ព័ត៍មានទាន់​ហេតុការណ៏
Search

ក្រុមហ៊ុន ថូ ម៉ាក់ ចុះ​ចែក​អំណោយ​ដល់​ពលរដ្ឋ​ក្រីក្រ​ចំនួន​៦០ គ្រួសារ ក្នុង​ក្រុងប៉ៃលិន

ប៉ៃលិន​ ៖ នៅព្រឹក​ថ្ងៃទី​១៧ ខែកក្កដា ឆ្នាំ​២០១៧ នៅ​គេហដ្ឋាន​លោក ថូ ចំរើន និង​លោកស្រី ឡោ ហ៊ុយ​ជូ មាន​រៀបចំ​ពិធី​ចែក​អំណោយ​មនុស្សធម៌ ដល់ពលរដ្ឋ​ក្រីក្រ​ចំនួន ​៦០គ្រួសារ ដែល​រស់នៅក្នុង​ក្រុងប៉ៃលិន ដើម្បី​ឧទ្ទិស​កុសល​ជូន​ដល់​លោកតា ឡោ ឡេង និង​លោកយាយ ចេង បូ ក្នុងពិធីបុណ្យ​គម្រប់​ខួប​៣​ឆ្នាំ នា​ភូមិបរ​ឌិន​នៀវ សង្កាត់​ប៉ៃលិន ក្រុងប៉ៃលិន ខេត្ត​ប៉ៃលិន។ ពិធី​នេះដែរ​ស្ថិតក្រោម​ការអញ្ជើញ​ចូលរួម​ពី​លោកស្រី សោ មុន្នី​រ័​ត អភិបាលរង​ខេត្ត​ប៉ៃលិន, លោក ថូ ចំរើន និង​លោកស្រី ឡោ ហ៊ុយ​ជូ តំណាង​ក្រុមហ៊ុន​ទឹកស្អាត ​ថូ ម៉ាក់ ព្រមទាំង​មានការ​ចូលរួម​ពី​លោក លោកស្រី​តំណាង​មន្ទីរ​ស្ថាប័ន​ជុំវិញ​ខេត្ត បង​ប្អូន​ប្រជាពលរដ្ឋយ៉ាងច្រើន​កុះករ។

​លោក ថូ ម៉ាក់ ប្រធាន​ក្រុមហ៊ុន ​ថូ ម៉ាក់ មានប្រសាសន៍ថា​ កម្ពុជា​ក្រោមការដឹកនាំ​របស់​សម្តេច​តេ​ជោ ហ៊ុនសែន តែងតែ​គិតគូរ​ពី​សុខទុក្ខបងប្អូន​ប្រជាពលរដ្ឋ​នៅ​ទូទាំងប្រទេស ព្រមទាំង​បាន​ជំរុញ​ដល់មន្ត្រី​គណបក្ស​គ្រប់​ថ្នាក់ ចុះសាកសួរ​សុខទុក្ខ​ប្រជាពលរដ្ឋ​នៅតាមមូលដ្ឋាន​ជាប្រចាំ ជាមួយនឹង​ការនាំយក​អំណោយ​ជួយឧបត្ថម្ភ​ដល់ប្រជាពលរដ្ឋ​ណា ដែល​ក្រីក្រ​មាន​ជីវភាព​ខ្វះខាត​ជា​បន្តបន្ទាប់។ ជាក់ស្តែង​ពេលនេះ ក្នុងនាម​លោក​តំណាង​ឲ្យ​គណបក្ស​ប្រជាជន​កម្ពុជាខេត្ត​ប៉ៃលិន គ្រាន់តែ​ទទួល​ដំណឹង​ពី​អាជ្ញាធរ​មូលដ្ឋាន​ថា មានបងប្អូន​៦០​គ្រួសារ កំពុង​ជួប​ការលំបាក​ខ្វះខាត​ស្បៀង លោក​ក៏​ចូលរួមគ្នា​ជាមួយ​កូនចៅ ទិញ​នូវ​ស្បៀងអាហារយកមកចែក​ជូន​បង​ប្អូនភ្លាម បើទោះបី​អំណោយ​ស្បៀង​ទាំងនេះវា​មិនអាច​ដោះស្រាយ​ក្នុងជីវភាព​បានយូរ​ក្តី តែ​អាច​ដោះស្រាយបាន​មួយ​រយៈ​ធំ ដើម្បី​ផ្តល់ឱកាសបងប្អូន​មាន​ពេលវេលា បង្កបង្កើនផល​ដាំ​ដំណាំ​ផ្សេងៗ​លក់ដូរចិញ្ចឹមជីវិត​បន្តទៀត។

លោក​បន្តថា​ ការចែក​អំណោយ​ដល់​បង​ប្អូនប្រជាពលរដ្ឋ​នាពេលនេះ គឺ​ដើម្បី​ឧ​ទ្ទិស​បុណ្យ​កុសល​ជូន​ដល់​លោកតា ឡោ ឡេង និង​លោកយាយ ចេង បូ ដែល​ត្រូវជា​ដន្លង​លោក ក្នុង​ពិធីបុណ្យគម្រប់​ខួប​៣​ឆ្នាំ​ផងដែរ។

