ព័ត៍មានទាន់​ហេតុការណ៏
Search

កម្ពុជា​ប្រារព្ធ​ព្រះ​រាជពិធី​បុណ្យចម្រើនព្រះជន្ម ​ព្រះមហាក្សត្រ​រយៈពេល ៣ ថ្ងៃ

ភ្នំពេញ​ ៖ ដើម្បី​ចូលរួម​អបអរសាទរ​ព្រះ​រាជពិធី​បុណ្យចម្រើនព្រះជន្ម​ព្រះករុណា​ព្រះមហាក្សត្រ សម្តេចព្រះ​បរមនាថ នរោត្តម សីហមុនី គម្រប់ ៦៥ ព្រះវស្សា យាង​ចូល ៦៦ ព្រះវស្សា នា​ថ្ងៃទី ១៤ ខែឧសភា ឆ្នាំ​២០១៨ ដូច​រៀងរាល់ឆ្នាំ​រាជរដ្ឋាភិបាល​កម្ពុជា​បាន​រៀបចំ​ព្រះរាជ​ពិធីបុណ្យ​រយៈពេល ៣ ថ្ងៃ ចាប់ពី​ថ្ងៃទី​១៣-១៥ ខែឧសភា ឆ្នាំ ២០១៨។ ពិធីបុណ្យ​ជាតិ​នេះ​ត្រូវ​បាន​អនុញ្ញាត​ឲ្យ​មន្ត្រីរាជការ​និង​វិស័យ​ឯកជន​ទូទាំងប្រទេស​បាន​ឈប់សម្រាក​ផងដែរ។

រាជរដ្ឋាភិបាល​ក៏បាន​តម្រូវ​ឲ្យ​នៅមុខ​ក្រសួង​មន្ទីរ​គ្រឹះ​ស្ថាប័នរដ្ឋ និង​ឯកជន តាំង​ព្រះ​ឆាយា​លក្ខណ៍​របស់​ព្រះករុណា លម្អ​ដោយ​ផ្កា ទង់ជាតិ និង​បដា​ពាក្យស្លោក ថ្វាយព្រះពរ​ព្រះអង្គ​ជាដើម​។ ចំណែក​នៅតាម​បណ្តា​ខេត្ត​ក៏​មាន​ប្រារព្ធ​ពិធី​អបអរសាទរ​ពិធី​ចម្រើនព្រះជន្ម​ព្រះករុណា ព្រះមហាក្សត្រ​ផងដែរ។

យោង​តាម​ប្រភព​ឯកសារ​បាន​ឲ្យ​ដឹង​ថា ព្រះករុណា ព្រះមហាក្សត្រ​សម្ដេចព្រះ​បរមនាថ ន​រោ​ត្ដម សីហមុនី ប្រសូត្រ នា​ថ្ងៃទី​១៤ ខែឧសភា ឆ្នាំ​១៩៥៣ នៅ​រាជធានី​ភ្នំពេញ​ព្រះរាជាណាចក្រ​កម្ពុជា។ ទ្រង់​ជា​ព្រះរាជបុត្រ​ច្បង​របស់​សម្ដេចព្រះ​នរោត្តម សីហនុ និង ព្រះ​មាតា​ព្រះនាម នរោត្តម មុនិនាថ សីហនុ ។ ព្រះអនុជ​ព្រះអង្គ ព្រះនាម នរោត្តម ន​រិ​ន្ទ្រ​ពង្ស (​សោយ​ទិវង្គត)។ ព្រះ​អង្គជា​ព្រះមហាក្សត្រ​នៃ​ព្រះរាជាណាចក្រ​កម្ពុជា ដោយ​បន្ត​រាជសម្បត្តិ​ពី​ព្រះរាជ​បិតា​។​

