ព័ត៍មានទាន់​ហេតុការណ៏
Search

ថៃ​បង្ក្រាប​គ្រឿងញៀន ​បាញ់សម្លាប់​មុខសញ្ញា​២​នាក់ និង​រឹបអូស​ថ្នាំជាង​៦​សែន​គ្រាប់

​ប្រទេស​ថៃ ៖ ថ្នាំញៀន​ប្រមាណ​ជាង ៦សែន​គ្រាប់ ត្រូវបាន​រឹបអូស និងជនសង្ស័យ​ចំនួន​ពីរ​នាក់ត្រូវបាន​បាញ់សម្លាប់ ខណៈដែល​កម្លាំង​សមត្ថកិច្ច​ជំនាញ​ថៃ កំពុង​បើក​កិច្ចប្រតិបត្តិការទៅលើ​មុខសញ្ញាក្នុងខេត្ត​ចំនួន​ពីរ គឺខេត្ត​ឆៈ​ឈើ​ង​សៅ និង​ខេត្តសមុទ្រ​ប្រា​កាន ហើយ​មាន​ការបាញ់តបត​ពីមុខ​សញ្ញា​ទាំងនោះ​ផង។​

​កិច្ចប្រតិបត្តិការ​លើក​ទី​១ បាន​ប្រព្រឹត្តឡើងកាលពី​ល្ងាច​ថ្ងៃទី១៥ ខែកក្កដា ឆ្នាំ​២០១៧ ត្រង់ចំណុច​លំនៅដ្ឋាន​មួយកន្លែង ដែល​សមត្ថកិច្ច​សង្ស័យ​ថាជា​កន្លែង​ស្នាក់នៅ​របស់​មុខសញ្ញា​ សម្រាប់​ធ្វើការ​ចែកចាយ​ថ្នាំញៀន​ដ៏​ធំ​មួយ ស្ថិតនៅ​ក្នុងភូមិ​ឧសភា​២៧ ឃុំ​ខ្លង​ឧ​ត្ត​ម​ឆុន​ច​ន ស្រុក​មឿង ខេត្ត​ឆៈ​ឈើ​ងសៅ ប្រទេស​ថៃ។ នៅក្នុង​កិច្ចប្រតិបត្តិការ​នោះដែរ​ សមត្ថកិច្ច​បានឡោមព័ទ្ធ ព្រមទាំង​បាន​ចាប់ខ្លួន​មុខសញ្ញា​ចំនួន​៦​នាក់ (ប្រុស​៣​នាក់ និងស្រី​៣​នាក់) ព្រមទាំង​បាន​រឹបអូស​សាក់​កាដូ​ចំនួន​៤ ដែល​ក្នុងនោះ​មានថ្នាំញៀន​ប្រភេទ​យ៉ាម៉ា សរុប​ចំនួន ៦១០ ០០០គ្រាប់ ដែល​មុខសញ្ញាបានរៀបចំ​សម្រាប់​បញ្ជូនទៅឱ្យ​ម៉ូយ​របស់គេ។​

​ភ្លាមៗ​នោះដែរ ខណៈដែល​កម្លាំង​ជំនាញ​កំពុងបើក​យុទ្ធនាការ ស្រាប់តែមុខសញ្ញា​មួយទៀត ដែលជា​អតិថិជន​ទិញ​ថ្នាំញៀន​របស់គេបានទូរស័ព្ទ​ទាក់ទង​មក​ល្មម ទើប​សមត្ថកិច្ច​ព្យាយាម​ឱ្យ​មុខសញ្ញានិយាយ​ណាត់​ទីតាំងដើម្បី​ប្រគល់​ថ្នាំញៀន នៅ​ទីបំផុតជនសង្ស័យ​មួយក្រុម​ទៀត បាន​កុម្ម៉ង់​ទិញ​ថ្នាំញៀន​ចំនួន៤០ ០០០គ្រាប់ ដោយបាន​កំណត់​ទីតាំង​ គឺ​នៅត្រង់ចំណុច​ក្បែ​របង្គោល​ប៉ាយបង្ហាញផ្លូវ​មួយកន្លែង ក្នុងភូមិ​ឆៃ​យ៉ា​នុ​សិត​ ឃុំ​ប្រែង ស្រុក​បាង​បរ ខេត្ត​សមុទ្រ​ប្រា​កាន ជិត​វត្ត​កាឡុង(កន្លែងចាស់ )។​

