ព័ត៍មានទាន់​ហេតុការណ៏
Search

៣​ខែ​ដើម​ឆ្នាំនេះ​មាន​អ្នកជំងឺ​ជិត​៣​លាននាក់ មក​ពិនិត្យ​និង​ព្យាបាល​ជំងឺ​នៅ​មណ្ឌល​សុខភាព និង​មន្ទីរពេទ្យ​រដ្ឋ​ទូទាំងប្រទេស

ភ្នំពេញ ៖​ នៅ​ក្នុង​រយៈពេល​៣​ខែ ដើម​ឆ្នាំ​២០១៧​នេះ​ មាន​អ្នកជំងឺ​ជិត​៣​លាន​នាក់​ បាន​មក​ពិនិត្យ​ពិគ្រោះ​ជំងឺ​ក្រៅ​នៅ​មណ្ឌល​សុខភាព និង​មន្ទីរពេទ្យ​រដ្ឋ នៅ​ទូទាំង​ប្រទេស​កម្ពុជា។

បើ​តាម​របាយការណ៍​របស់​ក្រសួងសុខាភិបាល បាន​ឲ្យ​ដឹង​ថា ចាប់ពី​ខែមករា ដល់​ខែមីនា ឆ្នាំ២០១៧​នេះ ស្ថិតិ​នៃ​ការប្រើប្រាស់​សេវា​ថែទាំ​សុខភាព​របស់​ប្រជាពលរដ្ឋ នៅ​មណ្ឌល​សុខភាព និង​មន្ទីរពេទ្យ​រដ្ឋ​ទូទាំង​ប្រទេស សរុប​មាន​ចំនួន​២៧៤២៧៧១ ករណី ក្នុង​នោះ​ករណី​ថ្មី​មាន ២៣៩៧៥០១​ករណី។

របាយការណ៍​ដដែល​ប​ន្ថែ​ម​ថា​ ក្នុងចំណោម​២៧៤២៧៧១​ករណី ការប្រើប្រាស់​សេវា​ដោយ​ប្រជាពលរដ្ឋ​ក្រីក្រ គាំទ្រ​ក្រោម​កម្មវិធី​មូលនិធិ​សមធម៌ ដែល​ផ្ដល់​មូលនិធិ​ដោយ​រាជរដ្ឋាភិបាល និង​ដៃគូ​អភិវឌ្ឍ​មាន ៣៧៦១២៩​ករណី និង​ទទួល​បាន​ការលើកលែង​បង់ថ្លៃ​សេវា តាម​គោលនយោបាយ​របស់​រាជ​រដ្ឋាភិបាល​មាន ២៦៩៩៥៨​ករណី។

រយៈពេល​៣​ខែ​នេះ​ដែរ ​មាន​អ្នកជំងឺ​សម្រាក​ព្យាបាល​នៅ​តាម​មណ្ឌល​សុខភាព​និង​មន្ទីរពេទ្យ​រដ្ឋ​ចំនួន​១៩០៣៤៨​នាក់​ ក្នុង​នោះ​មាន​អត្រា​ស្លាប់​០,៩០​ភាគរយ​ក្នុងចំណោម​អ្នកជំងឺ​សម្រាក​ព្យាបាល​សរុប។

ក្នុងចំណោម​អ្នក​សម្រាក​ព្យាបាល​១៩០៣៤៨​នាក់ ​ខាងលើ​នេះ​ អ្នកជំងឺ​ក្រីក្រ​ដែល​ប្រើប្រាស់​សេវា​ក្រោម​កម្មវិធី​មូលនិធិ​សមធម៌ ដែល​ផ្ដល់​មូលនិធិ​ដោយ​រាជរដ្ឋាភិបាល និង​ដៃគូ​អភិវឌ្ឍ​មាន​ចំនួន​១៧១៨៧​នាក់​ និង ​ទទួល​បាន​ការលើកលែង​បង់ថ្លៃ​សេវា តាម​គោលនយោបាយ​របស់​រាជ​រដ្ឋាភិបាល​មាន​ចំនួន​៦២៨០​នាក់។

របាយការណ៍​ដដែល​បាន​ឲ្យ​ដឹង​ទៀត​ថា រយៈពេល​៣​ខែ​ដើម ឆ្នាំនេះ​អ្នក​សម្រាលកូន​មាន ៧២១៣៤​នាក់ ក្នុង​នោះ​សម្រាល​នៅ​មណ្ឌល​សុខភាព​ចំនួន​៣៨៨៥៨​នាក់​។ ​ក្នុងចំណោម​នោះ​អ្នក​សម្រាល​ដែល​គាំទ្រ​ដោយ​កម្មវិធី​មូលនិធិ​សមធម៌ ផ្ដល់​ដោយ​រាជរដ្ឋាភិបាល និង​ដៃគូ​អភិវឌ្ឍ​មាន​៤៨១៤​នាក់ ហើយ​ទទួល​បាន​ការលើកលែង​ការ​បង់ថ្លៃ​សេវា តាម​គោលនយោបាយ​របស់​រាជ​រដ្ឋាភិបាល​កម្ពុ​ជាមាន ៣៩២៧​នាក់។

គួរ​បញ្ជាក់​ថា ​កាលពី​ឆ្នាំ​២០១៦​កន្លងទៅ​មាន​អ្នកជំងឺ​ដែល​មក​ពិនិត្យ​និង​ព្យាបាល​ជំងឺ​នៅ​មណ្ឌល​សុខភាព និង​មន្ទីរពេទ្យ​រដ្ឋ​ទូទាំង​ប្រទេស​សរុប​ចំនួន​១១៤៣៨៧២២​ករណី​ កើន​លើស​ពី​ឆ្នាំ​២០១៥​ចំនួន​១០៥៨១០៦​ករណី​។

ក្នុង​នោះ​ការពិនិត្យ​ជំងឺ​ក្រៅ​ថ្មី​មាន​ចំនួន​៩៩០០៦៥២​ករណី​។ ​ចំណែក​អ្នក​សម្រាក​ព្រាល​បាល​វិញ​មាន​ចំនួន​៨០៧៤២៥​នាក់៕



ប្រសិនបើ លោក លោកស្រីចង់ចែករំលែកនូវព័ត៌មានទាន់ហេតុការណ៍ផ្សេងៗ សូមផ្ញើ អ៊ីម៉ែលមកកាន់អាសយដ្ឋានដូចដែលបានបង្ហាញខាងក្រោម។

សម្រាប់ការផ្សាយពាណិជ្ជកម្មលើគេហទំព័រនេះ សូមទំនាក់ទំនងតាមលេខទូរស័ព្ទៈ 016 877 684