ព័ត៍មានទាន់​ហេតុការណ៏
Search

លើក​ទី​៩ នៃ​ការ​ផ្តល់​ប្រាក់ឧបត្ថម្ភ​សម្រាប់​មាតា​សម្រាលកូន និង គ្រួសារ​ដែល​មាន​សមាជិក​ទទួលអនិច្ចកម្ម នៅ​សង្កាត់​ស្រ​ង៉ែ ក្រុង​សៀមរាប

សៀមរាប ៖ នៅ​សង្កាត់​ស្រ​ង៉ែ ក្រុង​សៀមរាប នាព្រឹក​ថ្ងៃ​ទី​១៩ ខែឧសភា ឆ្នាំ​២០១៧ ប្រជាពលរដ្ឋ ដែល​ជា​មាតា​ទើប​សម្រាក​កូន និង តំណាង​គ្រួសារ​ប្រជាពលរដ្ឋ​ដែល​មាន​សមាជិក​ទទួល​អនិច្ចកម្ម ចំនួន​សរុប ១៤៤​នាក់ ក្នុង​នោះ​មាតា​នៃ​ទារក​ចំនួន ១២៧​នាក់ បាន​ទទួល​នូវ​ការឧបត្ថម្ភ​ជា​ទឹកប្រាក់ ក្នុង​មួយ​គ្រួសារ ២៥ ម៉ឺន​រៀល ពី​សំណាក់​លោក សៀង ណាំ តំណាងរាស្ត្រ​មណ្ឌល​សៀមរាប និង លោកជំទាវ ដែល​ក្នុងនោះ​ក៏មាន​វត្តមាន​សប្បុរស​ជន​ជាច្រើន​នាក់ ផង​ដែរ។

បើ​តាម​សេចក្តី​រាយការណ៍​របស់​លោកស្រី​តំណាង​សាលាសង្កាត់​ស្រ​ង៉ែ ក្រុង​សៀមរាប បាន​បញ្ជាក់ថា នេះ​គឺជា​លើក​ទី​៩​ហើយ ដែល​លោក​សៀង ណាំ និង លោកស្រី បាន​អនុវត្ត​ឲ្យ​មាន​របប​ឧបត្ថម្ភ​សម្រាប់​មេផ្ទះ​កូនខ្ចី​ទើប​សម្រាល និង គ្រួសារ​ប្រជាពលរដ្ឋ ដែលមាន​ទុក្ខ​ដោយ​សមាជិកគ្រួសារ​រប​ស់​ខ្លួន​ទទួលមរណភាព។

លោកស្រី​បញ្ជាក់​ថា នេះ​គឺជា​កាយវិការ​សប្បុរសធម៌​របស់​តំណាងរាស្ត្រ សៀង ណាំ និង លោកស្រី។ ៩​លើក​កន្លងមក​នេះ មាតា​នៃ​ទារក​ចំនួន ៩៥៦នាក់ និង​គ្រួសារ​ដែល​មាន​សមាជិក​ទទួលមរណភាព ចំនួន ១៧៧ គ្រួសារ បានទទួល​របប​ឧបត្ថម្ភ​នេះ។

លោក​សៀង ណាំ តំណាងរាស្ត្រ​មណ្ឌល​សៀមរាប មានប្រសាសន៍ថា ការ​គិត​ឃើញ​អំពី​ការ​ផ្តល់​របប​ឧបត្ថម្ភ​សម្រាប់​ស្ត្រី​ជា​មាតា​ទើប​សម្រាលកូន និង​គ្រួសារ​មានទុក្ខ​ដោយ​សមាជិក​គ្រួសារ​របស់​ខ្លួន​ទទួលមរណភាព ទី​១ គឺ​ផ្តើម​ចេញ​ទឹកចិត្ត​សប្បុរសធម៌ ជួយ​សម្រាល​ទុក្ខ​លំបាក​របស់​ប្រជាពលរដ្ឋ។ ទី​២ ផ្តើម​ចេញ​ពី​ការ​យល់ឃើញថា តំណែង​តំណាងរាស្ត្រ​គឺ​បាន​មក​ពី​ប្រជារាស្ត្រ​ដែល​ជា​ម្ចាស់​សន្លឹកឆ្នោត​ប្រគល់​ជូន ដូច្នេះ​ប្រាក់បៀវត្សរ៍ របស់​លោក​ផ្ទាល់​ក្នុង​តំណែង​ជា​តំណាងរាស្ត្រ គួរតែ​ត្រូវ​បាន​យក​ទៅ​ប្រើប្រាស់ ក្នុង​ប្រយោជន៍​ជួយ​ប្រជារាស្ត្រ​វិញ។

លោក​បញ្ជាក់​ថា ការ​ផ្តល់​របប​ឧបត្ថម្ភ​នេះ គឺ​ចាប់ផ្តើម​ធ្វើឡើង​នៅ​ក្នុង​ឆ្នាំ​២០១៣ គឺ​សម្រាប់​តែ​សង្កាត់​ស្រ​ង៉ែ ក្រុង​សៀមរាប តែមួយ​ប៉ុណ្ណោះ មិនជា​ទូទៅ​នោះ​ទេ ហើយក៏​ពុំ​មែន​ជា​ការ​ផ្តល់ជូន​ប្រចាំឆ្នាំ​នោះដែរ តែ​គឺ​អាស្រ័យ​ទៅ​លើ​ស្ថិតិ​ដែល​ផ្តល់​ឲ្យ​ដោយ​សាលាសង្កាត់ គឺ​កំណត់​តាម​ពេលវេលា​ជាក់ស្តែង នៅពេលណា​ដែលមាន​ចំនួន មាតា​សម្រាលកូន​ចាប់ពី​១០០​នាក់​ឡើងទៅ នឹងត្រូវ​បានធ្វើ​ពិធី​ប្រគល់​ប្រាក់ឧបត្ថម្ភ​បែបនេះ ម្តង។

លោក​បញ្ជាក់​ថា លើក​ទី​៩​នេះ គឺជា​ប្រាក់ឧបត្ថម្ភ​ចូលរួម​ដោយ​សប្បុរសជន។ លោក​ក៏​មាន​ការចាប់អារម្មណ៍​ថា តាមរយៈ​នៃ​ស្ថិតិ​ខាងលើ ឆ្លុះ​បង្ហាញ​ថា សង្កាត់​ស្រ​ង៉ែ នឹង​អាច​មាន​កំណើន​ប្រជាជន​ខ្ពស់ ដោយ​ក្នុង​រយៈពេល​៤​ឆ្នាំ ការ​បង្កើត​មនុស្ស​ចូលក្នុង​បន្ទុកគ្រួសារ​ប្រជាពលរដ្ឋ​មាន​ចំនួន ៩៥៦​នាក់ មនុស្ស​ថ្មី​ទាំងនេះ នឹងត្រូវ​ចូល​សាលារៀន​ជា​បន្តបន្ទាប់៕

 



ប្រសិនបើ លោក លោកស្រីចង់ចែករំលែកនូវព័ត៌មានទាន់ហេតុការណ៍ផ្សេងៗ សូមផ្ញើ អ៊ីម៉ែលមកកាន់អាសយដ្ឋានដូចដែលបានបង្ហាញខាងក្រោម។ សម្រាប់ការផ្សាយពាណិជ្ជកម្មលើគេហទំព័រនេះ សូមទំនាក់ទំនងតាមលេខទូរស័ព្ទៈ 016 877 684