាយទៅជា ជន​អភិរក្សនិយម​ហើយ​បើ​ធ្វើ​ក្នុង​វិស័យ​នយោបាយ វិស័យ​ព័ត៌មាន ឬ អ្នក​អត្ថាធិប្បាយ វា​និង​ក្លាយទៅជា​ជន​អគតិ​តែម្តង ព្រោះ​សភាពការណ៍​វិវត្តន៍​ទៅមុខ​ដោយ​ខ្លួន​មិនបាន​ដឹង ហើយ​បែរជា​ហាន​ធ្វើ​អត្ថាធិប្បាយ​នោះ​គឺជា​កំហុស​ឆ្គង​។ សង្ឃឹមថា​និស្សិត​របស់​យើង​និង​ខិតខំ និង មិន​ធ្វើជា​មនុស្ស អភិរក្សនិយម​នោះទេ​៕

  



ប្រសិនបើ លោក លោកស្រីចង់ចែករំលែកនូវព័ត៌មានទាន់ហេតុការណ៍ផ្សេងៗ សូមផ្ញើ អ៊ីម៉ែលមកកាន់អាសយដ្ឋានដូចដែលបានបង្ហាញខាងក្រោម។

សម្រាប់ការផ្សាយពាណិជ្ជកម្មលើគេហទំព័រនេះ សូមទំនាក់ទំនងតាមលេខទូរស័ព្ទៈ 016 877 684