រដ្ឋ ត្រៀមទម្លាក់កញ្ចប់ថវិកា ៣៥ លានដុល្លារ ជួយ​សហគមន៍កសិកម្មទំនើប

រាជរដ្ឋាភិបាលកម្ពុជាបានសម្រេចត្រៀមកញ្ចប់ថវិកាពិសេសចំនួន ៣៥ លានដុល្លារ បន្ថែមទៀត ដើម្បីគាំទ្រដល់ការផ្ដល់កម្ចីអត្រាការប្រាក់ទាបដល់សហគគមន៍កសិកម្មទំនើប នៅក្នុងរយៈពេល ៣ ឆ្នាំ (២០២៥-២០២៧) ដែលជាយន្តការមួយក្នុងការពង្រឹងគុណភាពកសិកម្ម និងទីផ្សារ។

សម្ដេចមហាបវរធិបតី ហ៊ុន ម៉ាណែត នាយករដ្ឋន្ត្រីកម្ពុជា មានប្រសាសន៍​នៅក្នុងពិធី​សមា​ជរដ្ឋសភា​ ​និងព្រឹទ្ធសភា លើកទី១ នៅថ្ងៃទី ០៣ ខែមិថុនា ឆ្នាំ ២០២៥ថា សហ​​គមន៍​​​​កសិកម្ម​ទំនើបចំនួន ៦ កំពុងទទួលបានការគាំទ្រពីរាជរដ្ឋាភិបាលជាប្រាក់កម្ចី អត្រាការប្រាក់ទាប ក្នុងរង្វង់ ៧% ក្នុងមួយឆ្នាំ សម្រាប់ការធ្វើទុនបង្វិល ដែលមានទឹកប្រាក់សរុបប្រមាណ ១,៩ លានដុល្លារ។

សម្ដេច ហ៊ុន ម៉ាណែត បញ្ជាក់ថា៖ «រាជរដ្ឋាភិបាលបានសម្រេចជាគោលការណ៍ ដោយត្រៀម​កញ្ចប់ថវិកាពិសេសចំនួន ៣៥ លានដុល្លារ បន្ថែមទៀត ដើម្បីគាំទ្រដល់ការផ្ដល់​កម្ចីទាប​ជូន​សហគគមន៍កសិកម្មទំនើប នៅក្នុងរយៈពេល ៣ ឆ្នាំ ២០២៥-២០២៧»។

រាជរដ្ឋាភិបាលកំពុងពង្រីកការអភិវឌ្ឍន៍សហគមន៍កសិកម្មទំនើប នៅតាមបណ្ដាខេត្ត និងគ្របដណ្ដប់លើដំណាំ ដែលមានសក្ដានុពលខ្ពស់ផ្សេងទៀត ដូចជាស្វាយចន្ទី កៅស៊ូ និងទុរេន។

គិតមកដល់ពេលនេះ សហគមន៍កសិកម្មទំនើបចំនួន ១២ ត្រូវបានបង្កើត បន្ថែម​លើសហគមន៍ដែលមានសម្រាប់ ២៦០១ សហគមន៍ និងត្រូវចុះបញ្ជីទទួលស្គាល់ជាផ្លូវការនៅក្នុងខេត្ត ៧ ដែលមានខេត្តសៀមរាប កំពង់ធំ តាកែវ កំពង់ឆ្នាំង កណ្ដាល ត្បូងឃ្មុំ និងខេត្តពោធិ៍សាត់ លើ​មុខ​ដំណាំយុទ្ធសាស្ត្រចំនួន ៤ គឺ ណាំស្រូវ បន្លែ ស្វាយចន្ទី និងម្រេច ដែលគ្របដណ្ដប់លើផ្ទៃដី ១ ១៤២១ ហិកតា និងមានផលិតភាពប្រចាំឆ្នាំចំនួន ១៩,៧៧ លានដុល្លារ៕

អត្ថបទ៖ ឡេង ដេត