ព័ត៍មានទាន់​ហេតុការណ៏
Search

នាយ កុយ ព្រម​ទទួលយក​អ្នកនាង ឃ្មិ​ប ឲ្យ​ចូល​ជា​សមាជិក​ក្រុម​កំប្លែង​របស់ខ្លួន​វិញ

ភ្នំពេញ​ ៖ ព្រោះតែ​មើលឃើញ​ពី​ភាពលំបាក​ និង​ក្តី​អាណិតអាសូរ​ផង​នោះ ​អតីត​តារា​កំប្លែង​ អ្នកនាង ឃ្មិ​ប ពេលនេះ​ត្រូវបាន​តារា​កំប្លែង​ជើងចាស់​មានឈ្មោះ​ល្បី​គឺ​នាយ កុយ បានសម្រេច​យល់ព្រម​ទទួលយក​ អ្នកនាង​ ឲ្យ​ចូល​ជា​សមាជិក​ក្រុម​កំប្លែង​របស់ខ្លួន​វិញ ​ក្នុង​គោលបំណង​ដើម្បី​ជួយ​សម្រួល​ដល់​ជីវភាព​ និង​បញ្ហា​ការ​លំបាក​ដែល​កំពុង​ជួបប្រទះ​នាពេល​សព្វថ្ងៃនេះ​។

ផ្អែក​តាម​ការ​ដក​ស្រង់​សម្តី​នៃ​កិច្ច​សម្ភាសន៍​មួយ ​រវាង​លោក ហេង ឡុង ជាមួយ​តារា​កំប្លែង​នាយ កុយ រួម​នឹង​វត្តមាន​អ្នកនាង ឃ្មិ​ប កាលពី​វេលា​ថ្ងៃត្រង់​ថ្ងៃទី​១៩ ខែឧសភា ឆ្នាំ​២០១៧ បានបញ្ជាក់​ថា ​ដោយ​មើលឃើញ​ពី​ទុក្ខលំបាក​របស់​អ្នកនាង ឃ្មិ​ប ដែល​ត្រូវ​ធ្លាក់ខ្លួន​ក្រ​ស្ទើរ​ហៅមិនឮ​ ​និង​ពិនិត្យ​តាមរយៈ​រូបភាព​ជាក់ស្តែង​នោះ​ លោក ហេង ឡុង អនាគត​ស្វាមី​អ្នកនាង ច​ន ច័ន្ទ​លក្ខិណា បានធ្វើការ​ទាក់ទង​ និង​ស្នើនាយ កុយ ដើម្បី​សុំ​ឲ្យ​អ្នកនាង ឃ្មិ​ប បាន​វិល​ចូល​វិស័យ​សិល្បៈ​(​កំប្លែង​)​វិញ​។ ជា​ចម្លើយ​ត្រូវបាន​តារា​កំប្លែង​ភ្នែក​តឹងៗ​ នាយ កុយ យល់ព្រម​លើ​ករណីនេះ​។
​​
តាមរយៈ​កិច្ច​សម្ភាសន៍​នោះដែរ ​នាយ កុយ ក៏បាន​ប្រកាស​ជា​សាធារណៈ​ថា​ លោក​យល់ព្រម​ទទួលយក​អ្នកនាង ឃ្មិ​ប ឲ្យ​ចូល​ជា​សមាជិក​ក្រុម​កំប្លែង​របស់ខ្លួន​វិញ​ ដោយហេតុ​ថាបើ​ពិនិត្យ​តាម​ភាពជាក់ស្តែង​នាពេលនេះ​ អ្នកនាង ឃ្មិ​ប ប្រៀបបាន​ដូចជា​ទូក​កំពុង​រសាត់​នៅ​កណ្តាល​ទន្លេ​រ​កកោះ​ត្រើយ​មិនឃើញ​ឡើយ​។​ ម្យ៉ាងទៀត​ការហៅអ្នក​នាង ឃ្មិ​ប ឲ្យ​ចូល​ក្រុម​វិញ​នេះ​ក៏​ជាការ​ចែករំលែក​ដើម្បី​ជួយ​ដោះស្រាយ​ជីវភាព​នាង​ឡើងវិញ​ផងដែរ​។

ជាមួយគ្នា​នោះ​ នាយ កុយ ក៏បាន​បញ្ជាក់​បន្ថែមថា​ ការយល់ព្រម​ទទួលយក​អ្នកនាង ឃ្មិ​ប ចូល​ជា​សមាជិក​កំប្លែង​ក្នុង​ក្រុម​របស់ខ្លួន​វិញ​នេះ ​ក៏​មានការ​ឯកភាពគ្នា​ពី​សំណាក់​នាយ ហុង ដា ដែលជា​អតី​ត​ស្វាមី​នាង​ផងដែរ​ ក្រោយ​មានការ​សម្របសម្រួល​របស់លោក​ដោយផ្ទាល់​។

ដោយឡែក​ចំពោះ​សាមីខ្លួន​ អ្នកនាង ឃ្មិ​ប បន្ទាប់ពី​បាន​ស្តាប់ឮ​ការប្រកាស​ដោយ​ទទួលយក​ឲ្យ​ចូល​កំប្លែង​ក្នុង​ក្រុម​នាយ កុយ វិញ​ ភ្លាមៗ​នេះ​នាង​បាន​បញ្ហាញ​ពី​អារម្មណ៍​រំភើប​សប្បាយ​ និង​ដឹងគុណ​ដល់​នាយ កុយ ព្រមជាមួយ​ការសន្យា​ថា​ នឹង​ត្រូវខិតខំ​ប្រឹងប្រែង​ដើម្បី​កសាង​ជីវិត​ថ្មី​ផងដែរ​៕



ប្រសិនបើ លោក លោកស្រីចង់ចែករំលែកនូវព័ត៌មានទាន់ហេតុការណ៍ផ្សេងៗ សូមផ្ញើ អ៊ីម៉ែលមកកាន់អាសយដ្ឋានដូចដែលបានបង្ហាញខាងក្រោម។ សម្រាប់ការផ្សាយពាណិជ្ជកម្មលើគេហទំព័រនេះ សូមទំនាក់ទំនងតាមលេខទូរស័ព្ទៈ 016 877 684