ព័ត៍មានទាន់​ហេតុការណ៏
Search

អាជ្ញាធរ​រាជធានី ​នឹងមាន​វិធានការ ដើម្បី​ចាប់​សត្វ​ឆ្កែ​បោះ​លើ​ឡាន បើ​នៅតែ​បណ្ដើរ​ឲ្យ​ជុះ​អាចម៍​លើ​សួនច្បារ​ទៀត​

ភ្នំពេញ​ ៖ អាជ្ញាធរ​រាជធានី​នឹងមាន​វិធានការ​យ៉ាង​តឹងរ៉ឹង​មួយ ដើម្បី​ចាប់​សត្វ​ឆ្កែ​បោះ​លើ​ឡាន បើ​ម្ចាស់​របស់​វា​នៅតែ​បន្ត​បណ្ដើរ​ឲ្យ​ជុះ​អាចម៍​លើ​សួនច្បារ​បន្តទៀត​នោះ​។

វិធានការ​នេះ​ត្រូវបាន​លោក ប៉ា សុជាតិ​វង្ស អភិបាល​រាជធានី​ភ្នំពេញ​ ដាក់ចេញ​ក្នុង​កិច្ចប្រជុំ​របស់​គណៈ​បញ្ជាការ​ឯកភាព​រាជធានី​ភ្នំពេញ​ នា​ព្រឹក​ថ្ងៃទី​២១ ខែ​មេសា​នេះ ដោយមាន​ការចូលរួម​ពី​គ្រប់​កងកម្លាំង​ និង​អាជ្ញាធរ​ក្រោម​ឱវាទ​ ចំណុះ​ឲ្យ​រដ្ឋបាល​រាជធានី​ភ្នំពេញ ​ជាច្រើន​អង្គភាព​ចូលរួម​។

លោក ប៉ា សុជាតិ​វង្ស បាន​មានប្រសាសន៍ សួនច្បារ​វិមានឯករាជ្យ អាជ្ញាធរ​ខណ្ឌ​ចំការមន ​ត្រូវ​ធ្វើ​ឲ្យ​បាន ពោល គឺ​មិន​ឲ្យ​មានការ​ដឹក​ឆ្កែ​ឡើង​សួនច្បារ​ទៀត​ទេ។ លោក​ថា កន្លង​មកនេះ​យើង​បាន​ទាំង​ដាក់​ស្លាក​សញ្ញា​ហាម​មិន​ឲ្យ​ឆ្កែ​ចូល ប៉ុន្តែ​ការ​ហាម​តាមរយៈ​ស្លាក​សញ្ញា​នេះ ​ហាក់​មិន​មាន​ប្រសិទ្ធភាព​សោះ ដោយ​ប្រជាពលរដ្ឋ​នៅតែ​បន្ត​នាំ​សត្វ​ឆ្កែ​មក​ជុះ​អាចម៍​ដាក់​លើ​សួនច្បារ​ដដែលៗ។​ ដូច្នេះ​ទេ​អាជ្ញាធរ​របស់​យើង​ ត្រូវតែមាន​វិធានការ​ហើយ គឺ​ត្រូវ​ចាប់​សត្វ​ឆ្កែ​ទាំងអស់នោះ​ដាក់​លើ​រថយន្ត​ បញ្ជូនមក​សាលាខណ្ឌ ហើយ​លើ​បញ្ហា​នេះ​បើ​ត្រូវ​ពឹង​កងកម្លាំង​មាន​សមត្ថកិច្ច​របស់​ក្រុង​ គឺ​ក្រុង​ចុះជួយ​ភ្លាម។

លោក​បញ្ជាក់​ថា សួនច្បារ​ធ្វើ​អស់​លុយ​ច្រើនណាស់ សម្រាប់​ឲ្យ​ប្រជាពលរដ្ឋ​យើង ​ក៏ដូចជា​ភ្ញៀវ​ជាតិ អន្តរជាតិ​បាន​លំហែ​កាយ​ និង​ហាត់ប្រាណ មិនមែន​ធ្វើឲ្យ​សត្វ​ឆ្កែ​ហាត់ប្រាណ ​និង​ជុះ​អាចម៍​ដាក់​នោះទេ។ ជាងនេះទៅទៀត ​ឆ្កែ​នេះ​វា​បាន​រំខាន​ទៅដល់​ប្រជាពលរដ្ឋ ក៏ដូចជា​ភ្ញៀវ​ជាតិ អន្តរជាតិ​ទៀត​ផង​ ដោយ​ពួកគាត់​ខ្លាច​ឆ្កែ​។

ក្រៅពី​មាន​វិធានការ​ចំពោះ​សត្វ​ឆ្កែ​មិន​ឲ្យ​ឡើងលើ​សួនច្បារ​ហើយ​នោះ​ លោក ប៉ា សុជាតិ​វង្ស​ ក៏បាន​ដាក់បទបញ្ជា​ឲ្យ​អាជ្ញាធរ​ខណ្ឌចំការមន ​មាន​វិធានការ​ចំពោះ​ការលក់ដូរ​រំលោភ​យក​សួនច្បារ​ក្បែរ​នាគ​បាញ់​ទឹក​ផងដែរ ដោយ​លោក​បញ្ជាក់​ថា សួនច្បារ ​គឺ​សួនច្បារ​ មិនមែន​សម្រាប់​ឲ្យ​ពួកគាត់​លក់ដូរ ​បង្ក​ឲ្យ​បាត់​បង់​សណ្តាប់​ធ្នាប់​នោះទេ។​ ទីតាំង​នេះ​ គឺ​បង្ក​ឲ្យ​កកស្ទះ​ចរាចរណ៍​យ៉ាងខ្លាំង ដោយសារតែ​អ្នកទិញ​ចត​យានយន្ត​ពេញ​ផ្លូវ​។ ដូច្នេះ​ទេ​អាជ្ញាធរ​ខណ្ឌចំការមន​ ត្រូវតែ​អនុវត្ត​លើ​វិធានការ​ទាំង​២​ខាងលើនេះ​ឲ្យ​មាន​ប្រសិទ្ធភាព៕



ប្រសិនបើ លោក លោកស្រីចង់ចែករំលែកនូវព័ត៌មានទាន់ហេតុការណ៍ផ្សេងៗ សូមផ្ញើ អ៊ីម៉ែលមកកាន់អាសយដ្ឋានដូចដែលបានបង្ហាញខាងក្រោម។

សម្រាប់ការផ្សាយពាណិជ្ជកម្មលើគេហទំព័រនេះ សូមទំនាក់ទំនងតាមលេខទូរស័ព្ទៈ 016 877 684