អំឡុង​រដ្ឋប្រហារ​ឆ្នាំ ១៩៧០ ដោយ​លោក​សេនាប្រមុខ លន់ នល់ ព្រះអង្គ​ស្តេច​គង់នៅ​ប្រទេស​ឆេ​កូ​ស្លូ​វ៉ា​គី​។ ក្នុង​ឆ្នាំ​១៩៧៥ ព្រះអង្គ​ទ្រង់​យាង​ចាក​ចេញពី​ទីក្រុង​ប្រាគ ប្រទេស​ឆេ​កូ​ស្លូ​វ៉ា​គី និង​បានចាប់ផ្តើម ការសិក្សា​ទាក់ទង​នឹង​វិស័យ​ភាពយន្ត នៅ​ប្រទេស​កូរ៉េខាងជើង​។ នៅក្នុង​ឆ្នាំ​១៩៧៧ ព្រះអង្គ​យាង​មាតុភូមិនិវត្តន៍​មកកាន់​ប្រទេស​កំណើត​វិញ។ ភ្លាមៗ​នោះ​ខ្មែរក្រហម​ដែល​កំពុង​កាន់​អំណាច​បា​ន​ប្រឆាំង​នឹង​រាជានិយម​និង​បាន​ឃុំ​ព្រះអង្គ នៅក្នុង​ព្រះបរមរាជវាំង ជាមួយ​ព្រះរាជវង្សានុវង្ស​ដទៃទៀត រហូតដល់​ឆ្នាំ​១៩៧៩ ក្រោម​ការអន្តរាគមន៍​ពី​សំណាក់​បរទេស​ខណៈ​ប្រទេស​កម្ពុជា ត្រូវបានរ​ណ​សិ​រ្យ​រំដោះជាតិ និង កងទ័ព​ស្ម័គ្រចិត្ត​វៀតណាម​វាយ​រំដោះ​ផង​នោះ​ព្រះអង្គ​បាន​ភៀស​ព្រះកាយ​ចេញពី​កម្ពុជា។ នៅ​ឆ្នាំ​១៩៨១ ព្រះអង្គ​ទ្រង់​យាង​ទៅកាន់​ទីក្រុង​ប៉ារីស ប្រទេស​បារាំង ដើម្បី​បង្ហាត់បង្រៀន​របាំ​បា​ឡេ និង បាន​ទទួល​ព្រះ​តួនាទី​ជា​ប្រធាន​សមាគម​របាំ​ខ្មែរ​។

ព្រះអង្គ​ទ្រង់​គង់នៅ​ប្រទេស​បារាំង​ជិត ២០ ឆ្នាំ ប៉ុន្តែ​ព្រះអង្គ​បាន​យាង​ទៅ​ទីក្រុង​ប្រាគ​ជារឿយៗ ជាទី​ដែល​ព្រះអង្គ​បាន​ចំណាយពេល​យ៉ាងច្រើន​ក្នុង​ព្រះជន្ម​ក្មេង​វស្សា​។ ព្រះ​អង្គជា​ព្រះមហាក្សត្រ​តែមួយគត់ ដែល​ចេះ​ភាសា​ឆេ​ក​។

នៅក្នុង​ឆ្នាំ​១៩៩៣ ព្រះអង្គ​ត្រូវបានតែងតាំង​ជា​ប្រតិភូ​កម្ពុជា​ប្រចាំ​អង្គការ​យូណេស្កូ ដែលមាន​ទីស្នាក់ការ​នៅ​ទីក្រុង​ប៉ារីស​ជាទី​ដែល​ព្រះអង្គ​មាន​ប្រជាប្រិយភាព ចំពោះ​ការតស៊ូ​ធ្វើការ​យ៉ាង​ស្វិតស្វាញ និង​ភក្តីភាព​ចំពោះ​វប្បធម៌​កម្ពុជា។

