ព័ត៍មានទាន់​ហេតុការណ៏
Search

ក្រសួងមហាផ្ទៃ នឹង​កោះ​ប្រជុំ​ផ្នែក​ជំនាញ​នៅ​ចុង​ស​ប្តា​ហ៍​នេះ ទាក់ទង​នឹងរឿងរបស់លោក ជុន ច័ន្ទ​បុត្រ

ភ្នំពេញ​ ៖ អ្នកនាំពាក្យ​ក្រសួងមហាផ្ទៃ​នាយ​ឧ​ត្ត​ម​សេនីយ៍ ខៀវ សុភ័គ បាន​ថ្លែងថា ករណី​លោក ជុន ច័ន្ទ​បុត្រ បន្លំ​ខ្លួន​ចូល​ពន្ធនាគារ ត្រូវ​បាន​សម្តេច​ក្រឡាហោម ស ខេង ឧបនាយករដ្ឋមន្ត្រី សម្រេច​ឯកភាព​តាម​សំណើ​របស់​អគ្គនាយកដ្ឋាន​ពន្ធនាគារ ហើយ​នឹង​កោះប្រជុំ​ថ្នាក់ដឹកនាំ និង​ផ្នែក​ជំនាញៗ​នៅ​ចុង​ស​ប្តា​ហ៍​នេះ ដើម្បី​ពិនិត្យ​ផ្លូវ​មុននឹង​ចាត់វិធានការ។

លោក ជុន ច័ន្ទ​បុត្រ ឬ ហួត វុទ្ធី​កាលពី​ថ្ងៃ​ទី​១៩ ខែមេសា ឆ្នាំ​២០១៧ បាន​បន្លំ​ខ្លួន​ធ្វើជា​ជំនួយការ​មន្ត្រី​គណបក្ស​សង្គ្រោះ​ជាតិ ដោយ​ប្រើ​ឈ្មោះ ហួត រុ​ទ្ធិ ចូល​ទៅ​ក្នុង​ពន្ធនាគារ​ព្រៃ​ស ដើម្បី​ជួប​លោក គឹម សុខ អ្នកវិភាគ​នយោបាយ និង​សង្គម ដែល​កំពុង​ជាប់ឃុំ។ ដោយសារ​តែមាន​បញ្ហា​នេះ ក្រសួងមហាផ្ទៃ បាន​ចេញ​វិធានការ​ភ្លាមៗ​មិន​អនុញ្ញាត​ឲ្យ​តំណាងរាស្ត្រ​គណបក្សប្រឆាំង ចូល​សួរសុខទុក្ខ​សកម្មជន ឬ​មន្ត្រី​គណបក្ស​សង្គ្រោះ​ជាតិ ដែល​ជាប់ឃុំ​ទៀត​ទេ។

នាយ​ឧ​ត្ត​ម​សេនីយ៍ ខៀវ សុភ័គ អ្នកនាំពាក្យ​ក្រសួងមហាផ្ទៃ​បាន​មាន​ប្រសា​ស​ន៍​ប្រាប់​កម្ពុជាថ្មី កាលពី​រសៀល​ថ្ងៃទី​២១ ខែមេសា ថា មកដល់ពេលនេះ ក្រសួង​បាន​ណែនាំ​ឲ្យ​បើក​កិច្ចប្រជុំ​មួយ​ជាមួយ​មន្ត្រី​ជំនាញ អ្នកច្បាប់ និង​អ្នក​ពាក់ព័ន្ធ នៅ​ថ្ងៃ​សៅរ៍ ទី​២២ ខែមេសា ដើម្បី​ពិនិត្យមើល​ឲ្យ​បាន​ច្បាស់លាស់​លើ​ផ្លូវ​ច្បាប់ មុន​នឹង​មាន​វិធានការ​។

លោក​បញ្ជាក់​ថា ក្រោយពី​ពិភាក្សា​យោបល់​ជាមួយ​អ្នកច្បាប់ និង​អ្នក​ជំនាញ​អស់ហើយ និង​លើក​យោបល់​សុំ​ការសម្រេច​ថា​ តើ​ត្រូវ​សម្រេច​យក​វិធានការ​ណាមួយ​ទាក់ទង​ករណី​លោក ជុន ច័ន្ទ​បុត្រ នេះ។