​នៅក្នុង​កិច្ចប្រតិបត្តិការ​ជំហាន​២ គឺ​កម្លាំង​សមត្ថកិច្ច​ស៊ីវិល​បានដាក់ពង្រាយ​ត្រៀម​សរុប​ចំនួន​២០​នាក់ និង​រថយន្ត​៧​គ្រឿង ដោយការរង់ចាំ​នេះ​បានអូសបន្លាយ​ពេល​រហូតដល់​ម៉ោង​១០យប់ថ្ងៃដដែល ទើប​គេ​ស​ង្កេត​ឃើញ​មុខសញ្ញា​បង្ហាញខ្លួន​ ដោយ​ពួកគេមាន​គ្នា​ពីរ​នាក់ បាន​បើករថយន្ត​ម៉ាកម៉ា​ស្តា ពណ៌​ក្រហម ពាក់​ស្លាកលេខ​ បាងកក ២៩០៣ មក​ឈប់​ក្បែ​របង្គោល​ប៉ាយ ដោយមាន​បុរសម្នាក់​ដែល​អង្គុយ​ក្បែ​រអ្នកបើកបរ ចុះទៅ​ទាញយក​សាក់​កាដូថ្នាំញៀន រួច​ចូលទៅក្នុង​រថយន្ត​វិញបម្រុង​បើក​ចេញទៅ ប៉ុន្តែ​ដោយ​ឃើញ​កម្លាំងចេញ​ស្ទា​ក់នៅ​ពីមុខ ទើប​ពួកគេ​បាន​បើក​រថយន្ត​បំបុក​កម្លាំង​តែម្តង។​

​ដោយសារតែ​ភាព​តានតឹង​បានកើត​ឡើង​ ភ្លាមៗ​នោះដែរ​រថយន្ត​សមត្ថកិច្ចចំនួន​ពីរ​គ្រឿង​ បាន​បើក​មក​បិទ​ពីមុខ និង​ពីក្រោយរថយន្តក្រុមមុខសញ្ញាគ្រឿងញៀន ពេលនោះ​ជនសង្ស័យ​ទាំងពីរបាន​បើកទ្វារ​រថយន្ត​ចុះ​ ដោយ​បាញ់​ទៅលើ​សមត្ថកិច្ច​ដើម្បី​បើកផ្លូវ។ ផ្ទុយទៅវិញ​កម្លាំង​សមត្ថកិច្ចបាន​បាញ់​ផ្តួល​ជនសង្ស័យ​ទាំងពីរ​នាក់ឱ្យ​ដេក​ក្នុង​ថ្លុកឈាម​តែម្តង។​

​នៅពេល​នោះដែរ ក៏មាន​មន្ត្រី​អយ្យការ ក្រុមគ្រូពេទ្យ និង​កម្លាំងកោសល្យវិច័យ​ខេត្ត​សមុទ្រ​ប្រា​កាន ចុះទៅ​ត្រួតពិនិត្យ​រួមគ្នា​ផងដែរ គឺ​ស​ង្កេ​ត​ឃើញថា ថ្នាំញៀន៤​ម៉ឺន​គ្រាប់ត្រូវបាន​ដកហូត​មកវិញ ឯ​សពជនសង្ស័យ​ម្នាក់​ដែលជា​អ្នកបើកបរ​ ត្រូវបានគេ​ស្គាល់ឈ្មោះ ជេ​ត ចាន់​សាក់ ភេទ​ប្រុស អាយុ​៤៦​ឆ្នាំ ប្រើប្រាស់​កាំភ្លើង​ខ្លី​ខ្នាត​២២ មិល្លីម៉ែត្រ ដោយមាន​ការបាញ់​តបត​មកលើ​សមត្ថកិច្ច​អស់​ចំនួន​៣​គ្រាប់ និង​ម្នាក់ទៀតមានឈ្មោះ ក្សេម វង់​ចំរើន ភេទ​ប្រុស អាយុ​២៦​ឆ្នាំ ប្រើប្រាស់​កាំភ្លើង​ខ្លី​ខ្នាត ៩​មីល្លីម៉ែត្រ បាញ់​អស់​១​គ្រាប់។​ ក្រោយពេល​កើតហេតុ វត្ថុតាង​ទាំងអស់​ត្រូវបាន​ប្រគល់​ទៅ​ឱ្យ​កម្លាំង​ជំនាញ​នៅ​ខេត្ត​ឆៈ​ឈើ​ង​សៅ វិញ ដើម្បី​ធ្វើការ​ស្រាវជ្រាវ​បន្ត៕



ប្រសិនបើ លោក លោកស្រីចង់ចែករំលែកនូវព័ត៌មានទាន់ហេតុការណ៍ផ្សេងៗ សូមផ្ញើ អ៊ីម៉ែលមកកាន់អាសយដ្ឋានដូចដែលបានបង្ហាញខាងក្រោម។ សម្រាប់ការផ្សាយពាណិជ្ជកម្មលើគេហទំព័រនេះ សូមទំនាក់ទំនងតាមលេខទូរស័ព្ទៈ 016 877 684