នៅ​ថ្ងៃទី​១៤ ខែតុលា ឆ្នាំ​២០០៤ សម្តេចព្រះ​បរមនាថ នរោត្តម សីហមុនី ត្រូវបាន​ជ្រើសរើស​ដោយ​សមាជិក​ទាំង​៩ នៃ​ក្រុមប្រឹក្សា​រាជ​ស​ម្ប​តិ្ត​ជា​ព្រះមហាក្សត្រ នៃ​ព្រះរាជាណាចក្រ​កម្ពុជា ជា​ផ្នែក​មួយ​នៃ​ដំណើរការ​យ៉ាង​ឆាប់រហ័ស​និង​សមស្រប​ក្រោយពី​ដំណឹង​ដ៏​គួរ​ឲ្យ​ភ្ញាក់ផ្អើល​នៃ​ការដាក់រាជ្យ​របស់​សម្តេច​ព្រះ នរោត្តម សីហនុ។ ការ​ជ្រើសរើស​នេះ​គឺ​ស្របតាម​ការយល់ព្រម​ពី​សំណាក់​សម្តេចនាយក​រដ្ឋមន្ត្រី ហ៊ុន សែន និង សម្តេចក្រុមព្រះ នរោត្តម រណឫទ្ធិ ព្រះប្រធានរដ្ឋសភា​ ដែល​ជា​ព្រះរាម​ម្តាយ​ទីទៃ​នៃ​ព្រះមហាក្សត្រ​ដែល​ឥស្សរជន​ទាំងពីរ​សុទ្ធតែ​ជា​សមាជិក​នៃ​ក្រុមប្រឹក្សារាជសម្បត្តិ ។ សម្តេចព្រះ​បរមនាថ នរោត្តម សីហមុនី ទ្រង់​ឡើង​គ្រង​រាជសម្បត្តិ នៅ​ថ្ងៃ​សុក្រ ទី​២៩ ខែតុលា ឆ្នាំ​២០០៤​។

ពី​ឆ្នាំ​១៩៥៩ ដល់​ឆ្នាំ​១៩៦២ ព្រះអង្គ បាន​ចូល​សិក្សា​នៅ​សាលាបឋមសិក្សា​ន​រោ​ត្ដម វិទ្យាល័យ​ដេ​កាត នៅ​រាជធានី​ភ្នំពេញ​។ បន្ទាប់មក ព្រះអង្គ​ត្រូវបាន​ព្រះ​រាជបិតា​បញ្ជូន​ទៅ​សិក្សា​ទីក្រុង​ប្រាគ ប្រទេស​ឆេ​កូ​ស្លូ វ៉ា​គី នា​ឆ្នាំ​១៩៦២​។ នៅ​ទីនោះ ព្រះអង្គ​បាន​ចូលរៀន​នៅ​សាលាបឋមសិក្សា វិទ្យាល័យ និង សាលា​តូរ្យតន្ត្រី ដែល​ទ្រង់​បាន​សិក្សា​ផ្នែក​តន្ត្រី និង របាំ​បុរាណ រហូតដល់​ឆ្នាំ​១៩៧៥​។ ព្រះអង្គ​ស្ទាត់ជំនាញ​ខាង​ភាសា​សាស្ត្រ ដោយ​ទ្រង់​ចេះ​ភាសា​បារាំង និង​ឆែក​យ៉ាង​ស្ទាត់ជំនាញ​។ ក្រៅ​ពី​នេះ ទ្រង់​ក៏​អាច​ប្រាស្រ័យ​ទាក់ទង​ជា​ភាសា​អង់គ្លេស និង​រុស្ស៊ី​បាន​យ៉ាង​ប្រសើរ​ផងដែរ​។ នៅក្នុង​ឆ្នាំ​១៩៧៥ ព្រះអង្គ​បាន​ចាក​ចេញពី​ប្រាគ ដើម្បី​ទៅ​សិក្សា​ផ្នែក​ខ្សែភាពយន្ត​នៅ​ប្រទេស​កូរ៉េខាងជើង ហើយ​បន្ទាប់មក​ទ្រង់​បាន​ត្រឡប់​ចូល​មាតុភូមិ​វិញ​នៅ​ឆ្នាំ ១៩៧៧។

មុន​ពេល​ដែល​ទ្រង់​ក្លាយជា​ព្រះមហាក្សត្រ ព្រះអង្គ​មាន​គោ​រម្យ​ងារ​ជា “​ស្ដេច​ក្រុមឃុន​” ដែល​ព្រះមហាក្សត្រ ព្រះបាទ​សម្ដេចព្រះ ន​រោ​ត្ដម សីហនុ ទ្រង់​ព្រះរាជ​ប្រទាន នា​ថ្ងៃទី​០១ ខែកុម្ភៈ ឆ្នាំ​១៩៩៤ បន្ទាប់មក​ត្រូវ​បាន​ដំឡើង​ជា “​សម្ដេចព្រះ​បរមនាថ​” នា​ថ្ងៃទី​៣១​ខែសីហា ឆ្នាំ​២០០៤​។

