ឆ្នាំ២០២៣ នៅខេត្តកំពង់ចាមមានអ្នកស្លាប់ក្នុងគ្រោះថ្នាក់ចរាចរណ៍សរុបចំនួន ១១២នាក់

រយៈពេលពេញមួយឆ្នាំ២០២៣ ករណីគ្រោះថ្នាក់ចរាចរណ៍នៅក្នុងខេត្តកំពង់ចាមបានកើតឡើងចំនួន១៦៦លើក បើធៀបទៅនឹងឆ្នាំ២០២២ មានកើនឡើងចំនួន៥លើក ខណៈគ្រោះថ្នាក់ចរាចរណ៍នេះ កើតឡើងច្រើនជាងគេនៅលើផ្លូវក្នុងស្រុកចំនួន៣ នៃភូមិសាស្ត្រខេត្តកំពង់ចាម។

បើតាមការបញ្ជាក់ពីលោកឧត្តមសេនីយ៍ត្រី សោម រស់ ស្នងការរង ទទួលផ្នែកសណ្ឋាប់ធ្នាប់ និងចរាចរណ៍ នៃស្នងការ​ដ្ឋាននគរបាលខេត្តកំពង់ចាម គឺក្រោយពីបានបូកសរុបការងារប្រចាំឆ្នាំ២០២៣ ក្នុងរយៈពេល១២ខែកន្លងទៅ អត្រាគ្រោះថ្នាក់ចរាចរណ៍តាមដងផ្លូវមានការកើនឡើងរហូតដល់១៦៦លើក ដែលបណ្តាលឱ្យមានអ្នកបាត់បង់អាយុជីវិតចំនួន១១២ នាក់ និងរងរបួសធ្ងន់ស្រាលចំនួន២៤០នាក់។

លោកឧត្តមសេនីយ៍ត្រី បានឱ្យដឹងទៀតថា ការកើនឡើងនៃគ្រោះថ្នាក់ចរាចរណ៍នេះ ភាគច្រើនកើតមានឡើងនៅលើផ្លូវជាតិសំខាន់ៗ​​ដូចជា៖ នៅស្រុកបាធាយ ស្រុកស្ទឹងត្រង់ និងស្រុកកងមាស ហើយភាគច្រើនបង្កឡើងដោយអ្នកប្រើប្រាស់ផ្លូវ គឺជាយុវវ័យ ដោយមានការធ្វេសប្រហេសក្នុងការបើកបរ មិនគោរពច្បាប់ចរាចរណ៍ និងពលរដ្ឋមួយចំនួនមានការកែច្នៃយានយន្ត និងម៉ូតូខុសបច្ចេកទេស ដូចជា គ្មានភ្លើងបំភ្លឺគ្រប់គ្រាន់។ 

លោកឧត្តមសេនីយ៍ត្រី សោម រស់ ស្នងការរង ទទួលផ្នែកសណ្ឋាប់ធ្នាប់ និងចរាចរណ៍ នៃស្នងការដ្ឋាននគរបាលខេត្តកំពង់ចាម បានអំពាវនាវដល់គ្រប់អង្គភាពស្ថាប័ន គ្រឹះស្ថានសិក្សា សហគមន៍ ចូលរួមផ្សព្វផ្សាយស្តីពីការអប់រំច្បាប់ និងគោរពច្បាប់ចរាចរណ៍ផ្លូវគោកឱ្យបានគ្រប់ៗគ្នា និងស្នើសុំគ្រប់ស្ថាប័ន រោងចក្រ សហគ្រាស និងសហគមន៍ ពង្រឹងការប្រើប្រាស់យានយន្តកែច្នៃ ម៉ូតូខ្វះភ្លើង សញ្ញា ចូលរួមកែលម្អ និងជំរុញការប្រើប្រាស់ឱ្យបានត្រឹមត្រូវតាមបទដ្ឋានបច្ចេកទេស៕

អត្ថបទ និង រូបភាព ៖ ឡេក  ចាន់ពេជ្រ