ព័ត៍មានទាន់​ហេតុការណ៏
Search

អាជ្ញាធរ​រាជធានី-ខណ្ឌ ស្នើ​ឱ្យ​កែសម្រួល​ពន្ធ​ប្រថាប់ត្រា និង​ផ្តល់សេវា​ជូន​ប្រជាពលរដ្ឋ ឲ្យបានលឿន​

ភ្នំពេញ​ ៖ អាជ្ញាធរ​ខណ្ឌ មន្ទីរ​រៀបចំ​ដែនដី​នគររូបនីយកម្ម ​និង​សំណង់​រាជធានី បានធ្វើការ​ស្នើសុំ​យ៉ាង​ទទូច ​ទៅ​អគ្គនាយកដ្ឋាន​ពន្ធដារ ឱ្យ​កែសម្រួល​ពន្ធ​ប្រថាប់ត្រា លើ​កា​រកំណត់​តម្លៃ​ដីធ្លី​លើស​ទីផ្សារសេរី​ និង​ការកាត់បន្ថយ​ពេលវេលា​ ក្នុង​ការផ្តល់សេវា​ប្រថាប់ត្រា​ ជូន​ប្រជាពលរដ្ឋ​ឱ្យបាន​លឿន​។​

ការ​ស្នើ​ឡើង​យ៉ាង​ទ​ទូច​ពី​អាជ្ញាធរ​ថ្នាក់​ខណ្ឌ-មន្ទីរ​ ខាងលើនេះ​បានធ្វើ​ឡើង កាលពី​ព្រឹក​ថ្ងៃទី​០៣ ខែឧសភា ឆ្នាំ​២០១៧ ក្នុង​កិច្ចប្រជុំ​មួយ ស្ដីពី​ការធ្វើការ​កែសម្រួល​ពន្ធ​ប្រថាប់ត្រា ក្រោម​អធិបតីភាព​លោក ប៉ា សុជាតិ​វង្ស អភិបាល​រាជធានី​ភ្នំពេញ និង​លោក គង់ វិបុល អគ្គនាយក នៃ​អគ្គនាយកដ្ឋាន​ពន្ធដារ ដោយមាន​ការចូលរួម​ពី អភិបាលខណ្ឌ​ទាំង​១២​ មន្ទីរ​ពាក់ព័ន្ធ​ និង​មន្ត្រី​ពន្ធដារ​ជាច្រើន​នាក់​ផងដែរ​។​

អាជ្ញាធរ​ថ្នាក់​ខណ្ឌ ដូចជា​ខណ្ឌ​ជ្រោយចង្វា និង​ខណ្ឌដង្កោ ​បានស្នើ​យ៉ាងទទូច​ដល់​អគ្គនាយក​ពន្ធដារ ក្នុងការ​បន្ថយ​ពេលវេលា​បញ្ចេញ​ឯកសារ​ឲ្យ​មក​ប្រជាពលរដ្ឋឱ្យ​ខ្លី​ជាង​មុន ការស្នើសុំ​ពិនិត្យឡើងវិញ​លើ​ការវាយតម្លៃ​ដីធ្លី​ខ្ពស់ជាង​តម្លៃ​ទីផ្សារ​ជាដើម​។ អាជ្ញាធរ​ថា កន្លងមកនេះ​ទម្រាំ​ចេញ​ឯកសារ​មួយៗ​ប្រើពេល​ពី​២​ខែ ​ទៅ ​៣​ខែ ដែល​ធ្វើឱ្យ​មានការ​ថ្នាំងថ្នាក់​ពី​ប្រជាពលរដ្ឋ។​

លោក ​ឃ្លាំង ហួត អភិបាលខណ្ឌ​ជ្រោយចង្វា​ បាន​លើ​ឡើង​ថា ការផ្តល់សេវា​ប្រថាប់ត្រា​លើដី​ធ្លី ដែល​កំណត់​រយៈពេល​៤​ទៅ​៨​ថ្ងៃនោះ គឺ អគ្គនាយក​ពន្ធដារធ្វើ​មិន​បានទេ ដោយ​ប្រើប្រាស់​ពេលវេលា​យ៉ាងតិច​បំផុត​រយៈពេល​២០​ថ្ងៃ ឬ​អាច​២​ ទៅ​ ៣​ខែ​ទើបបាន​។​ នេះ​ជា​ភាពយឺតយ៉ាវ​មួយ ​ដែល​បង្កឱ្យមាន​ការ​ថ្នាំងថ្នាក់​ពី​ប្រជាពលរដ្ឋ​។