ព្រះបរមនាម ក្នុង​រាជ្យ​របស់​ព្រះករុណា ព្រះបាទ​សម្ដេច​ព្រះបរមនាថ នរោត្តម សីហមុនី គឺ “​ព្រះករុណា ព្រះបាទ​សម្តេច ព្រះបរមនាថ នរោត្តម សីហមុនី សមាន​ភូមិ​ជាតិ​សាសនា រ​ក្ខ​តខ​ត្តិ​យា ខេមរា​រដ្ឋ​រាស្ត្រ ពុទ្ធិ​ន្ទ្រា​ធ​រា​មហាក្សត្រ ខេមរា​ជ​នា សមូ​ហោ​ភាស កម្ពុជ​ឯក រាជ​រដ្ឋ​បូរ​ណ​សន្តិ សុភ​ម​ង្គ​លា សិរី​វិ​បុ​លា ខេមរា​ស្រី​ពិ​រាស្ត្រ ព្រះ​ចៅ​ក្រុង​កម្ពុជា​ធិបតី​” ប្រែ​សេចក្ដី​ថា “​អ្នកបម្រើ​មាតុភូមិ សាសនា ប្រជាជាតិ និង ប្រជារាស្ត្រ​ខ្មែរ ដោយ​ស្វាមីភ័ក្តិ និង ភក្ដីភាព។ មហាក្សត្រ​ដែល​ព្រះពុទ្ធ និង ព្រះឥន្ទ្រ​លោក​ឧបត្ថម្ភ។

អ្នក​រួបរួម​ខេមរជន​ទាំងអស់​។ អ្នកការពារ​ឯករាជ្យ បូរណភាព​ទឹកដី និង​សន្តិភាព​របស់​កម្ពុជា ព្រមទាំង​សុភមង្គល សេរីភាព និង​វិបុលភាព​របស់​ប្រជារាស្ត្រ​ខ្មែរ។ ព្រះនាម​របស់​ព្រះអង្គ គឺ​បាន​មក​ពី​ការ​ផ្សំគ្នា​រវាង​ព្រះនាម​របស់​ព្រះ​មាតាបិតា​ព្រះអង្គ​គឺ សីហ (​សីហនុ​) និង មុនី (​មុនីនាថ​)​។

ព្រះករុណា ព្រះមហាក្សត្រ សម្តេចព្រះ​បរមនាថ នរោត្តម សីហមុនី ទទួល​បាន​គ្រឿង​ឥស្សរិយយស​ជាច្រើន រួមមាន ឥស្សរិយយស ព្រះរាជាណាចក្រ​កម្ពុជា​ថ្នាក់​មហា​សេរី​វឌ្ឍន៍ ឥស្សរិយយស មុនី​សារា​ភ័​ណ្ឌ​ថ្នាក់​មហា​សេរី​វឌ្ឍន៍ មន្ត្រី​ធំ​នៃ​កងពល​កិត្តិយស (Grand Officier de la Légion d’Honneur) នៃ​សាធារណរដ្ឋ​បារាំង មេដាយប្រាក់ នៃ​ក្រុងប៉ារីស (Médaille d’Argent de la Ville de Paris) នៃ​សាធារណរដ្ឋ​បារាំង​៕

 



ប្រសិនបើ លោក លោកស្រីចង់ចែករំលែកនូវព័ត៌មានទាន់ហេតុការណ៍ផ្សេងៗ សូមផ្ញើ អ៊ីម៉ែលមកកាន់អាសយដ្ឋានដូចដែលបានបង្ហាញខាងក្រោម។ សម្រាប់ការផ្សាយពាណិជ្ជកម្មលើគេហទំព័រនេះ សូមទំនាក់ទំនងតាមលេខទូរស័ព្ទៈ 016 877 684