ព័ត៍មានទាន់​ហេតុការណ៏
Search

ការឃោសនា​រក​សំឡេងឆ្នោត​របស់​គណបក្ស​នយោបាយ​សម្រាប់​ការបោះឆ្នោត​ឃុំ​សង្កាត់ នឹង​ចាប់ផ្តើម​នៅ​ព្រឹក​ស្អែកនេះហើយ

ភ្នំពេញ ​៖ ការឃោសនា​រក​សំឡេងឆ្នោត​សម្រាប់​ការបោះឆ្នោត ជ្រើសរើស​ក្រុមប្រឹក្សាឃុំ​-​សង្កាត់ អាណត្តិ​ទី​៤ ឆ្នាំ​២០១៧ នឹង​ត្រូវ​ចាប់ផ្តើម​នៅ​ព្រឹក​ថ្ងៃ​សៅរ៍​ទី​២០ ខែឧសភា ឆ្នាំ​២០១៧ ​ហើយ​គណបក្ស​នីមួយៗ​មានកម្ម​វិធី​ដង្ហែ​ក្បួន​ឃោសនា​រក​សំឡេងឆ្នោត​រៀងៗ​ខ្លួន រយៈពេល​១៤ថ្ងៃ។

ការបោះឆ្នោត​ជ្រើសរើស​ក្រុម​ប្រឹក្សាឃុំ​-​សង្កាត់ អាណត្តិ​ទី​៤ នឹង​ប្រព្រឹត្តទៅ​នៅ​ថ្ងៃ​ទី​០៤ ខែមិថុនា ឆ្នាំ​២០១៧ ហើយ​មាន​គណបក្ស​ចំនួន​១២ បាន​ចូលរួម​ប្រកួតប្រជែង ដែល​រួមមាន ទី​១-​គណបក្ស​ប្រជាជន​កម្ពុជា ទី​២-​គណបក្ស​សង្គ្រោះ​ជាតិ ទី​៣- គណបក្ស​ហ្វ៊ុនស៊ិនប៉ិច ទី​៤- គណបក្ស​សម្ព័ន្ធ ដើម្បី​ប្រជាធិបតេយ្យ ទី​៥- គណបក្ស​សំបុក​ឃ្មុំ សង្គម​ប្រជាធិបតេយ្យ ទី​៦- គណបក្ស​ប្រជាធិបតេយ្យ​មូលដ្ឋាន ទី​៧- គណបក្ស​ខ្មែរ​រួបរួម​ជាតិ ទី​៨- គណបក្ស​សញ្ជាតិ​កម្ពុជា ទី​៩- គណបក្ស​សាធារណរដ្ឋ​ប្រជាធិបតេយ្យ ទី​១០- គណបក្ស​យុវជន​កម្ពុជា ទី​១១- គណបក្ស​អំណាច​ខ្មែរ និង​ទី​១២- គណបក្ស​ជនជាតិដើម​ប្រជា​ប្រជាធិបតេយ្យ​កម្ពុជា។

នៅ​តាម​រាជធានី ខេត្ត គណបក្ស​នីមួយៗ​មានកម្ម​វិធី​ដង្ហែ​ក្បួន​ឃោសនា​រៀងៗ​ខ្លួន​។ ដោយឡែក​នៅ​ភ្នំពេញ គណបក្ស​សង្គ្រោះ​ជាតិ​នឹង​ធ្វើ​ការជួប​ជុំគ្នា​ធំ​នៅ​លើ​ផ្លូវ​៦០​ម៉ែត្រ ស្ថិតក្នុង​សង្កាត់​ចាក់អង្រែ​ក្រោម ខណ្ឌមានជ័យ ដោយ​ធ្វើការ​ជួបគ្នា​នៅវេលា​ម៉ោង​៦​ព្រឹក ហើយ​ហែក្បួន​ទៅតាម​បណ្តា​ផ្លូវ​មួយ​ចំនួន​ក្នុង​រាជធានី​ភ្នំពេញ នេះ​បើតាម​សេចក្តីប្រកាស​ព័ត៌មាន​របស់​គណបក្ស និង​តម្រាយ​ផ្លូវ​របស់​គណបក្ស​។ ចំណែក​គណបក្ស​ប្រជាជន​កម្ពុជា​រាជធានី​ភ្នំពេញ នឹងធ្វើ​ការ​ជួប​ជុំ​គ្នា​នៅ​មជ្ឈមណ្ឌល​កោះ​ពេជ្រ​។ ដោយឡែក​គណបក្ស​ផ្សេងៗ​ទៀត មិនមាន​ឃើញ​កម្មវិធី​ហែ​ទេ តែមាន​កម្មវិធី​ជួបជុំ​សមាជិក សមាជិកា នៅតាម​ទីស្នាក់ការ​របស់ខ្លួន​។

