ព័ត៍មានទាន់​ហេតុការណ៏
Search

ពិតជា​អស្ចារ្យ​មែន​! នាយ ចឺម ទទួល​បាន​កាដូ​ រថយន្ត​ស៊េរី​ទំនើប​១​គ្រឿង​ពី​ឪពុកធម៌

ភ្នំពេញ​ ៖ ​តារា​ចម្រៀង​ និង​កំប្លែង​វ័យក្មេង​ពូកែ​វោហារស័ព្ទ ​ស្ថិតនៅក្នុង​ក្រុម​នាយ ពែ​ក មី គឺ​នាយ ចឺម ថ្មីៗ​នេះ​បង្ក​ការចាប់អារម្មណ៍ ​និង​ភ្ញាក់ផ្អើល​ដល់​មហាជន ​ខណៈ​នៅ​សុខៗ​ស្រាប់​តារា​កំប្លែង​វ័យក្មេង​រូបនេះ​ បាន​ទម្លាយ​រូបភាព​ប្រមាណ​៥​​ ទៅ​៦សន្លឹក ​ជាមួយ​រថយន្ត​ស៊េរី​ទំនើប​ថ្មី​មួយគ្រឿង​ទៀត ​ដែលជា​សមាជិក​ថ្មី​ទើបនឹង​ទទួលបាន​ពីការឧបត្ថម្ភ​ធ្វើជា​កាដូ​ ពី​សំណាក់​ឪពុកធម៌​ម្ចាស់​ផលិតកម្ម​ BKS​។

ជាមួយ​គ្នា​នេះ ​បើ​តាម​រយៈ​បណ្ដាញ​សង្គម​ហ្វេ​ស​ប៊ុ​ក​របស់​តារា​កំប្លែង​នាយ ក្រូច ដែល​​​គេ​ដឹង​​​គ្រប់គ្នា​ថា ​ជា​ពូ​របស់​នាយ ចឺម​នោះ​ បាន​សម្តែង​អារម្មណ៍​សាទរ​ថា ជឿ​ទេ​ថា​ម្ចាស់​ផលិតកម្ម​ BKS​ ធ្វើ​កាដូ​​ថ្មី​ជូន​នាយ ចឺម បើ​មិន​ជឿ​អោយ​លុយ​មក​ហិ​ហិ​ហិ​ សប្បាយ​ជួស​ក្មួយ​សំណាង​មែន​ក្មួយ​ពូ​។

ជុំវិញ​ដំណឹង​ល្អ​របស់​នាយ ចឺម ដែល​ត្រូវបាន​ឪពុកធម៌​ម្ចាស់​ផលិតកម្ម​ BKS ​ផ្តល់​កាដូ​​ រថយន្ត​ស៊េរី​ទំនើប​ម៉ាក​ TUNDRA​ ដ៏​ថ្មី​សន្លាង​នេះ​ កម្ពុជា​ថ្មី​ នា​ព្រឹក​ថ្ងៃទី​១៩ ខែឧសភា ឆ្នាំ​២០១៧​នេះ ​បាន​ភ្ជាប់​ទំនាក់ទំនង​តាម​ទូរស័ព្ទ​ជាច្រើន​លើក ដើម្បី​សួរនាំ​ពី​ចំណាប់អារម្មណ៍​បន្ថែម​ដែរ​ ប៉ុន្តែ​ទូរស័ព្ទ​មិនអាច​ធ្វើការ​ទាក់ទង​បានឡើយ​។ ​ដោយឡែក​ងាក​មក​ចាប់អារម្មណ៍​នៅលើ​បណ្តាញ​សង្គម​ហ្វេ​ស​ប៊ុ​ក​របស់នាយ ចឺម ឯណេះ​វិញ​ គឺ​បានបញ្ជាក់​ដោយ​ខ្លី​ថា ​អរគុណ​ណាស់​លោកប៉ា​ ដែល​ធ្វើ​ឲ្យ​កូន​រំភើប​ដោយ​មិនដឹង​ខ្លួន​ ជូនពរ​ឲ្យ​លោកប៉ា​សុខភាព​ល្អ​រកស៊ី​មានបាន​។

ជាការ​កត់សម្គាល់ ​តារា​កំប្លែង​ប្រុស​វ័យក្មេង​មាន​ដើមកំណើត​មកពី​ទឹកដី​ខេត្តកំពង់ស្ពឺ ​នាយ ចឺម អំឡុង​មួយរយៈ​ពេល​ចុងក្រោយ ​ពោលគឺ​២​ ទៅ​៣​ឆ្នាំនេះ​ ទាំង​អាជីព​កំប្លែង​ និង​ចម្រៀង​​ហាក់​មាន​ស្ទុះ​ឡើង​មិន​ធម្មតាឡើ​យ ​នេះ​បើ​ប្រៀបធៀប​ជាមួយ​តារា​ផ្សេង​ឯទៀត​ គឺ​នាយ ចឺម ជា​តារា​វ័យក្មេង​ដែល​អាច​រកបាន​ប្រាក់ចំណូល​ខ្ពស់​មិន​ចាញ់​គេ​ឡើយ​៕



ប្រសិនបើ លោក លោកស្រីចង់ចែករំលែកនូវព័ត៌មានទាន់ហេតុការណ៍ផ្សេងៗ សូមផ្ញើ អ៊ីម៉ែលមកកាន់អាសយដ្ឋានដូចដែលបានបង្ហាញខាងក្រោម។ សម្រាប់ការផ្សាយពាណិជ្ជកម្មលើគេហទំព័រនេះ សូមទំនាក់ទំនងតាមលេខទូរស័ព្ទៈ 016 877 684