​ជាងនេះទៅទៀត​ ចំពោះ​ការ​កំណត់​តម្លៃ​ដីធ្លីជូន​ប្រជាពលរដ្ឋ​នៅ​តំបន់​ខ្លះ អគ្គនាយក​ពន្ធដារ បានដាក់​តម្លៃ​ថ្លៃ​ហួស​ពី​តម្លៃ​ទីផ្សារ។​ ជាក់ស្តែង​នៅ​សង្កាត់​កោះដាច់ អគ្គនាយក​ពន្ធដារ បានដាក់​តម្លៃ​ដី​មួយ​ម៉ែត្រការ៉េ ​រហូតដល់​២០០​ដុល្លារ លោក​ថាមិនដឹង​អគ្គនាយក​ពន្ធដារ យក​ចំណុច​ណា​មក​វាយ​តម្លៃ​ទេ​ បានជា​តម្លៃ​ដី​នៅ​សង្កាត់​កោះដាច់​ មានតម្លៃ​ថ្លៃ​បែបនេះ ស្រប​ពេលដែល​តម្លៃ​ដី​នៅ​តំបន់​នេះ​ខ្ពស់បំផុត​ត្រឹម​៧០​ ទៅ ​៨០​ដុល្លារ​ ក្នុង​មួយ​ម៉ែត្រការ៉េ​នោះ​។​ បញ្ហា​នេះ​លោក​ស្នើឱ្យ​អគ្គនាយក​ពន្ធដារ ធ្វើការ​កែសម្រួល​ឡើងវិញ​។​

លោក គង់ វិបុល អគ្គនាយក នៃ​អគ្គនាយកដ្ឋាន​ពន្ធដារបាន​បញ្ជាក់ថា ការបញ្ចេញ​ឯកសារ​ប្រថាប់ត្រា លោក​ទទួលស្គាល់ថា ពិត​ជាមាន​ភាពយឺតយ៉ាវ ដោយ​រឿង​ខ្លះខ្វះឯកសារ និង​ម្ចាស់​ឯកសារ​មិន​មក​យក ដោយសារ​បំណុល​ច្រើន​។ សម្រាប់​ដី​នៅ​សង្កាត់​កោះដាច់​ មានតម្លៃ​មួយ​ម៉ែត្រការ៉េ​រហូតដល់​២០០​ដុល្លារ លោក​ក៏​ទទួលស្គាល់ថាវា​ជា​រឿង​ពិត​ដែរ ដែល​នេះ​យើង​ដាក់​តម្លៃ​ទៅតាម​បញ្ជី​ដែល​បានកំណត់​រួច យើង​មិនអាច​កែប្រែ​ប​ស្រេច​តែ​ចិត្ត​បានទេ ។​ ប៉ុន្តែ​ការងារ​នេះ​អាច​បញ្ចុះតម្លៃមកក្រោម​នេះ​បាន​ មានតែ​អនុគណៈកម្មាធិការ​វាយតម្លៃ​រាជធានី​ភ្នំពេញ ​ឬ​អាជ្ញាធរ​រាជធានី ​ធ្វើការ​ស្នើ​ទៅ​អគ្គនាយកដ្ឋាន​ពន្ធដារ ដើម្បី​ធ្វើកា​រកែសម្រួល​ឡើងវិញ​។

លោក ប៉ា សុជាតិ​វង្ស អភិបាល​រាជធានី​ភ្នំពេញ បាន​លើកឡើងថា ការធ្វើ​ល្អ ធ្វើបាន​មិនបាន មានគុណ​សម្បត្តិ​ ឬ​មិនមាន​គុណសម្បត្តិ មិនមែន​យើង​ខ្លួនឯង​ជា​អ្នកវាយតម្លៃ​នោះទេ គឺ​ប្រជាពល​រដ្ឋ​លោក​ជា​អ្នកវាយតម្លៃ ដូច្នេះ​ទេយើង​ជា​មន្ត្រី​របស់​រដ្ឋាភិបាល​ ត្រូវតែ​បម្រើ​សេវាឱ្យបាន​ល្អ​ជូន​ប្រជាពលរដ្ឋ​។​

លោក​បញ្ជាក់ថា តាម​ការ​ស្ទាបស្ទង់​ចុះ​តាម​មូលដ្ឋាន ប្រជាពលរដ្ឋ ​បានលើកឡើង​ពី​បញ្ហា​ប្រឈម​ជាច្រើន ហើយ​បញ្ហា​ទី​១ ដែល​ប្រឈម​ខ្លាំង​នោះ​ គឺ ការផ្តល់សេវា​ប្រថាប់ត្រា​នេះហើយ ដូច្នេះ​ទេ​ការចុះ​មូលដ្ឋាន​ ដាច់ខាត​ត្រូវតែមាន​មន្ត្រី​ពន្ធដារ​ចូល​រួម ហើយ​បើ​មាន​បញ្ហា​អ្វីមួយ​យើង​ដោះស្រាយបាន​ភ្លាមៗ​តែម្តង​។​

​សូមបញ្ជាក់ថា បញ្ហា​ពន្ធ​នេះ ជា​រឿង​ដែល​ស្មុគស្មាញ​មួយ​របស់​ប្រជាពលរដ្ឋ នៅពេលដែល​ពួកគាត់​ត្រូវ​ការលក់​អចលនទ្រព្យ ដោយហេតុថាពួកគាត់​កង្វះ​ការយល់ដឹង​អំពី​បញ្ហា​នេះ​៕



ប្រសិនបើ លោក លោកស្រីចង់ចែករំលែកនូវព័ត៌មានទាន់ហេតុការណ៍ផ្សេងៗ សូមផ្ញើ អ៊ីម៉ែលមកកាន់អាសយដ្ឋានដូចដែលបានបង្ហាញខាងក្រោម។ សម្រាប់ការផ្សាយពាណិជ្ជកម្មលើគេហទំព័រនេះ សូមទំនាក់ទំនងតាមលេខទូរស័ព្ទៈ 012 454 575 និង 012 499 114