ព័ត៍មានទាន់​ហេតុការណ៏
Search

លោក​សាស្ត្រាចារ្យ​បណ្ឌិត RAMESH GANGADHARAN​ មក​សិក្សា​ស្វែងយល់​ពី​សក្តានុពល​រប​ស់​វិទ្យាស្ថាន​ខុង​ជឺ

ភ្នំពេញ ៖ លោក​សាស្ត្រាចារ្យ​បណ្ឌិត RAMESH GANGADHARAN នាយករង​ផ្នែក​អភិវឌ្ឍ​ពាណិជ្ជកម្ម​របស់​ក្រុមហ៊ុន​បច្ចេកវិទ្យា APTECH របស់​ប្រទេស​ឥណ្ឌា​បាន​មក​សិក្សា​ស្វែងយល់​ពី​សក្តានុពល​រប​ស់​វិទ្យាស្ថាន​ខុង​ជឺ ​នៃ​រាជបណ្ឌិត្យសភាកម្ពុជា​ កា​លពី​ព្រឹក​ថ្ងៃ​ទី​១៩ ​ខែឧសភា​ ឆ្នាំ២០១៧។

នៅ​ក្នុង​ជំនួប​ពិភាក្សា​នោះ លោក​បណ្ឌិត ជា មុនី​ឫទ្ធិ នាយក​វិទ្យាស្ថាន​ខុង​ជឺ​នៃ​រាជបណ្ឌិត្យសភាកម្ពុជា​បាន​ជម្រាប​ជូន​ពី​បេសកកម្ម​ការងារ​សំខាន់​ទាំង​៤​របស់​វិទ្យាស្ថាន ហើយ​ក៏បាន​ពន្យល់​ពីសា​វ​តារ​និង​ដំណើរ​វិវត្តន៍​នៃ​មជ្ឈមណ្ឌល​បណ្តុះបណ្តាល​ព័ត៌មានវិទ្យា​របស់​វិទ្យាស្ថាន។ មជ្ឈមណ្ឌល​ព័ត៌មាន​នេះ​បាននឹងកំពុង​ដើរតួនាទី​សំខាន់​ចំនួន​៤​គឺ ១-​ការ​បំប៉ន​ជំនាញ​កុំព្យូទ័រ​ការិយាល័យ​ជូន​ដល់​សិក្ខាកាម​ភាសា​ចិន ២-​ការសិក្សា​ស្រាវជ្រាវ​នូវ​ឯកសារ​នានា​ជា​ភាសា​ចិន​ក្នុង​បណ្ណាល័យ​អេឡិចត្រូនិក ៣-​ការប្រឡង​សមត្ថភាព​ស្តាប់​ភាសា​ចិន (HSKK) និង​៤-​ការប្រជុំ​និង​ការសិក្សា​ពី​ចម្ងាយ​ជាមួយ​បណ្តា​ដៃគូ​នានា​ទាំង​ក្នុងប្រទេស​កម្ពុជា​និង​ទាំង​ក្នុងប្រទេស​ចិន​។

ដោយ​បាន​យល់​លម្អិត​ពី​សក្តានុពល​របស់​មជ្ឈមណ្ឌល​នេះ លោក​សាស្ត្រាចារ្យ​បណ្ឌិត RAMESH GANGADHARAN បាន​ស្នើ​ដល់​វិទ្យាស្ថាន​ខុង​ជឺ​ពិនិត្យ​លទ្ធភាព​ក្នុង​កិច្ចសហការ​បើក​ថ្នាក់​បណ្តុះបណ្តាល​ជំនាញ​ព័ត៌មានវិទ្យា​ជូន​ដល់​សិក្ខាកាម​ភាសា​ចិន​សម្រាប់​វិស័យ​ពាណិជ្ជកម្ម ធុរកិច្ច បដិសណ្ឋារកិច្ច និង ទេសចរណ៍​។ វគ្គ​សិក្សា​នេះ​ត្រូវ​ចំណាយ​រយៈពេល​២​ឆ្នាំទៅ​៤​ឆ្នាំ ហើយ​ក្រោយ​បញ្ចប់​ការសិក្សា ក្រុមហ៊ុន​នឹង​ផ្តល់​វិញ្ញាបនបត្រ​បញ្ជាក់​ការសិក្សា​ជូន​ដោយមាន​ការទទួលស្គាល់​ដោយ​បណ្តា​ប្រទេស​មួយចំនួនធំ​នៅក្នុង​ពិភពលោក​។

បន្ទាប់ពី​ជំនួប​ពិភាក្សា លោក​សាស្ត្រាចារ្យ​ក៏បាន​អញ្ជើញ​ទស្សនកិច្ច​បណ្ណាល័យ​អេឡិចត្រូនិក មជ្ឈមណ្ឌល​ព័ត៌មានវិទ្យា និង​មជ្ឈមណ្ឌល​កម្ពុជា​-​ឥណ្ឌា សម្រាប់​ការ​បណ្តុះបណ្តាល​ភាសា​អង់គ្លេស​របស់​រាជ​បណ្ឌិត្យ​សភា​កម្ពុជា​ទៀត​ផង​។

គួរ​បញ្ជាក់​ផង​ដែរ​ថា ក្រុមហ៊ុន​បច្ចេកវិទ្យា APTECH មាន​ទីស្នាក់ការ​កណ្តាល​នៅ​ទីក្រុង​Mumbai ប្រទេស​ឥណ្ឌា​។ ក្រុមហ៊ុន​នេះ​បាន​ចាប់​ដំណើរ​តាំងពី​ឆ្នាំ​១៩៨៦​មក ហើយ​ក្លាយ​ជា​ក្រុមហ៊ុន​លំដាប់​ទី​១​ក្នុង​ការ​បណ្តុះបណ្តាល​និង​ផ្តល់​សេវាកម្ម​ផ្នែក​បច្ចេកវិទ្យា​កុំព្យូទ័រ​ចាប់ពី​ឆ្នាំ​១៩៩៣​មក​៕



ប្រសិនបើ លោក លោកស្រីចង់ចែករំលែកនូវព័ត៌មានទាន់ហេតុការណ៍ផ្សេងៗ សូមផ្ញើ អ៊ីម៉ែលមកកាន់អាសយដ្ឋានដូចដែលបានបង្ហាញខាងក្រោម។ សម្រាប់ការផ្សាយពាណិជ្ជកម្មលើគេហទំព័រនេះ សូមទំនាក់ទំនងតាមលេខទូរស័ព្ទៈ 016 877 684