ព័ត៍មានទាន់​ហេតុការណ៏
Search

គ្រូបង្វឹក​ក្រុមព្រះ​ខ័ន​រាជ​ស្វាយរៀង ឆេះដុំ​ រឿង​ក្រុម​ផ្សេង​លួច​ចែចូវ​ យក​កីឡាករ​ស្ងាត់ៗ

លោក សំ វ៉ាន់​ដេ​ត គ្រូបង្វឹក​ក្រុមព្រះ​ខ័ន​រាជ​ស្វាយរៀង ដែលជា​ក្រុម​មួយ​សំបូរ​ទៅដោយ ​កីឡាករ​ខ្មែរ​ដែលមាន​សមត្ថភាព​ច្រើន កំពុងតែ​ជួប​បញ្ហា​មួយ​ អំឡុងពេល​លី​គ​កំពូល​កម្ពុជា កំពុង​សម្រាក​ត្រៀម​រដូវ​កាល​ថ្មី នោះ​គឺមាន​ក្លិប​មួយចំនួន​ ព្យាយាម​លួច​ច​ចារ​ទាក់ទង​យក​កីឡាករ ​ក្នុង​ក្លិប​របស់លោក​ដោយ​ស្ងាត់ៗ ទៅ​ចូលរួម​ក្រុម​របស់គេ​។

បុរស​ដែល​ជួយ​ឲ្យ​ក្រុមព្រះ​ខ័ន​រាជ​ស្វាយរៀង លើក​ពានរង្វាន់​សម្តេច​តេ​ជោ ហ៊ុន សែន ឆ្នាំ​២០១៧ ថ្មីៗ​នេះ​បាន​លើក​ឡើង​ថា «​ក្នុងនាម​ជា​គ្រូបង្វឹក​ជនជាតិខ្មែរ​ម្នាក់ ខ្ញុំ​សូម​ស្នើសុំ​ដល់​ក្លិប​មួយចំនួន​ កុំ​លេង​ផ្លូវ​កាត់​រឿង​ចង់បាន​កីឡាករ​របស់គេ​។ បើ​យើង​ចង់បាន​ខ្លាំង ​ត្រូវ​ហ៊ាន​ចំណាយ​។ សូមមេត្តា​ទាក់ទង​ទៅ​ក្លិប​គេ​ផ្ទាល់​ទៅ ពេលខ្លះ​មិនចាំបាច់​ ទាល់តែ​ចាយលុយ​ទិញ​ទើបបាន​កីឡាករ​នោះទេ ​ពេលខ្លះ​គឺ​ត្រឹមតែ​តែ​ខ្ចី​ជើង​ប៉ុណ្ណោះ​។ ចំណែក​ក្រុម​យើង​កន្លងមក ​ក៏​ធ្លាប់​ឲ្យ​កីឡាករ​មួយចំនួន​ ទៅកាន់​ក្រុម​អាស៊ី​អឺរ៉ុប និង​អគ្គីសនី​កម្ពុជា ដើម្បី​ខ្ចី​ជើង​ផងដែរ​»​។

លោក​បាន​បន្តថា «​ពេលនេះ​យើង​បានដឹង​ព័ត៌មាន​ថា ​មាន​ក្លិប​មួយចំនួន​ព្យាយាម​ទាកទង​ កីឡាករ​យើង​ដើម្បី​ទៅ​បំពេញ​ចំណុច​ខ្វះខាត ​របស់​ក្រុម​គេ សម្រាប់​រដូវ​កាល​ថ្មី​ដោយ​ស្ងាត់ៗ​។ រឿង​ដោះដូរ​កីឡាករ ​គួរតែ​ធ្វើ​ស្របច្បាប់ កុំ​ញោះ​ញ​ង់​ដើម្បី​អូសទាញ​កីឡាករ​របស់គេ​។ ឧទាហរណ៍​ករណី​កីឡាករ ចាន់ វឌ្ឍនាកា ជា​គំរូ ​គឺ​គេច​ចារ​គ្នា​ជា​លក្ខណៈ​ការទូត មុននឹង​ពី​ក្លិប​មួយ​ទៅ​ក្លិប​មួយ»។

​លោក សំ វ៉ាន់​ដេ​ត បានបញ្ជាក់​ថា​ នៅ​រដូវ​កាល​ថ្មី​ឆ្នាំ​២០១៨ ខាងមុខនេះ​ក្រុម​របស់លោក កំពុងតែ​សម្លឹង​យក​កីឡាករ​មក​បំពេញ​ចន្លោះ​ប្រហោង ​ក្នុង​ទម្រង់​លេង​របស់​ក្រុម ទាំង​កីឡាករ​បរទេស ​និង​កីឡាករ​ខ្មែរ​។ មិនតែប៉ុណ្ណោះ​ក្លិប​ក៏​អាច​នឹង​ប្រមូលយក ​កីឡាករ​ខ្មែរ​មួយចំនួន ​ដែល​ក្លិប​អាស៊ី​អឺរ៉ុប និង​អគ្គីសនី​កម្ពុជា ខ្ចី​ជើង​មកវិញ និង​បញ្ចេញ​កីឡាករ​មួយ​ ឲ្យទៅ​លេង​នៅ​ក្លិប​ផ្សេង​វិញ​ផងដែរ​។

សូមបញ្ជាក់ថា​ ក្រុមបាល់ទាត់​ព្រះខ័ន​រាជ​ស្វាយរៀង បានបញ្ចប់​រដូវ​កាល​របស់ខ្លួន​ដោយ​ឈរ​ចំណាត់ថ្នាក់​លេខ​៣ ប្រចាំ​ពានរង្វាន់​លី​គ​កំពូល​កម្ពុជា Metfone Cambodian League 2017 ដែលមាន​សមាជិក​១២​ក្រុម ហើយ​នៅក្នុង​ពានរង្វាន់​សម្តេច​តេ​ជោ ហ៊ុន សែន វិញ​បានបញ្ចប់​រដូវ​កាល​របស់ខ្លួន​ដោយ​គ្រង​តំណែង​ជើងឯក​តែម្តង​៕