តាម​នាយ​ឧ​ត្ត​ម​សេនីយ៍ ខៀវ សុភ័គ បាន​បញ្ជាក់​ថា ខាង​អគ្គនាយកដ្ឋាន​ពន្ធនាគារ​បាន​ស្នើ​ឡើង​នូវ​បញ្ហា​មួយ​ចំនួន​ទាក់ទង​ករណី​នេះ ហើយ​ក្រសួង​បាន​ឯកភាព​រួចហើយ គឺ​

ទី​១, បញ្ឈប់ ជា​ស្ថាពរ ការ​ចូល​ជួប​សួរសុខទុក្ខ​របស់​ក្រុម​អ្នកតំណាង​គណបក្ស​សង្គ្រោះ​ជាតិ ជាមួយ​សកម្មជន​រប​ស់​ខ្លួន​ទៅក្នុង​ពន្ធនាគារ ពីព្រោះ​ការជួប​នេះ មិនមែនជា​ការ​ជួប​សួរសុខទុក្ខ​ធម្មតា​ទេ ហើយ​បើ​ជួប​សួរសុខទុក្ខ​ធម្មតា​នៅ​ពេល​ចេញ​មក​វិញ គឺ​ត្រូវ​ប្រាប់​អ្នកសារព័ត៌មាន​ពី​ស្ថានភាព​របស់​អ្នកទោស​ដូចជា សុខទុក្ខ ការ​ទទួល​ទាន​អាហារ និង​សុខភាព​ជាដើម តែ​ផ្ទុយទៅវិញ ក្រោយពី​អ្នកតំណាងរាស្ត្រ​ទាំងនោះ​ទៅ​ជួប​សកម្មជន គឺ​តែងតែ​មាន​សារ​នយោបាយ​ជានិច្ច ដូច្នេះ​មានន័យថា ការ​ជួប​នោះ​មិនមែន​ធម្មតា​ទេ ហើយ​ពួកគាត់​មិន​ស្មោះត្រង់​ជាមួយ​អាជ្ញា​ធរមាន​សមត្ថកិច្ច

ទី​២, នាំ​ឲ្យ​មានការ​បន្លំ​ខ្លួន ដូច​ករណី​លោក ជុន ច័ន្ទ​បុត្រ​នេះ ដូច្នេះ​ការ​ជួប​នោះ​មាន​ភាព​មិនស្មោះត្រង់ ដូច្នេះ​ករណីនេះ ក្រសួង​ឯកភាព​លែង​ឲ្យ​មាន​តទៅទៀត​ហើយ ហើយ​ក្រសួង​ក៏បាន​បញ្ជូន​សំណើ​នេះ ទៅ​អគ្គស្នងការ​នគរបាល​ជាតិ ដើម្បី​ស៊ើបអង្កេត​ផង​ដែរ ប៉ុន្តែ​ជាបឋម គឺ​បើក​ការប្រជុំ​អ្នកច្បាប់​ជា​មុន​សិន ដើម្បី​លើក​វិធានការ​ថា​ តើ​សម្រេច​យក​វិធានការ​ណាមួយ​លើ​ករណីនេះ។