ទាក់ទង​បញ្ហា​នេះ គណៈកម្មាធិការ​ជាតិ​រៀបចំ​ការបោះឆ្នោត (​គ​.​ជ​.​ប​) បាន​គូសបញ្ជាក់ថា គណបក្សនយោបាយ​ទាំងអស់​អាច​ដង្ហែ​ក្បួន​ឃោសនា​រក​សំឡេងឆ្នោត​តែ​នៅ​ក្នុង​ឃុំ សង្កាត់ ដែល​ខ្លួន​បាន​ចុះឈ្មោះ​ប្រកួតប្រជែង​តែប៉ុណ្ណោះ មិនអាច​ដង្ហែ​ក្បួន​ទៅ ឃុំ សង្កាត់ ដែល​មិនបាន​ចុះឈ្មោះ​ប្រកួតប្រជែង​នោះឡើយ​។ តាម គ​.​ជ​.​ប បើ​គណបក្សនយោបាយ​ណាមួយ​ចង់​ដង្ហែ​ក្បួន​ឆ្លងកាត់​ពី ឃុំ សង្កាត់ មួយ​ទៅកាន់​ឃុំ សង្កាត់ ដទៃ ដែល​ខ្លួន​បាន​ចុះឈ្មោះ​ចូលរួម​ប្រកួតប្រជែង​ដែរ គឺ​ត្រូវតែ​សុំ​ការអនុញ្ញាត​ជាមុន​ឲ្យ​បាន​៣​ថ្ងៃ ហើយ​គណបក្ស​នយោបាយ​មួយ​អាច​ដង្ហែ​ក្បួន​រក​សំឡេងឆ្នោត​បានតែ​ពីរ​ដង​ប៉ុណ្ណោះ នៅ​ក្នុង ឃុំ សង្កាត់ ដែល​ពួកគេ​បាន​ចុះឈ្មោះ​ចូលរួម​ប្រកួតប្រជែង។

សូម​បញ្ជាក់​ថា ការឃោសនា​រក​សំឡេងឆ្នោត​សម្រាប់​ការបោះឆ្នោត​ជ្រើសរើស​ក្រុមប្រឹក្សាឃុំ សង្កាត់ អាណត្តិ​ទី​៤ នឹង​ត្រូវ​ចាប់ផ្តើម​នៅ​ថ្ងៃទី​២០ ខែឧសភា ឆ្នាំ​២០១៧ ហើយ​ការ​ដង្ហែ​ក្បួន​ឃោសនា​រក​សំឡេងឆ្នោត​នេះ មាន​រយៈពេល​១៤​ថ្ងៃ ពោលគឺ​នឹង​ត្រូវ​បិទ​បញ្ចប់​នៅ​ថ្ងៃទី​០២ ខែមិថុនា ឆ្នាំ​២០១៧៕

 



ប្រសិនបើ លោក លោកស្រីចង់ចែករំលែកនូវព័ត៌មានទាន់ហេតុការណ៍ផ្សេងៗ សូមផ្ញើ អ៊ីម៉ែលមកកាន់អាសយដ្ឋានដូចដែលបានបង្ហាញខាងក្រោម។

សម្រាប់ការផ្សាយពាណិជ្ជកម្មលើគេហទំព័រនេះ សូមទំនាក់ទំនងតាមលេខទូរស័ព្ទៈ 016 877 684