កីឡា

លទ្ធផលសម្រេច រិន ដេវិត ជាអ្នកឈ្នះ ធន់ អៀឡៃ តែអត់បានខ្សែក្រវាត់

បានផុស

១ ខែ មុន

នៅ

ថ្ងៃអង្គារ ១៣ កុម្ភៈ ២០២៤

ដោយ

លទ្ធផលការប្រកួតរវាងកីឡាករ រិន ដេវិត ត្រូវបានសម្រេចឲ្យឈ្នះកីឡាករ ធន់ អៀឡៃ បន្ទាប់ពីមានការតវ៉ា និងផ្ទុះការរិះគន់ខ្លាំងក្នុងការប្រកួតដណ្តើមខ្សែក្រវាត់កាលពីថ្ងៃព្រហស្បតិ៍ ទី៨ ខែកុម្ភៈ ឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រោយមានការប្តឹងតវ៉ាពីភាគី រិន ដេវិត ដោយមានឧកញ៉ា ស្រី ចាន់ថន និងលោក ខូវ ឆាយ អនុប្រធានសហព័ន្ធកីឡាប្រដាល់គុនខ្មែរជាអ្នកឈរនៅកណ្តាលដើម្បីស្វែងការពិតសម្រាប់អ្នកឈ្នះ អ្នកចាញ់ និងមានការប្រជុំពិនិត្យជាច្រើនលើក លទ្ធផលបានសម្រេចដូចខាងក្រោម៖

រិន ដេវិត ឈ្នះទឹកទី១ និងទឹកទី២ ខណៈ ធន់ អៀឡៃ ឈ្នះទឹកទី៣ ដូច្នេះ រិន ដេវិត ជាអ្នកឈ្នះដោយពិន្ទុ
ខ្សែក្រវាត់ត្រូវដកហូតពី ធន់ អៀឡៃ និងរក្សាទុកសម្រាប់ការប្រកួតម្តងទៀត
កីឡាករទាំង២រូបទទួលបានប្រាក់ម្នាក់ៗ៤ពាន់ដុល្លារដូចគ្នា
ការប្រកួតលើកក្រោយនឹងប្រើពេល៥ទឹក និងមានចៅក្រមល្អ ដាច់ស្រឡះ
ចៅក្រម៣រូបដែលផ្តល់ពិន្ទុឲ្យ ធន់ អៀឡៃ ឈ្នះនឹងត្រូវទទួលពិន័យ
ការប្រកួតដណ្តើមខ្សែក្រវាត់លើកក្រោយមានប្រាក់រង្វាន់ថ្មី

ដូច្នេះ រិន ដេវិត ជាអ្នកឈ្នះ ធន់ អៀឡៃ ប៉ុន្តែខ្សែក្រវាត់មិនបានទេដោយទទួលបានត្រឹមប្រាក់រង្វាន់ស្មើគ្នាប៉ុណ្ណោះ។

សូមរម្លឹកថា ការតស៊ូគ្នា៣ទឹកនៅលើសង្វៀនកាលពីថ្ងៃទី៨ ខែកុម្ភៈ ចៅក្រម៣រូបគឺលោក ណុប វ៉ាន់ថេត, កែវ ពៅ និងលោក ប៉ាន់ ស៊ីថៃ ផ្តល់ពិន្ទុ ៥៩-៥៨ ដូចគ្នាឲ្យ ធន់ អៀឡៃ ខណៈចៅក្រម២រូបគឺលោក បឹត សំខាន់ និង ឌៀន វិបុល ផ្តល់ពិន្ទុ ៥៩-៥៨ ដូចគ្នាឲ្យ រិន ដេវិត។

ក្រោយប្រកាសលទ្ធផល មានការតវ៉ា និងផ្ទុះការរិះគន់យ៉ាងខ្លាំងដោយបានលើកឡើងថា អយុត្តិធម៌សម្រាប់ រិន ដេវិត ដែលមានប្រៀប២ទឹកដំបូង ប៉ុន្តែបែរជាត្រូវឲ្យចាញ់ ហើយ ធន់ អៀឡៃ មានប្រៀបទឹកទី៣។ ការិះគន់រឿងនេះបានកើតឡើងប៉ុន្មានថ្ងៃ បន្ទាប់ពីលទ្ធផលការប្រកួតរវាង ធន់ រិទ្ធី និង សៃយុគ កាលពីយប់ថ្ងៃអាទិត្យ ទី៤ ខែកុម្ភៈ ឆ្នាំ២០២៤៕