ទាក់ទង​ទៅនឹង​ការ​លើកឡើង​ថា បណ្តាញ​ព័ត៌មាន​វិទ្យុ​អាស៊ីសេរី ដែល​តែងតែ​និយាយ​អួតអាង​ថា ជា​វិទ្យុ​ឯករាជ្យ មិនមាន​និន្នាការ​នយោបាយ ប៉ុន្តែ​បែរជា​មាន​ទំនាក់ទំនង​ជ្រៅ​ជាមួយ​គណបក្សប្រឆាំងរ​ហូត​អាច​លួច​បន្លំ​ខ្លួន​ជា​ជំនួយការ​បែបនេះ លោក​ខៀវ សុភ័គ អះអាង​ថា យើង​ឃើញ​ទាំងអស់​គ្នា​ហើយ​ថា កន្លងមក​ក៏មាន​ប្រទេស​មួយ​បាន​រងគ្រោះ​ដោយសារ​បណ្តាញ​ព័ត៌មាន​បែបនេះ​ដែរ តែ​លោក​មិនបាន​បញ្ចេញ​ឈ្មោះ ប្រទេស ឬ​វិទ្យុ​ណាមួយ​នោះ​ទេ តែ​ជា​បទពិសោធន៍ បាន​ឆ្លុះបញ្ចាំង​ពី​បញ្ហា​នៅ​កម្ពុជា​ផង​ដែរ ដែល​យើង​ចាត់ទុកថា​ជា​ព័ត៌មាន​មិន​អព្យាក្រឹត្យ​ទេ គឺជា​ព័ត៌មាន​លំអៀង ដូច​សម្តេច​តេ​ជោ​ធ្លាប់​បាន​លើក​ឡើង​ហើយ​ថា អ្វី​ដែល​កើតមាន​នៅ​កម្ពុជា គឺ​កើត​មាននៅ​អាមេរិក ហើយ​ដូច្នេះ​វា​ជា​ព័ត៌មាន​លំអៀង។

សូម​បញ្ជាក់​ថា កាលពី​ព្រឹក​ថ្ងៃ​ទី​១៩ ខែមេសា ឆ្នាំ​២០១៧ ថ្នាក់ដឹកនាំ​គណបក្ស​សង្គ្រោះ​ជាតិ ដឹកនាំ​ដោយ​លោកស្រី មូរ សុខ​ហួរ និង​លោក ឡុង រី បាន​ចូល​ជួប​សួរសុខទុក្ខ​អ្នកទោស​ជា​សមាជិក​គណបក្ស​ចំនួន​១៦​នាក់ ដែល​កំពុង​ជាប់ពន្ធនាគារ​ព្រៃ​ស ហើយ​នៅ​ពេលនោះ លោក ជុន ចាន់​បុត្រ អនុប្រធាន​វិទ្យុ​អាស៊ីសេរី​ផ្នែក​ភាសា​ខ្មែរ ក៏បាន​បន្លំ​ខ្លួន​ចូល​ផងដែរ ដោយ​ដាក់ឈ្មោះ ហួត វុទ្ធី ជា​ជំនួយការ ហើយ​គោលបំណង​នៃ​ការ​ចូល​នោះ គឺ​លោក ជុន ច័ន្ទ​បុត្រ ចង់​ជួប​ជាមួយ​លោក គឹម សុខ ដែល​កំពុង​ជាប់ឃុំ​នៅ​ទីនោះ។

ចំណែក​លោក ឡុង រី តំណាងរាស្ត្រ​គណបក្ស​សង្គ្រោះ​ជាតិ មណ្ឌល​បន្ទាយមានជ័យ បាន​បញ្ជាក់ថា លោក ជុន ចាន់​បុត្រ ពិតជា​បាន​ចូល​ទៅ​ក្នុង​បរិវេណ​ពន្ធនាគារ​ព្រៃ​ស​ពិតមែន ដោយ​ចូល​ជាមួយ​ក្រុម​តំណាងរាស្ត្រ ក្នុងនាម​អ្នកសារព័ត៌មាន និង​មានបំណង​ចង់​ជួប​អ្នកវិភាគ​នយោបាយ ដែល​កំពុង​ជាប់ឃុំ គឺ​លោក គឹម សុខ​៕



ប្រសិនបើ លោក លោកស្រីចង់ចែករំលែកនូវព័ត៌មានទាន់ហេតុការណ៍ផ្សេងៗ សូមផ្ញើ អ៊ីម៉ែលមកកាន់អាសយដ្ឋានដូចដែលបានបង្ហាញខាងក្រោម។ សម្រាប់ការផ្សាយពាណិជ្ជកម្មលើគេហទំព័រនេះ សូមទំនាក់ទំនងតាមលេខទូរស័ព្ទៈ 016 877 684