​លោកស្រី សោ មុន្នី​រ័ត្ន អភិបាលរង​ខេត្ត​ប៉ៃលិន បាន​ថ្លែងអំណរគុណ​ដល់ក្រុមហ៊ុន ថូ ម៉ាក់ ដែល​តែងតែ​ចូលរួមចំណែក​ជាមួយ​រាជរដ្ឋាភិបាល ក៏ដូចជា​អាជ្ញាធរខេត្ត​ប៉ៃលិន ក្នុង​ដោះស្រាយ​ជីវភាព​ប្រជាពលរដ្ឋ ដែល​ជួបការខ្វះខាត​ស្បៀងអាហារ​សម្រាប់​បរិភោគជាប្រចាំ។ ជាក់ស្តែង​នៅ​ព្រឹក​នេះដែរ​ ពលរដ្ឋ​ដែល​រស់នៅក្នុង​ក្រុងប៉ៃលិន ក៏បានទទួល​អំណោយសប្បុរសធម៌​ពី​ក្រុមហ៊ុន​ ថូ ម៉ាក់ ផ្គត់ផ្គង់​ទឹក​ស្អា​តខេត្ត​ប៉ៃលិនផងដែរ​។ លោកស្រីអភិបាលរង​ខេត្ត ក៏បាន​ផ្តាំផ្ញើ​ដល់​បងប្អូន​ដែល​ចូលរួម​ទទួល​អំណោយ​នាពេលនេះ ត្រូវខិតខំ​បង្កបង្កើនផល​ដាំ​ដំណាំ​គ្រប់ប្រភេទ ដើម្បី​ដោះស្រាយ​ជីវភាព​របស់​បងប្អូន​ឲ្យ​កាន់តែ​ប្រសើ​ឡើង​។

លោកស្រី​បាន​បន្តថា​ មានតែ​គណបក្ស​ប្រជាជន​កម្ពុជា​ទេ ដែល​ស្គាល់​សុខ​ស្គាល់​ទុក និង​រួម​រស់នៅ​ជាមួយ​ប្រជាពលរដ្ឋ​គ្រប់​មូលដ្ឋាន ។ ពេលណា​បងប្អូន​ជួប​ការលំបាក ពេលនោះ​គឺ​បាន​មន្ត្រី​គណបក្ស​ប្រជាជន ជួយដោះស្រាយ​គ្រប់ពេល​។ ដូចនេះ បងប្អូន​មិនត្រូវ​ចាញ់បោក​ការឃោសនា​របស់​ពួក​អគតិ ដើរ​ញុះញង់​បំបែកបំបាក់​ជាតិ​នោះឡើយ​។

ជាមួយគ្នានេះដែរ ហេ​ដ្ឋា​រចនាសម្ព័ន​ជាតិ​ជាច្រើន ​ត្រូវបាន​កសាងឡើងគ្រប់​ទីកន្លែង​ ដូចជា​ផ្លូវថ្នល់ ស្ពាន មន្ទីរពេទ្យ មណ្ឌល​សុខភាព សាលារៀន ប្រឡាយទឹក​ខ្វាត់ខ្វែង។ ប្រទេសជាតិ​មាន​សុខសន្ដិភាព ស្ថេរភាព​នយោបាយ សេ្ថ​រ​ភាព​សេដ្ឋកិច្ច និង​ឯកភាព​ជាតិ​ពេញ​ផ្ទៃ​ប្រទេស។ ប្រជាជន​គ្រប់រូប​បាន និង​កំពុង​ទទួល​នូវ​ផ្លែផ្កា​ដ៏​ត្រចះត្រចង់​នៃសន្ដិភាព​ដ៏​ពេញ​បរិបូរ​ណ៌ ទាំងនេះ​កើតចេញពី​ការដឹកនាំ​ដ៏​ត្រឹមត្រូវ​របស់​សម្ដេច​តេ​ជោ ហ៊ុន សែន ដូច្នោះ​មិនត្រូវ​ឲ្យ​ពួក​អគតិ​មក​បំផ្លាញ​ជាតិ​យើង​ជាដាច់ខាត។

​ស្បៀងអាហារ​ដែល​ចែកជូន​បងប្អូន​ទាំង​០៦​គ្រួសារ ក្នុង​១​គ្រួសារទទួលបាន​អង្ករ​២៥គីឡូក្រាម ទឹកត្រី​១​យួរ ទឹកស៊ីអ៊ីវ១យួរ សា​រុងមួយ ទឹក​សុទ្ធ​២​កេះ ខ្ទឹម​១​កញ្ចប់ ស្បែកជើង​មួយគូរ ស្ករស​១គីឡូក្រាម ខ្នើយ​មួយ ប៊ីចេង​មួយកញ្ចប់ និង​ថវិកា​៥​ម៉ឺន​រៀល​ផងដែរ ៕



ប្រសិនបើ លោក លោកស្រីចង់ចែករំលែកនូវព័ត៌មានទាន់ហេតុការណ៍ផ្សេងៗ សូមផ្ញើ អ៊ីម៉ែលមកកាន់អាសយដ្ឋានដូចដែលបានបង្ហាញខាងក្រោម។

សម្រាប់ការផ្សាយពាណិជ្ជកម្មលើគេហទំព័រនេះ សូមទំនាក់ទំនងតាមលេខទូរស័ព្ទៈ 016 877 684