ព័ត៍មានទាន់​ហេតុការណ៏
Search

អ៊ីរ៉ង់​ដាក់ពន្ធនាគារ​និស្សិត​អាមេរិក​មាន​សញ្ជាតិ​ពីរ​រ យៈពេល​ ១០​ឆ្នាំ​ពីបទ​ចារកម្ម​

​អ្នកនាំពាក្យ​របស់​តុលាការ​អ៊ីរ៉ង់​បាន​ឲ្យ​ដឹង​កាលពី​ថ្ងៃអាទិត្យ​ថា តុលាការ​អ៊ីរ៉ង់​បាន​កាត់ទោស​និស្សិត​បញ្ចប់​ការសិក្សា​ពី​សាកលវិទ្យាល័យ Princeton ម្នាក់​ឲ្យ​ជាប់ពន្ធនាគារ​រយៈពេល ​១០​ឆ្នាំ​លើ​បទ​ចារកម្ម​ដែល​នេះ​ជា​ករណី​ចុងក្រោយ​បំផុត​ពាក់ព័ន្ធ​នឹង​មនុស្ស​សញ្ជាតិ​ពីរ ​ដែល​ត្រូវ​ជាប់ឃុំ​លើ​បទចោទប្រកាន់​សន្តិសុខ​នៅក្នុង​ប្រទេស​នេះ​។​

Mizan ដែលជា​គេហទំព័រ​ផ្លូវការ​របស់​តុលាការ​អ៊ីរ៉ង់​បាន​ចុះផ្សាយ​ថា លោក Xiyue Wang អាយុ ៣៧​ឆ្នាំ​ត្រូវបាន​គេ​ចោទប្រកាន់​ពីបទ​ធ្វើ​ចារកម្ម​ក្រោមលេស​ការស្រាវជ្រាវ​។ លោក Wang បានកើត​នៅក្នុង​ប្រទេស​ចិន ​ប៉ុន្តែ​ត្រូវបាន​គេ​ចាត់ទុកថា​ជា​ពលរដ្ឋ​អាមេរិក​។​

អ្នកនាំពាក្យ Gholamhossein Mohseni Ejei បាន​និយាយ​លើ​កញ្ចក់​ទូរទស្សន៍​រដ្ឋ​ថា “​បុគ្គល​ម្នាក់នេះ​ដែល​កំពុង​ប្រមូល​ព័ត៌មាន​ហើយ​ត្រូវបាន​ដឹកនាំ​ដោយ​អាមេរិក​ដោយផ្ទាល់​គឺ​ត្រូវបាន​កាត់ទោស​ឲ្យ​ជាប់ពន្ធនាគារ​រយៈពេល ​១០​ឆ្នាំ ​ប៉ុន្តែ​ការកាត់ទោស​នេះ​អាច​ត្រូវបាន​ប្តឹង​ឧទ្ធរណ៍​”​។​

ទន្ទឹម​នោះ ក្រសួងការបរទេស​អា​មេ​រិ​កបាន​ចោទប្រកាន់​ប្រទេស​អ៊ីរ៉ង់​ពីបទ​ប្រឌិត​ការចោទប្រកាន់​ទាក់ទង​នឹង​សន្តិសុខ​ជាតិ​ដើម្បី​ឃុំឃាំង​ជនជាតិ​អាមេរិក​និង​ជនបរទេស​ផ្សេងទៀត​។​

មន្ត្រី​ក្រសួងការបរទេស​ម្នាក់​បាន​និយាយថា “​យើង​សូម​អំពាវនាវ​ឲ្យ​ដោះលែង​ជាបន្ទាន់​នៃ​ប្រជាពលរដ្ឋ​អាមេរិក​ទាំងអស់​ដែល​ជាប់ឃុំ​ដោយ​អយុត្តិធម៌​នៅក្នុង​ប្រទេស​អ៊ីរ៉ង់​ ដើម្បី​ឲ្យ​ពួកគេ​អាច​វិលត្រឡប់​ទៅ​ក្រុមគ្រួសារ​វិញ​។ ប្រជាពលរដ្ឋ​អាមេរិក​ទាំងអស់​ជាពិសេស​អ្នកមាន​សញ្ជាតិ​ពីរ​ដែល​ពិចារណា​ធ្វើដំណើរ​ទៅ​ប្រទេស​អ៊ីរ៉ង់ ​គួរតែ​អាន​ការព្រមាន​អំពី​ការធ្វើដំណើរ​ថ្មី​របស់​យើង​ដោយ​ប្រុងប្រយ័ត្ន​ជាមុនសិន​”​។​

លោក Wang ក៏​សកម្ម​ផងដែរ​នៅ​មជ្ឈមណ្ឌល Sharmin និង Bijan Mossavar-Rahmani សម្រាប់​ការសិក្សា​អំពី​ប្រទេស​អ៊ីរ៉ង់ ​និង​តំបន់​ឈូង​សមុទ្រ​ពែ​ក​របស់​សាកលវិទ្យាល័យ Princeton ដែល​គេហទំព័រ Mizan និយាយថា មាន​ទំនាក់ទំនង​ជាមួយ​ភ្នាក់ងារ​ស៊ើបការណ៍​លោកខាងលិច​ និង​អ៊ីស្រាអែល​។​

Mizan បាន​និយាយថា លោក Wang ត្រូវបាន​ចាប់ខ្លួន​កាលពី​ខែកក្កដា ​ឆ្នាំ​២០១៦​ នៅពេលដែល​គាត់​កំពុង​ព្យាយាម​ចាកចេញ​ពី​ប្រទេស​អ៊ីរ៉ង់ ​បន្ទាប់ពី​គាត់​មានការ​ភិតភ័យ​អំពី​ស្ថានភាព​របស់គាត់​៕ REUTERS



ប្រសិនបើ លោក លោកស្រីចង់ចែករំលែកនូវព័ត៌មានទាន់ហេតុការណ៍ផ្សេងៗ សូមផ្ញើ អ៊ីម៉ែលមកកាន់អាសយដ្ឋានដូចដែលបានបង្ហាញខាងក្រោម។ សម្រាប់ការផ្សាយពាណិជ្ជកម្មលើគេហទំព័រនេះ សូមទំនាក់ទំនងតាមលេខទូរស័ព្ទៈ 016 877 684