ព័ត៍មានទាន់​ហេតុការណ៏
Search

ស​.​ស​.​ស​.​ក សហការ​ជាមួយ​វិទ្យាស្ថាន​សន្ទនា​មេគង្គ MDI នៃ​សាលា​ហ្សា​មែន ដើម្បី​ជួយ​បណ្តុះបណ្តាល​អ្នកសារព័ត៌មាន​កម្ពុជា​ផ្នែក​ភាសា​អង់គ្លេស

នៅ​រសៀល​ថ្ងៃទី​២៣ ខែឧសភា ឆ្នាំ​២០១៧ សហភាព​សហព័ន្ធ​អ្នកសារព័ត៌មាន​កម្ពុជា (​ស​.​ស​.​ស​.​ក​) និង​វិទ្យាស្ថាន​សន្ទនា​មេគង្គ (Mekong Dialogue Institute) នៃ​សាលា​ហ្សា​មែន Zaman បាន​ចុះ​អនុស្សារណៈ​យោគយល់​គ្នា ដើម្បី​ជួយ​សហការ​បណ្តុះបណ្តាល​ភាសារ​អង់គ្លេស​ដល់​អ្នកសារព័ត៌មាន​កម្ពុជា​ដោយ​មិន​ចំណាយ​ការបង់ថ្លៃ​។

នៅក្នុង​ពិធី​ចុះ​អនុស្សរណៈ ដែល​រៀបចំ​នៅ​ទីស្នាក់ការ ស​.​ស​.​ស​.​ក ក្នុង​រាជធានី​ភ្នំពេញ ប្រធាន ស​.​ស​.​ស​.​ក លោក ហ៊ុយ វណ្ណៈ បាន​ឲ្យ​ដឹង​ថា ការ​ចុះ​អនុស្សរណៈ​ជាមួយ​វិទ្យាស្ថាន​សន្ទនា​មេគង្គ​នៅ​ពេល​នេះ គឺ​ដើម្បី​ផ្តល់​ឱកាស​ដល់​អ្នកសារព័ត៌មាន​កម្ពុជា​បាន​ទទួល​នូវ​ការបណ្តុះបណ្តាល​ផ្នែក​ភាសា​អង់គ្លេស ដោយ​មិន​ចំ​បាច់​បង់ថ្លៃ​។

លោក​ហ៊ុយ វណ្ណៈ បាន​សង្កត់​ធ្ងន់​ថា អ្នកសារព័ត៌មាន​គឺ​រៀន​សូត្រ​គ្មាន​ពេល​បញ្ចប់​ទេ ពិសេស​គួរ​បណ្តុះបណ្តាល​បន្ថែម​នូវ​ភាសា​អង់គ្លេស ដើម្បី​អាច​ឲ្យ​ពួកគេ​មើល​ឃើញ​ពិភពលោក​កាន់តែ​ទូលាយ យល់​ខួរក្បាល​បរទេស ចេះ​ធ្វើការ​ជាមួយ​បរទេស និង​អាច​ធ្វើការ​ជាមួយ​បរទេស​ដោយ​ស្មើ​សិទ្ធិ​។

លោក​បញ្ជាក់​ថា កម្មវិធី​នេះ នឹង​អនុវត្ត​ក្នុង​ពេល​ឆាប់ៗ​នេះ ហើយ​រៀបចំ​បង្វឹក​តាម​អ្នកចេះ​តិច ចេះ​ច្រើន ទៅតាម​លំដាប់លំដោយ។

លោក Hakan Atasever នាយក​ប្រតិបត្តិ​វិទ្យាស្ថាន​សន្ទនា​មេគង្គ (MDI) មានប្រសាសន៍ ហេតុផល​ដែល​វិទ្យាស្ថាន​សន្ទនា​មេគង្គ ចុះ​អនុស្សរណៈ​យោគ​យោល់ ដោយសារតែ​វិទ្យាស្ថាន​មើលឃើញ ស​.​ស​.​ស​.​ក ជា​ស្ថាប័ន​ផ្លូវការ​ទទួលស្គាល់​ដោយ​រាជរដ្ឋាភិបាល​កម្ពុជា និង​ជា​ស្ថាប័ន​មាន​សក្តានុពល​។ លោក​បញ្ជាក់​ថា វិទ្យាស្ថាន MDI ប្តេជ្ញា​ជួយ​គាំទ្រ ស​.​ស​.​ស​.​ក ឲ្យ​បានយូរ​អង្វែង ដោយ​មិន​កំណត់​ចំនួន​នោះទេ។

សូមបញ្ជាក់ថា កន្លងមក សហភាព​សហព័ន្ធ​អ្នកសារព័ត៌មាន​កម្ពុជា ស​.​ស​.​ស​.​ក បាន​ជួយ​បណ្តុះបណ្តាល​បន្ថែម​អ្នកសារព័ត៌មាន​កម្ពុជា​ជាច្រើន​វគ្គ​ទៅលើ​វិ​ស្ស័​យ​សារព័ត៌មាន ហើយ​នៅពេលនេះ និង​ពេលខាងមុខ ស​.​ស​.​ស​.​ក នៅតែ​ប្រឹងប្រែង​កៀរគរ​រក​ដៃគូ​ជាតិ និង​អន្តរជាតិ ដើម្បី​ជួយ​បណ្តុះបណ្តាល​ពង្រឹង​អ្នកសារព័ត៌មាន​ឲ្យ​បាន​ច្រើន​ថែមទៀត៕

 



ប្រសិនបើ លោក លោកស្រីចង់ចែករំលែកនូវព័ត៌មានទាន់ហេតុការណ៍ផ្សេងៗ សូមផ្ញើ អ៊ីម៉ែលមកកាន់អាសយដ្ឋានដូចដែលបានបង្ហាញខាងក្រោម។ សម្រាប់ការផ្សាយពាណិជ្ជកម្មលើគេហទំព័រនេះ សូមទំនាក់ទំនងតាមលេខទូរស័ព្ទៈ 012 454 575 និង 012 499 114