ព័ត៍មានទាន់​ហេតុការណ៏
Search

ថៅកែ​ស្តី​បន្ទោស​រឿង​គូរយ័ន្ត​ដាក់​ស្នេហ៍​ដើម្បី​ឡើង​ប្រាក់​ខែ តូច​ចិត្ត​ទៅ​លោតទឹក

ភ្នំពេញ ​៖ ​ស្ត្រី​ម្នាក់ បាន​លោតទឹក​ស្ពាន​ជ្រោយចង្វារ​សម្លាប់​ខ្លួន​ តែ​មិន​ស្លាប់ ព្រោះ​មាន​ទូក​នេសាទ​​​ជួយ​ទាន់​ បន្ទាប់ពី​លួច លុយ​ថៅកែ​១០​ដុល្លារ​ទៅ​គូរ​យ័ន្ត​ដាក់​ស្នេហ៍​ឲ្យ​ថៅកែ​ដំឡើង​ប្រាក់ខែ​ឲ្យ ​ហើយ​ត្រូវ​ថៅកែ​ដឹង​ ​ស្ដីបន្ទោស​ឲ្យ​បន្តិចបន្តួច​នោះ។

ហេតុការណ៍​នោះ ​បាន​ភ្ញាក់ផ្អើល​កាល​ពី​វេលា​ម៉ោង​៣​និង​១៥​នាទី​រសៀល​ ថ្ងៃ​ទី​១៩​ ខែ​ឧសភា ​ឆ្នាំ​២០១៧ នៅ​ចំណុច​ស្ពាន​ជ្រោយចង្វារ​ចាស់ ស្ថិត​ក្នុង​សង្កាត់​ស្រះចក ខណ្ឌ​ដូនពេញ។

ស្ត្រី​រងគ្រោះ​ ដែល​ប៉ុនប៉ង​សម្លាប់​ខ្លួន​មាន​ឈ្មោះ​ធួន អាយុ​៣០​ឆ្នាំ មុខរបរ​កម្ម​ការិនី​កាត់ដេរ​តាម​ផ្ទះ មានកូន​ស្រី​ម្នាក់ និង​មាន​ប្តី​ឈ្មោះ​ប៊ុន​ណា អ្នក​ទាំងអស់​គ្នា​ស្នាក់នៅ​ផ្ទះជួល​សង្កាត់​ទួល​ទំពូង ខណ្ឌចំការមន​។

ស្ត្រី​រងគ្រោះ​បាន​ឲ្យ​ដឹង​ថា ​ខ្លួន​និង​ប្តី​បានធ្វើការ​ជាមួយ​ថៅកែ​​នោះ​អស់​រយៈពេល​៣​ឆ្នាំ​មកហើយ​។​

តាម​សមត្ថកិច្ច​បាន​ឲ្យដឹង​ថា មុន​ថ្ងៃ​កើត​ហេតុ​ជនរងគ្រោះ​បាន​យក​លុយ​ថៅកែ​ចំនួន​១០​ដុល្លារ​​ យក​ទៅ​គូរ​យ័ន្ត​បន្ទន់ចិត្ត ដើម្បី​ឲ្យ​ថៅកែ​ស្រលាញ់​ចូលចិត្ត​ដំឡើង​ប្រាក់ខែ​ឲ្យ បន្ទាប់ពី​គ្រូ​ធ្វើ​មន្ត​បន្ទន់ចិត្ត​រួចហើយ ជនរងគ្រោះ​បាន​យក​លុយ​ទៅ​ទុក​នៅ​កន្លែង​ដើម​វិញ ក្រោយមក​រឿង​នេះ​ត្រូវ​បែក​ធ្លាយ​ដល់​ថៅកែ ក៏​សួរនាំ​និង​ស្ដីបន្ទោស​យ៉ាងខ្លាំងៗ​។

ក្រោយពី​ថៅកែ​ស្តី​បន្ទោស​រួច ស្ត្រី​រងគ្រោះ​បាន​តូច​ចិត្ត​មិន​ចង់​រស់ ក៏បាន​ហៅ​ម៉ូតូឌុប​ជិះ​ចេញពី​ផ្ទះជួល​របស់​ខ្លួន មក​ស្ពាន​ជ្រោយចង្វារ​ចាស់ លុះ​បាន​ពាក់​កណ្តាល​ស្ពាន​បាន​ឲ្យ​ម៉ូតូឌុប​ឈប់ ចុះ​ពីលើ​ម៉ូតូ​រួច​ឲ្យ​លុយ ហើយ​ស្ត្រី​រូប​នោះ​បាន​ដើរ​សំដៅ​ទៅ​បង្កាន់ដៃស្ពាន ហក់លោត​ចូលក្នុង​ទន្លេ​ដើម្បី​សម្លាប់ខ្លួន តែ​ការ​សម្លាប់​ខ្លួន​នោះ​មិន​ដូច​បំណង​ឡើយ ​ដោយ​លិច​ចូល​ទឹក​ហើយ ថប់ដង្ហើម​ទើប​ធាក់​ឡើងលើ​វិញ ខំ​ប្រឹង​ហែល​រក​ច្រាំង ហើយ​ក៏​ត្រូវបាន​ទូក​នេសាទ​អ៊ីស្លាម​ជួយ​ចេញ​សង្គ្រោះ​ទាន់ពេលវេលា​តែម្តង។

ស្ត្រី​រងគ្រោះ​ត្រូវ​បាន​សមត្ថកិច្ច​​​សួរនាំ​នៅ​ក្រោម​ស្ពាន ក្នុង​គោលដៅ​ទី​៣ ដើម្បី​ស្រាវជ្រាវ​រក​ក្រុម​គ្រួសារ​មក​យក​ទៅ​ផ្ទះ​វិញ៕

  



ប្រសិនបើ លោក លោកស្រីចង់ចែករំលែកនូវព័ត៌មានទាន់ហេតុការណ៍ផ្សេងៗ សូមផ្ញើ អ៊ីម៉ែលមកកាន់អាសយដ្ឋានដូចដែលបានបង្ហាញខាងក្រោម។

សម្រាប់ការផ្សាយពាណិជ្ជកម្មលើគេហទំព័រនេះ សូមទំនាក់ទំនងតាមលេខទូរស័ព្ទៈ 016 877 684